Đảng bộ xã n’har bri Rờ Kơi, nkuăl Sa Thầy geh 13 chi bộ đah 176 đảng viên, tâm nê geh 6 chi bộ thôn rnoi mpôl đê̆. Âk năm ntơm nau ntĭm bah n'gor uỷ Kon Tum ndrel nkuăl Sa Thầy, Đảng uỷ xã ƀư năn ăp nkô̆ ntĭm nti ndrel ƀư tĭng nau Wa tât ăp chi bộ thôn, ƀon. Wa A Êl, bu ranh thôn Gia Xiêng, mbơh, mô êng 14 đảng viên tâm chi bộ geh nau ton ntĭm nti ƀư tĭng nau Wa ma n’ăp ma ƀon lan kŏ ƀư êng tĭng nau kan bah Wa bah nau kan ngăn. Tĭng wa A Êl, nau kơt tĭng Wa kơl an đảng viên leo trong, ƀư ueh nau kan ndrel ƀon lan mât chăm pah kan jan sa tĭng nau ntrŭnh, pháp luật bah Đảng, ngih dak:

            ‘Đảng viên tâm chi bộ mro leo trong hăn lor tâm ăp nau kan gay kônh wa kơt tĭng. Ăp nau hun hao văng sa, rnăk vâl bah Đảng viên tâm thôn geh nau tam, đảng viên kơl an kônh wa tơm si tăm, kon ntul gay mât rong hun hao văng sa. Kônh wa tâm thôn kŏ gơih pah kan jan sa, nsôih ƀư tĭng nau ntrŭnh bah Đảng, pháp luật bah Ngih dak. Kơt tĭng nti nau Wa tă bah nau kan jê̆ kơt lah răk gŭ kloh ueh tât nau kan têh kơt tâm rnglăp tâm ƀon lan”.

Gay rêng dăng nau kan ntĭm nti ndrel ƀư tĭng nau rêh, nau kan bah Hồ Chí Minh, 10 năm rlau aơ n’gor Kon Tum hŏ ƀư ngăn, ndâk nkô̆ nau tâm ban ma nau kan ngăn ndrel nau kan chính trị bah n’gor ân ăp năm, ăp rnôk gay tâm ban, geh săk tam. Ntơm năm 2023 tât rnôk aơ lah “Ntĭm nti ndrel ƀư tĭng nau mĭn, nau rêh, nau kan Hồ Chí Minh ân rjăp, gơih rgop nau ndâk njêng n’gor Kon Tum hun hao ngăch ndrel nâp”. Đại tá Lê Minh Chính, Chính uỷ rđau tahen Biên phòng n’gor Kon Tum, mbơh nau kan:

            ‘Gâp tâm rgop ma ăp nau kan rgŏ jă, ăp nau ntrŭnh tĭng nkô̆ kơt nau ntrŭnh mrô 847 bah Quân uỷ Trung ương mpeh nau ƀư tĭng nau rêh bah tahen Wa Hồ, nsôih rdâng nau ƀư nau kan êng mô tâm di tâm rnôk mhe. Nau rgŏ jă ƀư ueh nau vay ơm, ƀư nau kan blau bah nơm, tâm di tahen Wa Hồ tâm rnôk mhe. Tâm rnôk ƀư nau kan ân n’hao nau mêt uănh, ƀư rjăp ăp ntŭk kan đảng, đảng viên nkre ƀư nsum ma nau kan rgum tâm ăp nau rgâl mhe tĭng nau ntrŭnh Đảng bộ nchrăp luh”.

            Ƀư tĭng nau rgŏ jă “Ntĭm nti ndrel pah kan tĭng nau mĭn, nau rêh, nau kan Hồ Chí Minh, tât rnôk aơ, n’gor Kon Tum hŏ ndâk geh 2.760 nau kan ueh, nau kan săk tam. Ngăn lah kơt ăp nau kan: ƀư rƀŭn rgum nau mĭn geh nsum ma ntĭm nti ndrel pah kan tĭng Wa; ntĭm nti kơt tĭng Wa mpeh nuih n’hâm rŏng kơl an, tâm kơl hun hao văng sa, rêh jêng, jut n’huch ach o, ndâk ƀon lan mhe, mât nau mĭn kan, ndâk ndrel n’hao nau rêh văn hoá...wa Bùi Thị Vui, Groi Kruanh Ban tuyên giáo ndrel Dân vận n’gor uỷ Kon Tum, lah rjăp:

            ‘Ƀư nau rđau mrô 05 hŏ ndơn geh nau ntĭm nti kơt tĭng ndrel râng nau rjăp ngăn, nsôih ngăn bah ăp gưl cán bộ, đảng viên, ƀon lan tâm lam n’gor. Bah nê njêng dơi nau rgâl mhe ueh ngăn tă bah nau mĭn tât nau kan bah ăp gưl uỷ, n’gâng kan, ntŭk kan, rmôt kan. Nau ƀư kan bah rmôt cán bộ, công chức nar lơn khoa học, săk tam, tâm dăch dơh ma nŭih ƀon lan”.

            Ntơm nau ntĭm nti ndrel ƀư tĭnh nau Wa, 10 năm rlau aơ tâm n’gor Kon Tum hŏ geh âk rmôt kan, êng nŭih ntoh lư tâm ăp nau kan geh rnê, nkhôm. Lam n’gor geh 17 rmôt, nŭih geh Thủ tướng Chính phủ pă bằng khen, 9 rmôt, nŭih geh Ban Tuyên giáo Trung ương pă Bằng khen...nau ntrŭnh ƀư săk tam nau rđau bah Bộ chính trị gưl XII “Mpeh nau ntrŭt dăng nauy ƀư ntĭm nti ndrel pah kan tĭng nau mĭn, nau rêh, nau kan Hồ Chí Minh” kŏ lah nau tơm gay n’gor Kon Tum ndăn nau mĭn, nau rêh, nau kan bah Wa săch dơi ăp nau kan tơm khlay, ueh mhe tâm ăp nau ƀư nau dơi bah nkô̆ nau, nau kan hun hao tâm 10 năm ma aơ”./.