Tâm rnôk bơi tât 80 năm, yơn tahen ơm Lê Trương Thận, tâm xã Cư Êwi, nkuăl Cư Kuin hôm ngăch ngâr ơm, blau dŏng điện thoại gay mpet ân dak hoch tŏ têm êng tâm mir nơm. Măng păng hôm ang ŭnh hăn chăm kao ân sầu riêng. Ôi ơm lŏ chăm play nhãn bơi geh klih. Wa Thận mbơh, păng ndâk nau kan tâm nkuăl neh mhe Dak Lak knŭng 3 sào neh. Yơn rnôk aơ, rnăk păng geh rlau 2ha neh, geh bơi tât du rmen prak:

            ‘Gâp tă lah tahen ơm ri ma ƀư ueh nuih n’hâm tahen Wa Hồ, nsôih rklaih nau jêr, lah geh rmôt tahen ơm mô lah ntŭk ntĭm nau kan tuch tăm ƀư nau ntĭm nti ri, lah tuch tăm mô lah mât rong kđôi rânh đŏng. Nsôih lôch năm aơ geh 2 ha neh, tăm ăp ntil tơm, âk ngăn lah sầu riêng, năm aơ geh nklăp 100 tơm, mô lah kơt nhãn kŏ geh nklăp 5-6 tấn, vải năm aơ rlau 50 tơm jê̆ ntơm ân geh play hôm”.

            Tâm nkuăl Cư Kuin, n’gor Dak Lak, ăp tahen ơm geh prăk rmen kơt wa Thận âk ngăn. Tahen ơm Nguyễn Trung Thành, tâm thôn 7, xã Ea Ning, kŏ lah nŭih geh rlau du rmen prăk bah nau kan tuch tăm, mât rong:

            ‘Gâp rong ntơm 180-220 mlâm be, hôm e lah tăm 2 ha cà phê, vải, tiêu, sầu riêng, nkre rong be sŏk phân gay ntuh kơl mât chăm tơm jong năm, tơm sa play. Kŏ ntơm nŭih tahen Wa Hồ ri nơm saơ mbơm oi ma nŭih êng, n’ha ueh nkŭm n’ha sat. Bah rnôk aơ 2 năm gâp kŏ kơl 2 rnăk tahen ơm tâm thôn 7 aơ 60 rkeh mô sŏk prăk kon, gay khân păng nkre rong nkre ntuh kơl tuch tăm”.

            Êp ăp nŭih kơl an ăp rnăk n’hêl, kơl an tahen ơm rnăk ach o ndrel êp ach o, ntơm năm 2013 tât rnôk aơ, ăp gưl kan tahen ơm tâm nkuăl Cư Kuin hŏ rgop rlau 800 rkeh gay rvăt rlau 40 mlâm ndrôk ndrel têm geh 8 săm ƀŭt têm prăk ân ăp rnăk jêr jŏt, ndâk tơm prăk geh rlau 6 rmen ân 300 nŭih manh đah rnoh prăk kon dêh. Rnơm nê, tât rnôk aơ lam nkuăl hôm 20 rnăk tahen ơm ach o ndrel êp ach o.

            Tĭng wa Võ Công Tường, Groi Kruanh tahen ơm nkuăl Cư Kuin, tâm rnoh bơi tât 2.900 nŭih tahen ơm tâm Cư Kuin, geh tât n’gul lah rnoh rnăk ndrŏng. Aơ lah ăp nŭih lư, nsôih tâm nau kan văng sa rnăk vâl ndrel râng ăp nau kan tâm nkual, rgop n’hâm nơm tâm nau ndâk njêng ƀon lan mhe.

            Tâm ăp năm rlau aơ, cán bộ hội viên tahen ơm lam nkuăl hŏ pă êng rlau 10 ha neh ndrel âk rmen prăk gay ma nkra trong, rgop nau ndrel ma nkuăl pơk trong ân ƀon lan hăn ro nơih ueh. Geh rmôt tahen ơm hŏ rgop ma rhiăng rkeh prăk:

‘Ăp đồng chí leo trong, ngăn lah tâm nau kan ndâk nkra ăp nau kan văng sa, hun hao tuch tăm. Bol ma tâm moh nau kan ri ăp đồng chí kŏ ƀư ueh nau vay ơm “Tahen Wa Hồ” ndâk njêng ueh nau kan văng sa, ƀư nau dơi gay bonh đă ăp nŭih êng êng n’hao nau kan tuch tăm ndrel hun hao văng sa. Bol ma tâm moh nau kan kŏ ƀư jêh nau kan bah nơm”.

            Lôch tahen, ăp tahen ơm sĭt bah nkuăl Cư Kuin, n’gor Dak Lak hôm mât nâp nau rêh “Tahen Wa Hồ”, janh dăng, ƀư nâp nau kan, tâm kơl an. Tâm nau kan văng sa, khân păng lah nŭih leo trong lor, ƀư ndrŏng ueh, nkre rêng nuih n’hâm tâm rnglăp, tâm kơl tâm ƀon lan, rêh ueh đah nau tâm boh tahen nơm./.