Mpôl pah kan mbrô 5 bah Bộ Y tế tă bah wa Võ Hải Sơn, Groi Cục trưởng Cục Njrăng n’gang nău ji mhe pah kan đah Sở Y tế n’gor Gia Lai mpeh  pah kan njrăng- n’gang ji luh mê gŭr Tĭng Sở Y tế Gia Lai, ntơm bah bôk năm tât aƀaơ, lam n’gor năl geh rlău 2.000 nuĭh ji mĭn lah nuh srê ji luh mê gŭr ta lĕ rngôch 17 nkuâl, thị xã, nkual ƀon têh bah n’gor.

Tâm nê, rnoh nuĭh ji luh mê gŭr mĭn lah mô hŏ chuh vắc xin âk 40%. Năm 2024, n’gor hŏ geh tât rnoh chuh n’gang rlău 95%, n’hanh aƀaơ dôl an ƀư chuh n’gang năm 2025, nsrôih ƀư lôch jêh tâm khay 3 đah nău ŭch geh chuh vắc xin an tât rlău 95% kon se tâm săk ân chuh n’gang. Ta rơh pah kan, mpôl pah kan bah Bộ Y tế lah rjăp nău jăch ndăn bah rơh chuh n’gang, đă Gia Lai ân ƀư lôch jêh nău mbơh, ntrôl ngăch chuh n’gang n’hanh rgum hŭch bah ntưp rêng chong cheng ta ntŭk săm. Ndrel đah nê, Gia Lai ân n’hao nău gĭt êng tâm ƀon lan, rgâl geh lam trong groi nđôi nuh srê n’hanh kan nsum lhăt đah ăp nhih pah kan dơi kan gay nking nchăng nuh srê geh nău tam.