Ntơh măt Trung ương Đảng, Tổng Bí thư mbơh gĭt mpeh du đêt trong nchrăp têh jong gay tât chông prêh “đăp mpăn rêh jêng kon nuĭh, hun hao wăng sa, n’hao nău rêh nuĭh ƀon lan”, tât năm 2030, dak he jêng dak dôl hun hao, geh công nghiệp têh uĕh mhe, tât năm 2045 jêng dak hun hao, nsĭt geh wăng sa âk. Tổng Bí thư lah rjăp, Đảng n’hanh Nhih dak rgum n’hao âk ăp trong mât kơn mbro đăp mpăn gay hun hao neh dak. Đảng he hô geh du ntil ndơ êng rlău ma nău geh bah nuĭh ƀon lan; ƀon lan lah rgum tơm, tơm mpôl tâm ăp trong nchrăp, gung trong bah Đảng; ăp nău nsrôih bah Đảng, Ngih dak, lam trong kan chính trị dơn geh nău khlay rnôk nuĭh ƀon lan geh nău rêh hơm răm, đăp mpăn. Yor kơt nê̆, Đảng, Ngih dak mbra rgum ăp trong mât chăm, n’hao nău rêh bah nuĭh ƀon lan, lơn  lah ƀon lan ăp rnoi mpôl đê̆ ta nkual jru, nkual ngai, n’har bri, gôl dak, nkual ntŭk gŭ nde tâm lơh ơm, ăp nkual têh khlay, nkual geh âk ƀon lan tĭng chroh. Tĭng ƀư jăp trong kơl đăp mpăn lam rêh jêng kon nuĭh, ndơ geh dŏng nsum, trong kơl đah nuĭh geh n’hâm suan; tĭng ƀư trong kơl dơm prăk nti đah ăp gưl nti phổ thông; nsrôih ƀư wat jêh jut jăng jay truh sat lam dak; uănh khlay hun hao dak si, mât chăm n’hâm suan ƀon lan, hăn tât an bĭch dơm nhih dak si lĕ rngôch nuĭh ƀon lan, gay ăp nuĭh ƀon lan Việt Nam geh nău rêh rhơn răm ngăn./.