Ăp năm mhe aơ, n’gor Dak Nông (ơm), (mpeh n’gor Lâm Đồng mhe) dâk leo lor bôk năp mbro ta nkual Tây Nguyên n’hanh lah ngoăy tâm ăp n’gor dâk bôk năp lam dak mpeh n’hŭch ach o. Pah kan n’hŭch ach o an saơ ăp nău dơi tam ngăn ngăn bah pah kan rđău đă tât ăp nău kan bah ăp mpôl kan đảng tâm dâng, ăp chi bộ n’hanh ăp đảng viên ta ƀon lan.

Tâm jay mhe mon têh hvi, wa Y Tơn, ta ƀon Đăk Săk, xã Đăk Săk, dŭt rhơn yor nău rêh bah rnăk wâl hŏ rgâl. Wa Y Tơn an gĭt, aơ lah nău  dơi bah njăr trong hăn klaih rlău ach o jŏ jong đah nău ntop kơl bah n’gâng kan ta n’gor, lơn lah nău kơl lĕ nuih n’hâm bah ăp đảng viên tâm chi bộ ƀon. Bar pe năm bah năp nơh, rlău 2ha mir lơn âk tăm bum blang, mô tŏng an du rnăk sa. Yơn aƀaơ, nha hôm 2 hecta dja đŏng, dơi rgâl tăm ma tơm cà phê, sầu riêng, play đŭr, jêng rnăk nsĭt geh wăng  sa đăp mpăn.

“Dơi ngih dak mât uănh khlay, dơi chi bộ ƀon ntĭm nti n’hanh dơi manh geh tơm prăk ngân hàng chính sách jêng rnăk geh ndơ ma hun hao tuch tăm mât rong. Aƀaơ hŏ tăm geh cà phê n’hanh âk ntil tơm sa play hôm, du đêt tơm hŏ an geh wăng sa đăp mpăn hôm, nău rêh hŏ mbơm oi lơn, geh ndơ gay ma nsan hao.”

 Ndrel đah ăp bôk nău kan, trong nchrăp jut jăng ji ngot, n’hŭch ach o, ăp tơm prăk kơl, nău ăp gưl uỷ đảng n’hanh lam trong kan chính trị lăp kan kơl ăp rnăk ach o đah ăp trong ntĭt leo, trong ƀư ngăn ngăn hŏ kơl pah kan n’hŭch ach o nsĭt geh nău tam. Lah đảng viên, tahen ơm nsing nơm, kơt lah ăp nar che Y Bleng, nuĭh Bunong, ta ƀon 9, xã Krông Nô, ndrel mpôl mât njrăng êng ƀon tât khâl ăp rnăk ach o tâm ƀon, tâm ôp nău tă ơm gĭt kan tâm nău têh n’hanh nău kan. Che Y Bleng an gĭt, djăt ma 5 đảng viên, 5 rnăk geh mbơm oi ndrel kơl du rnăk ach o. ăp rnăk ach o dơi nhŭp ti nchŏng kan, nkre geh nuih n’hâm nđơr mpeh drăp ndơ, nkre dơi ƀư an nuih n’hâm nsan hao:

“Oh nô ân tâm têk ndrêng nsum, rgŏ jă kônh wa ƀon lan tâm rnglăp, hun hao wăng sa. Mô di tahen ơm lah du hê ôh, tahen ơm lah ân rgŏ jă kônh wa, ân hăn treng uănh rnăk ach o, way ƀư kơt nê̆. Rnăk I jêr jŏt he ân rgum rgŏ jă nsum, oh nô ƀư geh ndrŏng ri ndrel kơl rnăk wâl nê"

Trong ntĭt leo ăp đảng viên kơl rnăk ach o nsan hao hŏ dơi kơt ƀư ta âk ƀon lan bah n’gor Dak Nông ơm, n’gor Lâm Đồng mhe. Rhiăng rnăk ach o dôl dơi ăp mpôl kan đảng tâm dâng, ăp chi bộ, ăp đảng viên ta thôn, ƀon ntop kơl gay ơm klaih rlău  ach o. wa Vương Thị Hiền, Groi kruanh ơm UBMTTQ xã Dak Ndrung, nkuâl Dak Song ơm an gĭt, đah nău tât râng bah ăp đảng viên ta âk gưl, bah thôn tât xã, nkuâl, ndrel đah nău lăp kan bah ăp doanh nghiệp, nuĭh lŏng nuih n’hâm, jêng tơm ndơ rong an rnăk ach o dŭt dơi uănh khlay.

“Nău rêh bah nuĭh ƀon lan hôm dŭt jêr jŏt ngăn, khân păng hôm khoah mpeh âk ntil ngăn jêng nău tă ơm gĭt kan lah mô nchuăt tĭng rnoh âk ma rgum tâm nău săk geh. Yor du rnăk ach o ri he ân ntop kơl dŭt âk ntil, mô dơn êng ntop kơl tơm prăk lah khân păng dơi klaih rlău ach o. Gay der bah nău plơ̆ tay ach o ri n’gâng kan ta ntŭk ntrŏng năl hŏ lĕ ntơ ma kơl ri ân kơl lĕ tât dŭt, kơl âk ntil gay khân păng klaih rlău ach o ngăn.”

Tĭng ƀư bôk nău kan gưl neh dak mpeh n’hŭch ach o, khay 12/2021 Tỉnh uỷ Dak Nông ơm n’gluh an dŏng Nghị quyết mbrô 13 mpeh pah kan n’hŭch ach o lvang năm 2021-2025, rƀŏng tât năm 2030. Nghị quyết n’gluh rnoh tât dŭt đêt 3% rnăk ach o ăp năm, đah nkual rnoi mpôl đê̆ lah 5% ăp năm, âk rlău bar tơ̆ rnoh tât kan gưl neh dak. Ntik n’hao nău khlay kan bah ăp gưl uỷ Đảng, ăp mpôl kan Đảng tâm  dâng, ăp chi bộ, ăp đảng viên êng dơi uănh khlay. Nơm geh kơt nê, 5 năm aơ, n’gor Dak Nông ơm way dơi tât n’hanh rlău trong nchrăp n’hŭch ach o, lah n’gor hŭch ach o dŭt ngăch nkual Tây Nguyên n’hanh lah ngoăy tâm  ăp n’gor hŭch ach o dŭt ngăch lam dak. Wa Ngô Thanh Danh, tă ƀư Bí thư Tỉnh ủy Dak Nông ơm an gĭt.

“Ndop ăp tơm ndơ, tĭng ƀư jăp ăp trong kơl rnoi mpôl đê̆, trong kơl n‘hŭch ach o jŏ jong, rdâk njêng ƀon  lan mhe, ƀon tĭng trong rƀŏng hun hao jŏ jong. Tĭng ƀư jăp ăp trong nchrăp tât kan gưl neh dak mpeh hun hao wăng sa rêh jêng kon nuĭh nkual rnoi mpôl đê̆ n’hanh mpeh yôk yang, an rgum lor tơm ndơ an ntuh kơl hun hao n’hanh lôch jêh buăt nthoi ntung trong ndơ dŏng, jay gŭ, neh gŭ, neh tuch tăm.”

Nău ntrŭnh mbrô 05 năm 2021 bah Ban Bí thư ntrŏng, pah kan n’hŭch ach o jŏ jong lah trong nchrăp têh, khlay, sŏng di, rloh rlău tâm rnôk tĭng ƀư rơh rgâl mhe, rdâk njêng n’hanh hun hao neh dak. Rnôk an ƀư ta Dak Nông mhe aơ an saơ, nău ƀư lĕ nuih n’hâm bah Nghị quyết bah Tỉnh uỷ tât ăp nău kan ngăn ngăn tâm dâng, ta ƀon lan hŏ kơl pah  kan n’hŭch ach o geh nău tam. Nău rgâl bah nău khlay rđău kan bah mpôl kan Đảng tâm dâng hŏ ring lam tât ăp đảng viên n’hanh nsĭt tay nău dơi ngăn ngăn tâm pah kan jut jăng ach o.