Tâm mông nar n’gŭr răm bah nteh n’gôr n’hanh nteh tŭr chĭng goh gông văn hóa Lào, nuĭh ƀon lan n’hanh năch pâl nđaih dơi djăt uănh ăp nău njroh mprơ kơt tŭr chĭng, goh đơn T’rưng, n’hôm wa n’hanh nău njroh Lăm vông rbân r’ên, nshơ mpơl kôp kho ao tanh bôk nău Hương sắc cao nguyên. Ăp nău njroh kơt Hoa đẹp Chăm pa, Sao Ken Fai, Sa La Vắn, I Kơng Đươn Đao... kuăl jă năch nglăp ndrel đah ăp bu klô, bu ur Lào.

Ndrel đah nĕ lah ƀư rsach dak geh nkô̆ nău ndơ̆ yan wai, dăn mih jŭr nđik rmưn rbăn ntil tơm si chăt hon. Aơ lah du nău ƀư mpơl nău mbah rhơn bah nuĭh Lào, dăn mpŏng nuĭh mbra jut rao ăp ntil nău mô lap n’hanh wơt dơn ăp nău uĕh lăng, hơm răm tâm năm mhe.

Tât Dak Lak pâl nđaih tâm rơh ƀư lễ aơ, nô Đỗ Hoàng Việt, ta n’gor Phú Yên nkoch:

Nar aơ gâp dŭt hĭng rhưng rnôk ƀư ngăn du bôk nău rgum rsach dak bah nuĭh Lào rêh ta nkual Buôn Đôn bah Dak Lak. Gâp saơ nkual neh Dak Lak dŭt uĕh, aơ lah ngoăy tâm âk ntŭk tât dŭt âk wăch rgum năch, lơn lah bu năch tât bah nkual neh duyên hải kơt Phú Yên, Bình Định.

Rgum rsach dak n’hanh ƀư ngăn văn hóa Lào lah ngoăy tâm ăp nău ƀư văn hóa ƀư ta Dak Lak di nkah gĭt 50 năm kơp dơn ngoăy neh dak. Wa Nguyễn Lê Thanh Thảo, nuĭh mpôl rdâk ƀư an gĭt:

Mpôl hên săch ăp nău ƀư răm m’ak, uĕh ngăn gay nkoch tât ƀon lan Dak Lak n’hanh bu năch. Aơ lah ngoăy tâm ăp nău ƀư ma nuĭh ƀon lan n’hanh bu năch dơi râng n’hanh răm rlưn ndrel, mô knŭng uănh ma hôm dơi nglăp nơm tâm lĕ rngôch ăp nău ƀư kơt nĕ, bah nĕ geh nău uĕh reh n’hanh ntŭk tât mhe an rup gui pâl nđaih Dak Lak.

Âk nău ƀư ngăn văn hóa dơi ƀư ta nklang nkual ƀon têh Buôn Ma Thuột n’hanh ăp nkuăl ta Dak Lak. Văn hóa rnoi nuĭh Thái, nuĭh Lào dơi nuĭh ƀon lan tơm nkoch tât năch pâl nđaih tă bah ăp ndơ sa, chĭng gông n’hanh nău pâl rlưn way ơm. Nău ƀư mpla nshơ ăp ndơ OCOP; tour Rafting wah plŭng rlău dak leng, tour ndeh hăn trong rgăn bri rgăn dak leng; Nar rgum Khing khí cầu dơi ăp nkual, ntŭk pâl nđaih ƀư đah trong têh.

Ta Dak Lak năm aơ hôm geh rgâl mhe âk đah bôk nău kan tâm nđŭr văn hóa, njroh mprơ đah n’gor Mondulkiri (Campuchia) n’hanh bôk nău ƀư tâm nđŭr nghệ thuật Dak Lak-Phú Yên tâm rgop đah nsơ mpơl ka ngừ đại dương, wăch rgum tât râng bah nuĭh ƀon lan n’hanh năch. Wa Đỗ Hoàng Việt, ta n’gor Phú Yên an gĭt:

Băng: Êp tât 2 nkual geh nău nglăp nsum jêng gâp ŭch geh nău ƀư ngăn mhe mhan lơn. Gâp lĕ hăn Buôn Ma Thuột dŭt âk tơ̆ hôm yơn rơh aơ gâp hăn đah du nuih n’hâm êng n’hanh gâp saơ geh du nău êng nĕ dŭt mhe yơn dŭt dăch dêh đŏng.