Tâm trôm rơh khâl na nê̆ Armenia, lơ 3/4, Kruanh Quốc hội Trần Thanh Mẫn lĕ rgum ôp Tổng thống Armenia Vahagn Khachaturyan. Kruanh Quốc hội Trần Thanh Mẫn njuăl nău ôp khâl bah Tổng Bí thư Tô Lâm, Kruanh dak Lương Cường n’hanh Thủ tướng Chính phủ Phạm Minh Chính tât Tổng thống Khachaturyan; lah rjăp nuih ƀon lan Việt Nam nkah gĭt mro nău ntop kơl n’hanh kơl an khlay ma ƀon lan Armenia lĕ an Việt Nam tâm nău njrăng n’gang sŏk đăp mpăn rnoi nuĭh n’hanh nău kan ndâk njêng, hun hao neh dak.

2 nuĭh kruanh răm rhơn ta năp ăp njoat hun hao uĕh bah tâm boh Việt Nam-Armenia ta âk ntil; djôt dơn nău mât tâm rgâl mpôl ăp gưl, lơn lah gưl prêh ta lĕ rngôch ăp trong dơi ƀư dŭt n’hâm, săk rnglăy gay nâp nâl tay tâm boh n’hanh nsing nơm ndrel, tâm di nău geh bah lĕ 2 dak; uănh lah prêh hao jêng uĕh bah kan ndrel wăng sa-tăch rgâl đah 2 dak, ngăn lah tâm ăp năm dăch aơ jêh rnôk Tâm ton tăch rgâl dah rŏng đah Việt Nam n’hanh Tâm rgop Wăng sa Á-Âu geh tam tâm năm 2016.