Tĭng Bôk nau kan dăp rgum rmôt kan hành chính gưl n’gor năm 2025, lam dak geh 34 n’gor, nkuăl ƀon têh tâm Trung ương ndrel 28 n’gor. Rnoh biên chế cán bộ, công chức, viên chức ƀư nau dăp rgum lah rlau 447 rbăn; rnoh ntŭk kan nsum lah rlau 38 rbăn ntŭk, lŏ dŏng bơi tât 34 rbăn, rmeh rlau 4000 ntŭk gŭ kan.

            Tâm nchră ta rmôt mpeh nau kan aơ, ăp ntoh măt tâm ban nau đah nau kan dăp rgum n’gor, nkuăl ƀon têh tâm Trung ương năm 2025 ndrel saơ, ăp nau kan dăp rgum rmôt kan hành chính gưl n’gor yor Chính phủ đă hŏ mât tâm dăch ndrel đăp mpăn tâm di ma ăp nau rđau, đă bah ăp gưl geh nau dơi. Ntoh măt Dương Khắc Mai, rmôt kan n’gor Dak Nông lah rjăp, nau rnglăp n’gor lah nau ntrŭnh khlay. Nau kan jêh rnôk rnglăp, ăp n’gor mra pă cán bộ, công chức, nŭih pah kan ndrel rklaih ntŭk kan rmeh nê mhâm ƀư:

            ‘Nau khlay ngăn lah rnôk rnglăp ri nơm mât dơi rmôt cán bộ geh nau blau nau kan. Tal bar lah ntŭk gŭ kan ân geh mât nâp du trong rjăp, nkre lah mô ân geh djơh, ân geh nau ƀư gay ntrơn leo nau dăng dơi dŏng bah ăp ntŭk kan aơ”.

            Tĭng wa Trần Hoàng ngân, rmôt kan nkuăl ƀon têh Hồ Chí Minh, rnglăp n’gor, mra kơl an ăp nkuăl ƀư nâp tay ntŭk gay hun hao. Tĭng wa, gay ăp n’gor, nkuăl ƀon têh rgum dơi nau dăng, nau kan săk tam jêh rnôk lôch tâm rnglăp ri:

            ‘Mhâm ƀư ân ăp nkuăl tâm rnôk ăp n’gor ma kơp lĕ nthoi ân n’ho ro, đăp mpăn dơi geh ăp ntŭk ntu ƀư kan, mô êng lah gung trong hăn ma n’ăp ma nau kan mrô. Nau nê ân geh tu tơm ma tâm ăp nau geh dơi tu tơm khlay nê lah tu tơm nâp mpeh tơm prăk. Ndri ma gâp hôm đă ân geh uănh rjăp Luật mpeh tơm prăk Ngih dak, ri nau dăng bah neh ntu lvang 5 năm 2016-2030 nơm ân lơi ân ăp n’gor nkual ƀon têh gay ăp n’gor geh dơi nau ntuh kơl mpeh ăp nau kan aơ”.

            Groi Thủ tướng Rnâng kan Nguyễn Hoà Bình lah rjăp, nau kan dăp rgum rmôt kan hành chính gưl n’gor rnôk aơ lah du nau kan rgâl rjăp khlay mpeh ntŭk kan ndrel nŭih kan. Nkô̆ nau lah ndâk nau kan ân tâm di ndrel njêng ntŭk ƀư tâm nau geh hun hao văng sa tŏng dăng, tâm rgop ma nau dăng tâm nkuăl, n’ăp ma nkuăl yôk ndrel dak lêng. Nchrăp lah, lơ 30/6, ăp n’gor mra mbơh lĕ ntŭk ƀư nau kan hành chính mhe bah n’gor, xã ndrel ma ăp ntrong rđay kan mhe lĕ ma Đảng ndrel n’gâng kan. Ôi lơ 30/6, ăp nau kan bah n’gor, xã mra geh mbơh, ndrel ntơm lơ 1/7, ntrong kan mhe tĭng nau kan n’gâng kan bah n’gor bar gưl mra ntơm geh dŏng ƀư ngăn.

            Hôm tĭng Kruanh n’gâng kan Bộ Nội vụ Phạm Thị Thanh Trà, nau kan dăp rgum geh ƀư rjăp, âk ding, ntơm bah neh, rnoh nŭih tât nau ơm yau, nau vay, rnoi nŭih, nau tĭng chroh, nau rƀŏng hun hao ndrel nau mĭn tâm nau rêh jêng:

            ‘Dăp rgum rmôt kan hành chính gưl n’gor nsing tâm nau kan nkuăl neh rƀŏng tât dak lêng têh dnrel ndăn dơi nau dăng mpeh văng sa dak lêng ndrel nau dăng dơi gay ma tâm rnglăp. Bộ chính trị, Rnâng kan rđau kan Trung ương, ngăn lah Chính phủ kŏ nchrăp ăp nau geh dơi tŏng ƀư, yơn nau khlay lơn nê lah ăp nkuăl ƀư nau dăp rgum, rnglăp, ntrŭnh ƀư ăp nau đă gay ƀư dơi nau kan n’gâng kan tâm nkuăl 2 gưl lah nau nsôih ngăn”.

            Kơt ri, nau kan dăp rgum rmôt kan hành chính gưl n’gor rơh aơ mô êng lah nhoat hăn khlay tâm nau rtŭt gleh ntrong kan, dŏng săk tam nŭih kan, ma hôm pơk luh ntŭk gay hun hao mhe, njêng nau ntrŭt dăng văng sa, rêh jêng bah ăp n’gor. Đah nau nchrăp nâp tă bah Trung ương tât xã, nau tâm ban nuih n’hâm bah ăp gưl, ăp ntŭk kan ndrel lam ƀon lan, nau kan tâm rnglăp, dăp rgum rmôt kan hành chính gưl n’gor năm 2025 mra pơk trong nơih yeh jêng du nau mhe ngăn ân neh dak, tâm di ma nau đă ŭch hun hao nâp nâl ndrel tâm rnglăp jru nâp tâm rơh mhe./.