Đah rlău 650 rmôt ŭch êng kan, tâm khay 3 mhe rlău, druh ndăm lam n’gor Lâm Đồng lĕ rgŏ jă soan druh ndăm mbơh ƀư 500 ndơ ƀư druh ndăm, dĭng lĕ khlay 4,1 rmen prăk. Tâm nĕ, rƀŏng tât ntrong leo tâm rlong ndrel ty jut jăng ngih rông mpông sat, đah nău rgŏ jă ndâk ƀư mhe 12 mlâm jay, ntop kơl 160 nar luh pah kan, dĭng lĕ khlay ntop kơl rlău 800 rkeh prăk. Ƀư bơi rhiăng rơh hăn kan nar pơh uĕh nđĭr, nar hô ngăn ndâk njêng thôn ƀon mhe wăch rgum bơi 13.500 nuĭh đoàn viên, druh ndăm râng. Rlău ma nĕ, ăp gưl bộ Đoàn n’gor Lâm Đồng lĕ ƀư 137 rmôt druh ndăm ŭch êng kan “Bình dân học vụ số”, kơl bơi 10.000 nuĭh ƀon lan gĭt tât blău mrô.

Yuh Trần Anh Tú, Bí thư Thanh đoàn Đà Lạt an lah, ăp săk rnglăy aơ lĕ ƀư kloh na nê̆ nău ƀư hăn lor bah druh ndăm tâm râng hun hao wăng sa rêh jêng ta ntŭk.

Rlău ăp nău ƀư aơ ri mpôl hên dŭt răm rhơn yor nău rƀŏng tât dŭt n’hâm bah ăp băl đoàn viên. Nău nĕ mĭn lah druh ndăm uănh khlay lĕ rlău n’hanh ntô̆ n’hao mpeh nău way ơm bah ăp rơh hăn lor. N’hanh rlău ăp nău ƀư kơt nĕ ăp băl mom djôt dơn mro, nsrôih n’hanh dŭt n’hâm lơn tay tâm trong kan, nti nsơm, pah kan gay nsơr soan ndâk njêng ƀon tơm, neh dak.

Tĭng nô Trường Văn Tùng, cán bộ N’gor đoàn Lâm Đồng, đah trong ƀư mĭn mhe, nkô̆ nău ngăn ngên, ăp nău ƀư lĕ nta an rêng hvi têh dăng tâm druh ndăm n’hanh nsum mpôl. Tă bah nĕ, mât uĕh săk rnglăy nuih n’hâm rdôl hăn lor, lĕ đah nău kan bah druh ndăm, jêng mông nar tâm rlong n’gŭr răm n’hanh wăch rgum âk tâm đoàn viên, druh ndăm rchong tâm lam n’gor:

Tâm năm 2025, mpôl hên rƀŏng trong mbra ƀư đêt ngăn 4 rơh hăn pah kan âk ngăn ndâk njêng thôn ƀon mhe n’hanh Nar pơh uĕh nđĭr gay m’hâm ƀư nău kan dơi ăp rơh, geh nkô̆ nău. Aơ lah ăp nău ƀư lĕ geh bah jŏ n’hanh mpôl hên mât ƀư uĕh lơn tay./.