Ntơm n’gul khay 4, ăp ntŭk rlu rlău đah dĭng lĕ rlău 2.00 jrô bĭch ta nkuăl têh Măng Đen, nkuăl Kon Plông, n’gor Kon Tum lĕ dơi năch pâl nđaih nchrăp lĕ an rơh rlu lễ 30/4 n’hanh 1/5. Tâm n’gŭr răm bah năch pâl nđaih Măng Đen aƀaơ, dŭt jêr gay nkoch tă aơ mô jŏ, nkual neh 7 n’glău 3 dak leng hôm e dŭt ơm, dŭt âk lah trong har jêt đah plơm n’hanh rhoai êr. Rlet rlău bôk nău njê Măng Đen mbrơi mĭn lah dơi moh êng jêng du ntŭk rgum tât tâm trong hăn uănh joi Tây Nguyên bah năch dăch ngai. Wa Nguyễn Xuân Hùng, du bu năch tât bah Thủ đô Hà Nội nđơr rnôk plơ̆ tay đah Măng Đen:

Gâp tât Măng Đen dŭt lah âk tơ̆ hôm rlet rlău đah ntŭk ntô n’hanh ndơ sa bah ƀon lan. Măng Đen đêp rmên saơ kơt du hê bu druh 18 năm gay wơt lĕ rngôch ăp bu klô ta ăp nkual bah neh dak tât ta aơ uănh ntŭk bri uĕh bah Măng Đen aơ. Du năm an nsrôih hăn tât 2, 3 rơh tât ta aơ gay răm đah ăp băl ta neh Măng Đen aơ.

3 năm dăch aơ pâl đaih Măng Đen-Kon Plông ta rnoh hao jêng âk ngăch, du năm wơt tay hang rhiăng rbăn rơh bu năch pâl nđaih. Ăp nuĭh ntuh kơl kơt năch mô rlu joi tât nkual neh aơ n’hanh aơ lah n’hâm soan an Măng Đen rgâl tĭng nar.

Gay geh tay soan wăch rgum an Măng Đen ta rup ntĭm pâl nđaih, tâm ăp năm bah năp n’gor Kon Tum lĕ kơl lor bôk năp tơm prăk an ntung trong, nuĭh kan n’hanh n’hao mpla nsơ, boăt nthoi jêng geh du trong boăt nthoi pâl nđaih tâm kơt bah dih dak đŏng. Wa Đặng Đình Toán, Kruanh jrô kan Văn hóa, Khoa học n’hanh Thông tin nkuăl Kon Plông, an gĭt, đah nchrŏng trong hun hao pâl nđaih nâp nâl hăn ndrel đah mât ndrăy n’hanh mât uĕh tay ăp nău khlay văn hóa way ơm bah ƀon lan rnoi mpôl đêt ta ntŭk, nkuăl lĕ ntơm jêng ntŭk ntô drăp ndơ rhŏ an năch.

Tât aƀaơ mpôl hên lĕ geh rlău 142 ntŭk gŭ rlu rlău. Yor tơm ƀon lan rnoi mpôl đêt lĕ gĭt mât uĕh nău geh bah rnăk wâl n’hanh jay bah nơm bơh neh hun hao pâl nđaih. Mpeh nău rhŏ n’hanh ndơ pâl nđaih mpôl hên uănh khlay tâm ndơ lŏ mir công nghệ mhe n’hanh ăp ndơ âk văn hóa, kơt chợ phiên Măng Đen, Nkual wăng sa măng, Mir nghệ thuật Măng Đen. Ndơ pâl nđaih ma mpôl hên rƀŏng tât lah ndơ pâl nđaih mpeh ndơ geh ơm.

Ndrel đah mât uĕh nuih n’hâm, nkual neh 7 n’glău 3 dak leng rnôk kăl e n’hanh pâl nđaih Măng Đen-Kon Plông nar aơ dâk bah năp nău lăp hao luh dak lêng têh rnôk n’gor Quảng Ngãi n’hanh Kon Tum ƀư nglăp nsum.

Mhe rlău, kruanh 2 n’gor Quảng Ngãi n’hanh Kon Tum lĕ săch Măng Đen gay ƀư nar pah kan bôk năp tâm nchră nău nglăp nsum n’gor. Tâm âk nkô̆ nău dơi tâm nchră ri nău n’hao nkra quốc lộ 24 n’hanh ntrôl ngăch nău ntuh kơl ndâk ƀư trong cao tốc dơi 2 n’gor tâm ban ŭch âk. Wa Bùi Viết Hà, Kruanh Rmôt kan pâl nđaih Măng Đen, an gĭt, aơ lah ndơ dŭt dơh an trong pâl nđaih bri-dak lêng n’hao soan wăch rgum:

Chính phủ an nglăp nsum n’gor Quảng Ngãi-Kon Tum, mpôl hên lah ăp nuĭh pâl nđaih ta Măng Đen dŭt rhơn. Măng Đen ntŭk ntô geh ta nklang. Măng Đen lŏ nklang pâl nđaih bah n’gor mhe jêng mpôl hên nsing nơm mbra hun hao. Ăp nuĭh ƀư pâl nđaih an nchrăp an nơm du trong nchrăp an ntuh kơl bah n’hâm soan tât prăk kaih gay rgâl muh măt ntŭk ntô bah nơm. Rmôt kan pâl nđaih mpôl hên dôl mĭn trong mkra, nchrŏng trong na nê̆ gay ngăch tĭng trong bah nkual neh aơ.

Bah nkual neh săr jêh tâm lơh tâm su, Măng Đen-Kon Plông aƀaơ lĕ n’gut ta săk nơm du rup gui mhe đăp mpăn, dăch dêh n’hanh soan dăng ktang. Ăp trong hăn ta nkual neh 7 n’glău 3 dak leng lĕ âk răm, rĭk rĭk jâng năch hăn. Bah nău ntrŭnh nglăp nsum 2 n’gor Quảng Ngãi n’hanh Kon Tum, Măng Đen-Kon Plông dôl geh nău lăp gay hao luh dak lêng têh mĭn lah nơm ta rup gui ntĭm pâl nđaih nkual n’hanh lam ntŭr neh.