Đảng viên H’Đàn Niê (45 năm, rnoi Rđe) tâm ƀon Sút Hluốt, xã Cư Suê, nkuăl Cư M’gar, mhe geh săch ƀư Bí thư Chi bộ ƀon, năm kan 2025-2027. Yuh H’Đàn nkoch, aơ lah nau rhơn, nau rnơm bah đảng viên tâm ƀon, yơn aơ kŏ lah nau kan jâk tâm rnôk mhe aƀaơ. Êng mông chăm 1,2 ha cà phê, tiêu, ăp nar aơ, yuh ndrel ma ăp cán bộ, xã, thôn hăn ăp ngh gay rgŏ nau rgop mpeh nau rgâl Hiến pháp, mbơh kloh nau ntrŭnh bah Đảng, Ngih dak gay kônh wa gĭt ndrel tâm ban mpeh nau rnglăp xã, rnglăp n’gor, mô hôm gưl nkuăl. Yuh H’Đàn nkoch:

            ‘Gâp hăn tât ăp rnăk tâm thôn gay ma mbơh, nkoch tât ăp nau tâm rnglăp xã, tâm ndâk xã ndrel phường mhe. Rnôk aơ ri lŏ hăn nkoch trêng ân kônh wa mpeh nau rgâl Hiến pháp, gay ăp nŭih gĭt kloh mpeh nau ntrŭnh lah nau tâm di ma nau hun hao bah neh dak rnôk aơ”.

            Đảng viên mom H’Wêm Alio, tâm ƀon Sút Hluốt, xã Cư Suê mbơh, yuh H’Đàn Niê lah nŭih leo trong gay ăp băl mom kơt tĭng:

            ‘Yuh H’Đàn mbơh ân găp lăp Đảng ndrel geh lăp, rnôk aơ lah đảng viên dự bị. Dĭng lĕ nê kŏ rnơm nau kơl an, ntĭm mbơh kloh bah yuh H’Đàn Niê. Gâp mra nsôih hun hao văng sa, geh prăk âk lơn, đăp mpăn nau pah kan bah nơm tâm xã, tâm ƀon”.

            Tâm ƀon Sút M’Đưng, xã Cư Suê, nkuăl Cư M’gar, đảng viên H’Đao Êban (38 năm, rnoi Rđe) kŏ mhe geh săch ƀư Bí thư Chi bộ. Tă ƀư ăp nau kan kơt Bí thư chi đoàn, Kruanh ƀon, yuh gĭt ngăn nau jêr ndrel joi ntrong kơl an kônh wa. Năm 2018, yuh ndâk rmôt tanh njuh tâm ƀon Sút M’Đưng, rgum geh 35 nŭih bu ur râng. Rnơm mât nau nkra, ăp nŭih kŏ geh ntơm 3-6 rkeh/khay. Ndrel ma nê, yuh hôm tâm rgop ma ăp cán bộ văn hoá ndâk rmôt tur chĭng geh rlau 15 nŭih, vay tur tâm ƀon lan. Bí thư chi bộ H’Đao Êban, ngơi:

            ‘Rnơm kuăl jă oh nur, ăp băn mom bu klô ndrel ăp kônh, yơ tâm ƀon ndâk rmôt tur chĭng, tanh njuh ăp ntil. Ăp nŭih râng âk ngăn. Gâp ŭch lah bah ăp nau kan aơ, nau ơm yau bah rnoi Rđe bah hên mra lŏ geh mta ân nâp ndrel rêng tât rơh mom đŏng”.

            Xã Cư Suê, nkuăl Cư M’gar geh rlau 220 đảng viên, tâm nê geh 71 đảng viên lah rnoi mpôl đê̆ rƀŭn tâm 2 chi bộ thôn rnoi Dao ndrel 4 chi bộ thôn rnoi Rđe. Tâm nê geh 2 Bí thư chi bộ rnoi Rđe lah yuh H’Đàn Niê ndrel H’Đao Êban. Wa Phan Xuân Lực, Bí thư Đảng uỷ xã Cư Suê nkoch tât bar Bí thư mro ƀư ueh nau kan “Đảng viên hăn lor, ƀon lan tĭng ba kơi”, kơt nau ntĭm bah Wa Hồ:

            ‘H’Đàn Niê lah đồng chí aơ ri geh nau rƀŏng gĭt ueh ngăn, mro nkoch trêng bonh đă kônh wa tâm ƀon dŏng nau blau mhe tâm nau kan mât rong, tăm mât chăm cà phê, tiêu ndrel ăp ntil tơm sa play geh rnoh văng sa âk. Hôm yuh H’Đao Êban, aơ lah nŭih geh nau gơih mpeh nau kan ơm yau ngăn. Săk păng nơm hŏ bonh đă ăp yuh tâm ƀon mât nau blau tanh njuh, ndâk rmôt tur chĭng ƀư nau kan kŏ ueh đŏng, bah nê mât nau ơm, nau njroh mprơ bah kônh wa rnoi Rđe tâm nkuăl. Khân păng kŏ lah ăp Bí thư Chi bộ geh nau blau ngăn tâm ƀon, ndrel lah ntung nthoi đah Đảng ndrel kônh wa”.

            Tâm ƀon rnoi Rđe, bu ur mô êng lah nŭih mât nau ueh bah rnăk vâl ma hôm njêng n’hâm rêng bah ƀon lan. Ăp bu ur Bí thư chi bộ kơt H’Đàn ndrel H’Đao lah nŭih nkoch trêng nau ŭch ân nau hun hao văng sa, rêh jêng, mât ân ueh nau ơm yau bah rnoi mpôl, ân ƀon lan nar lơn ma sâm geh./.