Jêh rnôk N’gâng kan Nội vụ geh sam ƀŭt ntĭm 2 n’gor Kon Tum, Quảng Nam ƀư tĭng tâm pă n’har neh hành chính ta nkual kâng n’har xă Trà Vinh mpeh tâm nkuăl Nam Trà My, n’gor Quảng Nam n’hanh xă Đắk Nên ta nkuăl Kon Plông, n’gor Kon Tum, UBND n’gor Kon Tum dăn đă Quốc hội mkra lôch ntŭk wăk kol ƀa ƀă lah ƀon lan.

Tĭng nĕ, UBND n’gor Kon Tum dăn đă Ủy ban Thường vụ Quốc hội uănh mĭn tay, tâm ban ŭch mkra lôch nău nuĭh ƀon lan xă Trà Vinh, nkuăl Nam Trà My, n’gor Quảng Nam gŭ rêh ta xă Đăk Nên, nkuăl Kon Plông, n’gor Kon Tum. Gay mkra wăk kol, UBND n’gor Kon Tum dăn đă 2 trong, geh: Rgâl ndrôm sam ƀŭt nchih săk 187 rnăk (1.034 nuĭh) nuĭh ƀon lan thôn 3, xă Trà Vinh, nkuăl Nam Trà My, n’gor Quảng Nam sĭt mpeh mât uănh bah nkual ƀon têh Đà Nẵng (jêh nglăp nsum nkual ƀon têh Đà Nẵng-Quảng Nam) mô lah nuĭh ƀon lan sĭt nglăp gŭ ta n’gor Quảng Ngãi (jêh nglăp n’gor Quảng Ngãi-Kon Tum)