Kruanh Quốc hội Trần Thanh Mẫn mbơh, rơh 1, rơh rƀŭn tal 9 hŏ ƀư đah nuih n’hâm kan rjaơ, nau kan prêh, ndal ndrel nuih n’hâm chính trị prêh, njêng nau tâm ban nuih n’hâm bah ăp ntoh măt Quốc hội. Tâm nê nkô̆ nau geh nau khlay chính trị, pháp lý khlay tâm rơh rƀŭn aơ nchră tât nau ntrŭnh uănh nau rgâl mhe, ntop tay du đĕ điều bah Hiến pháp năm 2013 gay lŏ ƀư nau ntrŭnh rgum, rtŭt gleh ntŭk kan bah trong kan chính trị. Ƀư nau ntrŭnh aơ, Rnâng kan bah Uỷ ban Trung ương MTTQ Việt Nam kŏ ƀư rƀŭn sŏk nau rgop bah nau nchrăp nau ntrŭnh rgâl nkra, ntop tay du đê̆ điều bah Hiến pháp năm 2013. Ƀư tơm nar rƀŭn, Groi Kruanh Uỷ ban Trung ương MTTQ Việt Nam Hoàng Công Thuỷ, lah kloh:

            ‘Nau rgâl nkra, ntop tay Hiến pháp rnôk aơ geh tât nau nchrăp, rgum tâm 8/120 điều bah Hiến pháp năm 2013 gay ƀư ân ngăn năn ăp nau ntrŭnh bah Đảng mpeh nau dăp rgum ntŭk kan bah Mặt trận Tổ quốc Việt Nam, ăp ntŭk kan chính trị-rêh jêng, ăp rmôt kan yor Đảng ndrel Ngih dak jao nau kan; ƀư jêh nau kan n’gâng kan tâm nkuăl 2 gưl tĭng ntrong tâm dăch ma ƀon lan, kơl an ƀon lan ân ueh lơn”.

            Kruanh Quốc hội Trần Thanh Mẫn mbơh: Nau nchrăp nau ntrŭnh bah Quốc hội mpeh du đê̆ nau kan, nau ntrŭnh hun hao văng sa ƀư êng geh 7 chương ndrel 17 điều, tâm nê ntrŭnh nsum nau geh tât nau rgâl ntŭk ƀư nau kan tăch rgâl; kơl an nau geh dŏng dơi neh ntu, ntŭk kan tăch rgâl; kơl an tơm prăk ndrel rvăt năp; kơl an khoa học công nghệ, rgâl blau mhe, ntrơn rgâl mrô ndrel ntĭm nti nŭih kan; kơl an ntŭk kan tăch rgâl bah găp ndrel têh, ntŭk kan leo trong lor:

            ‘Nkah ngăn lah nau ntrŭnh tât ntŭk kan văng sa ƀư êng. Yor aơ, nau ntrŭnh bah Đảng mhe ký tâm lơ 4/5 ri Chính phủ, Thủ tướng kŏ rƀŭn nchră rơh rƀŭn ân nau ntrŭnh gay mbơh ma Quốc hội. Đảng hŏ ntĭm trong jêh ri nơm mhâm ƀư ân geh ƀư, ƀư ngăn nau kan nchrăp luh aơ. Gâp jao ân Uỷ ban văng sa, tơm prăk ân geh tâm rgop rjăp ngăn đah N’gâng kan tơm prăk kŏ kơt lah ăp ntŭk kan geh tât uănh nchrăp tă bah ơm, bah ngai”.

            Kruanh Quốc hội Trần Thanh Mẫn nkah, nau ntrŭnh tât nau kan, nau ntrŭnh hun hao văng sa ƀư êng gay rgâl ntŭk ƀư nau kan ntuh kơl tăch rgâl; kơl an tât nau geh neh ntu, ntŭk ƀư nau kan ê nkra, tăch rgâl; kơl an tơm prăk, rvăt ndơ ndoh ndơ dŏng’ ntrŭt dăng tâm boh kan nsum ndrel rvăt ndơ bah ntŭk ƀư nau kan; kơl an khoa học, công nghệ, rgâl blau mhe, ntrơn rgâl mrô ndrel ntĭm nŭih kan; kơl an njêng ntŭk kan tăch rgâl bah găp ndrel têh, ntŭk kan leo trong lor...Kruanh Quốc hội Trần Thanh Mẫn lah rjăp:

            ‘Nơm ân geh rgâl nau mĭn, Ngih dak njêng rgâl ma nau nkân lơi, tâm nuih n’hâm đă kan bah Tổng Bí thư Tô Lâm hŏ nkah âk tŏ hôm. Nau mât đăp mpăn mpeh pháp lý ndrel kơl an nau ntrơn rgâl mrô, rgâl blau mhe, nê lah nau ma Ngih dak ƀư nsum ndrel ntŭk kan tâm nau hun hao...Gâp đă ân geh kơp n’hêl nŭih, nau dơi ân geh dŏng ăp nau kan, nau ntrŭnh, đăp mpăn nuih n’hâm geh dơi, săk tam bah nau ntrŭnh tâm nau kan ngăn”.

            Gay nchrăp nkô̆ nau ân rơh 2 bah rơh rƀŭn tal 9, pơh rlau aơ, Uỷ ban Rnâng kan Quốc hội hŏ nchrăp nau rgop mpeh 3 nkô̆ nau tơm tâm nau ntrŭnh Quốc hội tâm lơ 19/5, geh: nau ntrŭnh ntuh kơl bôk nau kan ndâk nkra trong hăn ngăch Quy Nhơn-Pleiku; nau ntrŭnh ntuh kơl bôk nau kan ndâk nkra trong teng 4 Nkuăl ƀon têh Hồ Chí Minh./.