N’gul lâng nđĭr bah cà phê, cao su, tơm sa play, ba lŏ n’hanh mô knŭng mông nar pah kan dŭt n’hâm ndăn bah kônh wa Xơ Đăng ta xă Đăk Ui, nkuăl Đăk Hà, n’gor Kon Tum, đêt nuĭh mĭn ntŭk aơ ta tâm lơh tâm su mprơh Mỹ tă lah ntŭk tâm lơh hô ngăn. Bah năm 1960 tât năm 1975 tahen ƀon lan xă Đăk Ui lĕ lơh 289 rơh  mprơh luh nău tâm lơh bơi 900 nuĭh rlăng, pănh tŭp 6 bôk ndeh păr, nkhĭt 6 ndeh tahen...

Wa A Bok, jay ta thôn Kon Pong, năm aơ 75 năm deh, tă ƀư Chủ nhiệm Ủy ban kiểm tra N’gor ủy Kon Tum ndĭn ndăn: rnôk 9 năm wa hăn ndơ̆ piăng an cán bộ cách mạng gŭ tâm nkual. Têh wa tĭng me bơ̆ djôt phao lơh rlăng. Rlet rlău njê, roh khuch, khĭt lơ ntop tay ryơk nău khlay bah đăp mpăn:

Rnôk nĕ lĕ rngôch rwê an tâm lơh gay rklaih đăp mpăn neh dak, piăng phe mô tŏng sa. Khay aơ rlău khay êng mô geh bôh, kho ao mô tŏng nsoh. Aƀaơ piăng phe sa kah. Aơ lah điện thoại, ndeh măy geh ndeh ô tô tay. Rgŏ năp gâp nsing nơm mbra hun hao âk lơn tay.

Mât uĕh nău way ơm janh dăng tâm rơh tâm lơh tâm su mprơh rlăng rŭn in, 50 năm bah năm Đảng bộ, n’gâng kan ƀon lan n’hanh nuĭh ƀon lan xă Đăk Ui, lĕ ƀư tay âk nău geh têh mhe tâm pêt mât jêh têl tâm lơh tâm su n’hanh hun hao wăng sa-rêh jêng. Bơi 7.000 nuĭh ƀon lan bah xă đah rlău 90% kônh wa rnoi mpôl đêt nuĭh Xơ Đăng lĕ mât nâp n’hanh mât uĕh ngăn nuih n’hâm tâm rnglăp ndrel soan, du nuih n’hâm ndâk njêng nkual ntŭk nsing nâp tâm lơh tâm su kăl e lơ ndrŏng uĕh.

Wa A Nghĩa, Groi Bí thư Rnâng kan Đảng ủy xă Đăk Ui, an gĭt, knơm dŭt n’hâm kơt dŏng khoa học, công nghệ, bơi 1.400 ha tơm ăp năm, 1.000 ha tơm công nghiệp an săk geh, uĕh kah nar lơ âk kơl nuĭh ƀon lan geh prăk đăp mpăn. Ndrel đah nĕ nău râng hun hao wăng sa bri nsĭt tay an nuĭh ƀon lan geh âk. Năm 2022 xă Đăk Ui lĕ geh tâm di thôn ƀon mhe n’hao prêh. Wa A Nghĩa, mĭn lah, nău rêh bah nuĭh ƀon lan xă Đăk Ui dôl rgâl uĕh tĭng nar:

Cán bộ n’hanh nuĭh ƀon lan xă Đăk Ui janh dăng dôl nsrôih pah kan nkra njêng rgâl mhe tâm hun hao wăng sa-rêh jêng. Aƀaơ trong hăn tât 8 thôn ƀon tâm xă n’hanh nkual nkra njêng lĕ dơi rgâl bê tông. Ndrel đah tơm ba lŏ way ơm, nuĭh ƀon lan dôl hun hao âk rnoh neh tơm cà phê, tơm tiêu nkre pơk hvi rnoh neh mât tăm tui ka n’hanh mât rong ndrôk rpu. Bah nchrŏng trong bah n’gâng kan ƀon lan, âk hợp tác xã n’hanh êng nuĭh lĕ n’hanh dôl ndâk njêng ăp ndơ ntĭt mpơl êng gay n’hao khlay ndơ lŏ mir.

Ndrel đah hun hao wăng sa-rêh jêng, 50 năm bah năp Đảng bộ xă Đăk Ui uănh mro, mât rong tât trong kan ndâk njêng Đảng n’hanh n’gâng kan ƀon lan nâp dăng. Aƀaơ xă geh bơi 300 đảng viên, tâm nĕ 3/4 lah nuĭh rnoi mpôl đêt Xơ Đăng. Mât uĕh nău way ơm janh dăng tâm lơh tâm su mprơh Mỹ, ăp rơh kơn cán bộ đảng viên bah xă Đăk Ui lah nuĭh hăn lor gay nuĭh ƀon lan tĭng kơt. Đăk Ui ntô̆ n’hao rnôk geh 4 nuĭh kon ưu tú nuĭh Xơ Đăng ƀư Ủy viên ban Thường vụ N’gor ủy Kon Tum. Tâm nĕ, wa Y Vêng, tă ƀư Ủy viên Trung ương Đảng, Bí thư N’gor ủy, Kruanh mpôl đại biểu Quốc hội n’gor Kon Tum. Wa Chu Văn Hiền, Kruanh Ban Tuyên giáo n’hanh Dân vận nkuăl ủy Đăk Hà, an gĭt, nkual ntŭk nsing nâp Đăk Ui aơ dôl nâp choat, nsing nơm hăn lăp tâm lvang mhe:

Xă Đăk Ui mât ndrăy nău khlay văn hóa way ơm bah ƀon lan nuĭh Xơ Đăng ntŭk aơ hăn ndrel hun hao pâl nđaih gay mkra nău kan n’hanh n’hao nău geh an nuĭh ƀon lan. Nĕ lah lŏ mir kơt dŏng công nghệ mhe hăn ndrel nkret njêng n’hanh ntŭk tăch ndơ. Tâm lvang ƀư tĭng nău nglăp nsum xă đêt dơh ngăch tŏng ăp n’gâng kan tĭng nău ntrŭnh bah Trung ương n’hao blău ntĭm rđău n’hanh soan rdâng bah Đảng bộ xă, n’hao uĕh bah rmôt cán bộ đảng viên gay tâm di nău đă nău kan.

N’gul rach năm lĕ rlău, bom ndrăk tâm lơh aƀaơ hôm e tâm bôk rngok, yơn nuih n’hâm cách mạng hôm e têh n’hanh nuih n’hâm rŏng dak dŭt n’hâm bah tahen n’hanh ƀon lan Đăk Ui hôm e mro. Bah nkual neh tă geh âk bom mĭn ndrăk nsiu lơh chrai, Đăk Ui lĕ rêh têh dăng tay, hao jêng ntŭk ang hun hao wăng sa-rêh jêng nkual rnoi mpôl đêt bah n’gor Kon Tum. Ăp njoat jâng rklaih đăp mpăn kăl e, aƀaơ lĕ rgâl jêng ăp njoat jâng ndâk njêng, njoat jâng bah nău nsing nơm, mpŏng ŭch n’hanh ŭch hao. Đăk Ui dôl nchih tay ăp plơk trong mhe tâm trong hao tât rgŏ năp.