Ntơm bôk năm tât rnôk aơ, lam dak kơp dơn geh bơi tât 40 rbăn nŭih ntôn geh rtoh luh srê tâm 63 n’gor, nkuăl ƀon têh, tam nê bơi tât 3.500 nŭih ntưp ma srê rtoh luh dak tâm 61 n’gor, nkuăl ƀon têh. Rnoh nŭih geh ntôn ntưp geh kơp dơn âk ngăn mpeh ba dâng (geh 57% rnoh nŭih ntưp bah lam dak), miền Trung geh 19,2%, mpeh ba lơ geh 15,1%, nkuăl Tây Nguyên geh 8,7%. Tiến sĩ Hoàng Minh Đức, Kruanh n’gâng kan njrăng srê ji mbơh, hŏ geh 5 nŭih khĭt yor rtoh luh dak tâm n’gor Quảng Nam:

            ‘Nŭih khĭt êp aơ ngăn lah tâm nkuăl Nam Trà My, n’gor Quảng Nam. Nŭih ji lah kon se, păng aơ geh rtoh luh dak yơn mô tât ngih dak si khám săm, ma jă bu tât hŭm ôp brah. Rnôk kon se aơ ji jâk ri tât ngih dak si ri khĭt’.

            Ăp n’gor nkuăl ƀon têh geh nŭih rtoh luh dak dôl ma hao âk lah, Cao Bằng, Nghệ An, Quảng Nam, Đà Nẵng, Khánh Hoà, Dak Lak, Gia Lai, Kon Tum, Đồng Tháp, An Giang, Lâm Đồng. Du đê̆ nkuăl geh rnoh âk ngăn yơn ntơm nsrŭng ndrel geh nkân lah: Lào Cai, Hà Giang, Hà Tĩnh, Bình Thuận, Bạc Liêu, Nkuăl ƀon têh Hồ Chí Minh, Bình Dương, Đồng Nai, Tây Ninh, Cà Mau.

            Tĭng n’gâng kan njrăng srê ji, tâm năm 2024, rnoh chuh vắc xin rtoh luh dak tâm kon se geh rlau 97%. Yơn lah, tâm nau chuh njrăn srê tâm 31 n’gor nkuăl ƀon têh geh nau ntưp âk kơt rnôk aơ hôm 7 n’gor, nkuăl ƀon têh geh rnoh vắc xin rtoh luh ê tŏng dơi bah N’gâng kan dak si. Ƀư tơm nar rƀŭn trực tuyến lam dak, N’gâng kan dak si Đào Hồng Lan, đă ăp ntŭk ngih dak si njrăng rdâng bah N’gâng kan dak si ân nkah nau tât bah srê tâm ăp nkuăl geh rnoh chuh mô âk, ăp n’gor gôl yôk, ntŭk geh âk nŭih rnoi mpôl đê̆ rêh, đah nau geh dŏng ngih dak si ê âk:

            ‘N’gâng kan dak si dôl mbơh ma Chính phủ ntrŭnh đă nau rđau ntrŭt dăng ngăch nau chuh njrăng vắc xin rtoh luh tâm ăp nkuăl. N’gâng kan kŏ ntrŭnh ăp nau nchrăp chuh njrăng vắc xin rtoh luh năm 2025, ngăn lah rnôk aơ, bri mih nar dôl tâm rgâl yan, đah ăp nau tât ndal, njêng nơih ân ăp nau ji tâm ntưp, ngăn lah rtoh luh dak”.

            N’gâng kan dak si kŏ đă ăp n’gor, nkuăl ƀon têh vay ƀa ƀơ nchră mbơh nau tât bah srê rtoh luh dak, kơl an đăp mpăn nŭih pah kan, nŭih kơl săm, ndơ dŏng, dak si gay ma ntrŭt dăng ngăch nau chuh njrăng srê rtoh luh dak, ƀư jêh nau chuh ntop, nchuh lĕ tâm khay 3 aơ./.