Mbrơi mbrơi leo kon hăn jâng njok mir ka phê dôl yan dang nkao nglang rsang ta du ntŭk pâl nđaih lŏ mir ta Dak Lak, yuh Nguyễn Thị Phương, gŭ nkual ƀon têh Đà Lạt, n’gor Lâm Đồng hăn uănh nkao ka phê, nkre ntĭm an kon uănh ăp sŭt dôl rhêp dak nkao ka phê. Yuh Phương nkoch, gâp tă lah ƀon lan kan lŏ mir tăm ka phê jêng ăp yan nkao kơt aơ, ăp nău kăl e plơ̆ sĭt tay.

Mir ka phê đah dŭt âk nkao n’hanh ƀô kah ri gĭt saơ đah du yan hơm răm sĭt tât hôm e ntoh tâm săk nơm dŭt ŭch. Jay gâp mô hôm mir jêng aƀaơ geh kon jêt ri gâp way tât ăp ntŭk kơt aơ, geh nkao, geh tơm ka phê gay ăp kon dơi ƀư ngăn, dơi saơ văn hóa kơt rnôk ta Tây Nguyên.

Đah trôk nar duh răm, ndrel ka phê, âk ntil tơm tâm bri ta Dak Lak n’hanh lĕ Tây Nguyên bŭt nkŭr kơn play, nkao tâm rlong ntơr uĕh, khay 3 jêng “yan sŭt hăn sŏk dak”. Ndăn nău geh aơ, âk ntŭk kan ƀư pâl nđaih ta ntŭk lĕ ƀư ăp tuor pâl nđaih tĭng đah nău ƀư ngăn, uănh joi văn hóa n’hanh lăp nơm tâm ntŭk ntô pah kan bah nuĭh ƀon lan. Bah meng ka phê, ăp ntŭk pâl uĕh, ntŭk pâl nđaih ntĭt mpơl ta Dak Lak ƀư năch pâl nđaih uănh uĕh, Wa Lò Hải Phan, ta nkual ƀon têh Sơn La, n’gor Sơn La an gĭt:

Trong hăn rơh aơ lah 5 măng 4 nar, hăn kơt ăp ntŭk khlay, du đêt di tích lịch sử ta nkual ƀon têh Buôn Ma Thuột, jêh nĕ hăn Buôn Đôn, hăn dak leng Drai Nur. Saơ dŭt geh nkô̆, lơn lah du ntŭk geh du ntŭk êng êng, kơp n’ăp ndơ sa dŭt tâm di.

Hôm wa Nguyễn Đình Hùng, tât bah thủ đô Hà Nội ri gĭt saơ:

 Tât Dak Lak ri gâp geh khâl Bảo tàng, Ƀon ka phê Trung Nguyên, nkual pâl nđaih Kŏ Tam, tât n’glău Lắk. Gâp saơ dŭt uĕh, trôk nar ta aơ dŭt nđik, kloh aih n’hanh nuĭh ƀon lan dŭt wât năchg. N’ăp rveh n’glơi tay nău uĕh jêr chuêl, dŭt uĕh n’hanh đêp rmên.

Ta trong hăn uănh joi ntŭk ntô bri dak, năch pâl nđaih tât Dak Lak dơi ƀư ngăn văn hóa bah ăp rnoi nuĭh ta ntŭk. Ta ăp nkual ntŭk pâl nđaih nsum mpôl, pâl nđaih mpeh văn hóa, ăp nău khlay bah ăp rnoi nuĭh dơi joi saơ, jêng ntŭk wăch rgum pâl nđaih. Wa Trần Thị Kim Ánh, giám đốc nkual pâl nđaih ta nkuăl Buôn Đôn nkoch:

Bah meng nău ƀư đah rveh, hôm ƀư tâm rlong plŭng kazak ta dak me Sêrêpôk, ndrel đah ăp nău rhŏ ngêt sa ntĭl mpơl bah nuĭh ƀon kan ta ntŭk, lơn lah bah nuĭh Lào, Êđê n’hanh Bu nong, geh ntoh măt âk ngăn ta xă Krông Na.

Khay 3 yan nkao, yan sŭt sŏk dak, lah yan lễ hội n’hanh nkah gĭt nar rklaih đăp mpăn, jêng pâl nđaih Dak Lak lơ n’gŭr răm. Đah lôch uĕh rlău ma nău kâp, Lễ hội ka phê Buôn Ma Thuột rơh tal 9 n’hanh ăp nău ƀư nkah gĭt 50 năm Buôn Ma Thuột lơh dơi, rklaih đăp mpăn n’gor Dak Lak, lĕ rgop khlay, kơl Dak Lak wăch rgum 700.000 nuĭh năch pâl nđaih tâm 3 khay 2025, sŏk geh pâl nđaih geh 600 rmen prăk, hao rlău 2 tơ̆ nkôp đah rơh aơ năm bah năp. Tĭng wa Nguyễn Thuỵ Phương Hiếu, Groi Giám đốc N’gâng kan Văn Hóa, Thể thao n’hanh pâl nđaih Dak Lak, săk rnglăy aơ an saơ, pâl nđaih Dak Lak dôl joi ƀư săk rnglăy ăp nău geh bah n’gor.

Ăp doanh nghiệp pâl nđaih tâm rgop đah N’gâng kan Văn hóa, Thể thao, Pâl nđaih tâm nău ndâk ƀư ăp ntŭk tât, tĭng tâm bôk nău kan geh âk ntil nău gay rhŏ an âk nuĭh năch. Nău mhe năm aơ lah ntop tay bôk nău kan trong hăn drăp ndơ gay mpla nsơ, ntô̆ n’hao ăp drăp ndơ ta ntŭk, kơl năch pâl nđaih geh tay nău ƀư ngăn. Rlău ma nău tâm rgop ăp bôk nău kan pâl nđaih, năch pâl nđaih hôm dơi mĭn joi tay mpeh ăp drăp ndơ ta Dak Lak.

Yan nkao ka phê dang nglang bri ndrel ăp uĕh ntơr jêng tay ntŭk uĕh gay wăch rgum năch pâl nđaih tât đah Dak Lak. Nĕ lah dơi an n’gor jêng ntŭk tât uĕh, hao jêng mpeh pâl nđaih, rgop ntrôl hun hao wăng sa n’hanh mpla nsơ rup ndah nkual neh têh tât đah năch pâl nđaih tâm n’hanh bah dih dak.