N’gor Gia Lai dôl ntrôl dăng nău tĭng ƀư nău ntrŭnh mbrô 12 bah Ban Thường vụ Tỉnh ủy mpeh rdâk njêng ƀon lan mhe tâm nkual rnoi mpôl đê̆. Tĭng nê, lvang năm 2023-2025, lam n’gor nsrôih ƀư geh tay 186 thôn, ƀon di rnoh rdâk njêng ƀon lan mhe. Ta nkuâl n’har bri Chư Prông, tâm 6 năm aơ hŏ rgum geh rlău 600 rmen prăk bah bôk nău kan, trong nchrăp gay ndop rhŏ dŏng rdâk njêng ƀon lan mhe. Ƀon O Ngol, xã Ia Vê lah ngoăy tâm ăp ntŭk ntoh lư, hŏ di rnoh rdâk njêng ƀon lan mhe gưl nkuâl.

Wa Siu Huỳnh-Bí thư Chi bộ nkre ƀư kruanh ƀon O Ngol an gĭt, ƀon geh bơi 120 rnăk, đah bơi 500 nuĭh, lĕ rngôch lah nuĭh Jarai. Nơm geh tĭng ƀư bôk nău kan ƀon lan mhe jêng nău rêh kônh wa hŏ geh âk nău rgâl n’hanh ân mât nâp rnoh di.

“Ƀon mpôl hên tĭng ƀư rdâk njêng ƀon lan mhe, tât di rnoh rdâk njêng ƀon lan mhe gưl nkuâl hôm. Đah nău ƀư lah Bí thư Chi bộ nkre ƀư kruanh thôn, gâp rgŏ jă ăp nuĭh ƀon lan nsrôih mât ndray nău dơi uĕh lăng ma ƀon hŏ dơi geh. Rhơn n’hao dơi nkuâl sơch ƀư ntŭk rgum kơt mpeh “Ƀon lan mhe ntoh lư”, lĕ rngôch ƀon  lan ân nsrôih ntik n’hao, mbrôn suan ƀư trong, mir jay kloh uĕh, mprĭng uĕh, ntung trong soih aih. Lơn lah, ƀon mpôl hên hŏ geh điện mpoh ang trong ƀon đah 34 păng điện pil măt nar. Mpôl hên dŭt rhơn n’hanh n’hao êng săk, yor an kônh wa, băl mpôl ntŭk êng tât weh khâl, lĕ dĭng nuĭh rnê ƀon mpôl hên măng geh trong ƀon chrat ang n’hanh rsong hăn uĕh lăng”.