Yuh Phạm Thị Phương Đông-kế toán Ngih sam ƀŭt Tiểu học Y Ngông, nkual têh Buôn Hồ (n’gor Dak Lak) lĕ 5 năm aơ rêh nsum đah nău ji leh. Nkre pah kan ta ngih sam ƀŭt, nkre ăp pơh hăn săm leh ta Ngih dak si Đa khoa nkual têh Buôn Hồ, yuh lah n’gâng tơm nuih n’hâm bah rnăk wâl jêt rnôk sai yuh ƀư mir n’hanh hăn manh kan bu ngai wâl. Dơn ndrôm sam ƀŭt ntêm nkrem khlay 5 rkeh prăk bah bôk nău kan “Búa liềm vàng”, yuh Đông mô dơi mpôn nău rngot:

Ndrôm sam ƀŭt búa liềm vàng aơ kơl oh âk ngăn, oh năp rwăt dak si jêng oh dŭt lah uĕh. Knơm nĕ ƀư săk oh dơh oi ŏk r’ah, geh nuih n’hâm njrăng rdâng đah kop ji.

Nău nkoch bah rnăk wâl đảng viên Y Klơn Niê ta ƀon H’Né, xă Ea Yông lah nău saơ uĕh an geh săk rnglăy ngăn bah bôk nău kan “Ndrôm samƀŭt ntêm nkrem Búa Liềm vàng”. Đah 2 kon jêt dôl năm hăn nti, ur sai nô knŭng geh 2 sào lŏ n’hanh du lôk neh tăm cà phê. Mbak jâng wăng sa jêng nô Y Klơn Niê hăn kan ngai, hôm yuh H’Puê Niê ur nô-ƀư phung pah kan ngai jay 10 km. Năm 2024, rnăk wâl nô dơi Thị ủy Buôn Hồ an ndrôm samƀŭt ntêm nkrem khlay 12 rkeh prăk. Bah ndrôm samƀŭt aơ, yuh Puê rwăt 4 mlâm sŭr me. Jêh 4 khay mât rong, sŭr rơh bôk năp nsĭt tay 24 rkeh prăk. Knơm nĕ, rnăk wâl yuh geh prăk pơk hvi tay mât rong, đăp mpăn nău rêh.

Gâp lah uĕh ăp đồng chí lĕ kơl gâp tâm nău kan mât rong sŭr. Na nê̆ Thị ủy lĕ ntop kơl prăk ntêm nkrem “Búa liềm vang” đah rnoh prăk 12 rkeh prăk gay rnăk wâl gâp rwăt sŭr mât rong. Ntrong ƀư mât rong sŭr aơ tâm di đah nău rêh bah rnăk wâl mpôl hên. Bah kơi aơ, rnăk wâl mpôl hên mbra hun hao mât rong sŭr gay nău rêh đăp mpăn lơn.

Bah kơi ăp ndrôm sam ƀŭt ntêm nkrem nĕ lah ndrel ty luh êng yơn nâp nâl bah tĭng cán bộ, đảng viên. Yuh Nguyễn Thị Trúc dôl pah kan ta Ban Tuyên giáo n’hanh Dân vận Thị ủy Buôn Hồ an gĭt, du hê tâm ngih pah kan ntêm nkrem êng, geh rnôk 5 rkeh, 3 rkeh, mô lah 6-7 rhiăng prăk, tĭng tâm nău geh bah ăp nuĭh, gay dơi ndrel ty kơl ăp nău rêh jêr jŏt.

Gâp saơ bôk nău kan aơ geh nău mĭn dŭt jru, dŭt uĕh. Tâm rnôk mpôl hên rgop ndoh ndơ bôl dŭt jêt yơn geh âk nău khlay đah ăp đảng viên geh nău rêh dŭt jêr jŏt, n’hanh tă bah bôk nău kan aơ, ăp đảng viên geh nău rêh jêr jŏt dơi ƀư wăng sa blău, rklaih luh ach o n’hanh hao sâm geh.

Wa Nguyễn Văn Út-Kruanh Ban Tuyên giáo n’hanh Dân vận Thị ủy Buôn Hồ, n’gor Dak Lak an gĭt ntrong ƀư “ndrôm sam ƀŭt ntêm nkrem Búa liềm vàng” dơi rgŏ jă bah năm 2023, ta nuih n’hâm nti n’hanh ƀư tĭng nău ntĭm bah Wa Hồ, rêh ntêm nkrem n’hanh tâm pă. Cán bộ, đảng viên rgop êng gay ndâk ƀư prăk nkrem, kơl ăp đảng viên mâp jêr jŏt, lơn lah ăp đảng viên rnoi mpôl đêt, rêh ta nkual jru ngai. Nguyễn Văn Út nkoch:

Nău khlay tâm rnôk jao an ri geh 3 ƀon Tring 1, 2, 3 bah phường An Lạc, ta nĕ geh đảng viên lah nuĭh rnoi mpôl đêt jêr jŏt yơn ma khân pơng dun dơn rnoh ndrôm samƀŭt ntêm nkrem aơ n’hanh khân pơng đă jao an đảng viên lah nuĭh rnoi mpôl đêt ta ăp xă geh nău rêh jêr jŏt. Tă nău nti n’hanh ƀư nău ntĭm bah Wa Hồ, đah nuih n’hâm bah cán bộ đảng viên tâm rŏng, kơl ndrel lĕ jêng soan rêng hvi tâm cán bộ đảng viên bah lĕ rngôch nkual têh.

Knŭng jêh 2 năm mbơh ƀư, lam nkual têh Buôn Hồ lĕ an 175 Ndrôm sam ƀŭt Búa liềm vàng đah dĭng lĕ 769 rkeh prăk. Ăp ndrôm samƀŭt nĕ lĕ kơl đảng viên ntuh kơl nkra njêng, rwăt ntil, săm ji n’hanh đăp mpăn nău rêh. Ăp ndrôm samƀŭt mô knŭng djôt nău khlay ndoh ndơ, ma hôm nuih n’hâm ntrŭt nsôr khlay, ntop tay n’hâm soan gay hao tâm rnôk jêr jŏt. Wa H’Blă Mlô, Groi Bí thư rnâng kan Thị ủy Buôn Hồ, n’gor Dak Lak an gĭt:

Ntrong ƀư aơ rêng hvi tât nuĭh dơi dơn kơt rmôt đảng, đảng viên tâm nău nti ƀư tĭng nău mĭn Hồ Chí Minh. Jêh rnôk dăp ntŭk kan hành chính, ăp ndơ dơi Ban Thường vụ Thị ủy tâm năm mhe rlău ƀư uĕh ri bah kơi aơ mbra dơi ăp xă phường mbơh ƀư tay, m’hâm ƀư ntrong ƀư nĕ tât đah ăp đảng viên ach o.

Du ndrôm “Samƀŭt ntêm nkrem Búa liền vang” lah nău an saơ uĕh an nuih n’hâm tâm rnglăp, tâm pă n’hanh lĕ đah nău kan tâm rmôt cán bộ, đảng viên Thị ủy Buôn Hồ, n’gor Dak Lak. Mô knŭng kơl mpeh drăp ndơ, ntrong ƀư hôm rdâk hao nău nsing nơm, nuih n’hâm hao n’hanh mpŏng rlet rlău jêr jŏt hao tâm ăp đảng viên. Bah ăp nău ƀư ngăn ngên n’hanh nău uĕh nĕ, nău mĭn, nău rêh, pah kan Hồ Chí Minh lĕ n’hanh dôl dơi rêng hvi têh dăng, jêng trong ƀư khlay, rgop ndâk njêng rmôt Đảng nar lơ kloh uĕh, nâp dăng ntơm tă bah dâng./.