Deh tâm du rnăk geh nău way ơm cheh tanh, bah jêt H’Jih Ayun lĕ dơi u n’hanh mê̆ trêng ntĭm tĭng trong rse brai, ndrŭm brai bôk năp. Nteh rpăy rep rep, dak mbŭk ntrăm bah n’ha si, reh si, tanh cheh ndrang geh nău nkoch... lĕ rngôch lĕ lăp tâm nuih n’hâm, mât nău rŏng nâp đah cheh tanh.

Nău rêh joi sa đah mir ba mô ƀư H’Jih Ayun ŭch tay. Ăp klong măng, đah ŭnh kađen pring, wa hôm nsrâng đah rpăi tanh, mpang ty hăr blău ndơ̆ brai-kơt dôl tanh way ơm, nău nsing nơm, nău ton êng: “An mât dơi nău cheh tanh bah rnoi nuĭh nơm”. N’hanh mô knŭng dơi mât nău kan, wa lŏ nthoi jao nău kan cheh tanh an rơh bah kơi.

Nghệ nhân H’Jih Ayun nkoch: knŭng ŭch nuĭh druh ndăm ŭch đah nău uĕh ơm Êđê, wa nchrăp ntĭm dŭt n’hâm. Bơi 2 rach năm bah năp, wa lĕ ntĭm nău kan an rhiăng nuĭh nti, âk nuĭh tâm rnoh nĕ lĕ ƀư êng, tăch êng ndơ, rgâl nău geh, rgop rêng hvi nău uĕh ơm tât nsum mpôl.

Năm aơ gâp lĕ 67 năm hôm. Bah năp đaơ gâp râng ntĭm nău kan tâm hợp tác xã cheh tanh, n’ăp tâm n’hanh bah dih nkuăl. Gâp ntơm ntĭm ta Ntŭk ntĭm nău kan bah n’gor bơh năm 2008, rĭng du năm 2 jrô. Aƀaơ gâp mô nkah gĭt gâp lĕ ntĭm ndâng âk jrô tay, knŭng gĭt năm e lĕ ntĭm 3 jrô ta nkuăl nơm hôm.

Đah nghệ nhân H’Jih, du păng nah lah du nău nkoch. Cheh ndrang mô knŭng gay ndrơh nsơr ma hôm mbơh êng nău uĕh ơm. Bah trong sŏng, rup rwang, rup blon, tât rup tơm si, sĭm och... lĕ rngôch geh nkô̆ nău êng: nău tâm di, soan dăng, nău tĭng đah bri dak. Đah mpang ty blău, măt ang n’hanh play nuih rŏng nău kan têh, wa mô knŭng tanh jêng ăp păng nah uĕh ma hôm tanh jêng nău rŏng nău uĕh ơm n’hanh nău ntô̆ n’hao rnoi nuĭh. Nghệ nhân H’Jih nkoch:

Mpôl hên lah ăp nuĭh bu ur ntĭm naư kan, mâp mô đêt jêr jŏt-bah trong hăn ngai, ndeh klư klach nji.. yơn mpôl hên hôm e răm yor dơi ƀư nău kan aơ. Gâp lah uĕh Ngih dak, Ntŭk ntim nău kan bah n’gor n’hanh ăp nkuăl lĕ nta an gâp n’hanh âk nghệ nhân êng dơi geh ntĭm nău kan cheh tanh an rơh bah kơi. Nău răm têh ngăn dơi mât nău kan aơ, mât an ăp kon se jêt tâm ƀon lan.

Ăp păng nah tanh mô knŭng uĕh ma hôm geh âk dak rhal, nău nsrôih n’hanh n’ăp nuih n’hâm ntô̆ n’hao. Ăp păng nah geh rnôk roh du pơh, đê̆ đŏng du khay gay jêh, yơn nău khlay văn hóa pơng nsĭt tay ri hôm e mro. Nghệ nhân H’Jih rwê: m’hâm ƀư gay cheh tanh mô knŭng ntoh luh tâm lễ hội, ma hôm lah ndơ dŏng ăp nar, lah ndơ tâm an nkah ndray an năch rnôk chop khâl ƀon lan Êđê.

Gâp mpŏng ăp jrô nti bah gâp mbra tanh tay, mpla nsơ n’hanh trêng ntĭm an rơh bah kơi, lơi an nău uĕh aơ roh chuêl. Nuĭh ranh mô hôm ri nuĭh mbra mât ndrăy? ăp băl mom nung nar hăn tâm mir, măng mô dah ndăn gŭ tanh.

Tâm trong mât ndrăy nău ueh ơm, geh âk kon nuĭh pôn êng kơt wa H’Jih Ayun-mô nteh n’grâm, mô ntưih, yơn lŏ luh ang đah nău nâp nâl, nău rŏng n’hanh ntô̆ n’hao rnoi mpôl đêt. Ăp păng nah tanh dơi tanh jêng mô knŭng lah ndơ ƀư I ty, ma hôm boăt nthoi bah nău way ơm, ri lah nău mbơh nău uĕh way ơm njuăl tât let bah kơi.

Tâm trong n’hâm bah rơh mhe, rnôk ăp nău khlay way ơm geh roh chuêl, ri nău dŭt n’hâm bah ăp nghệ nhân kơt wa H’Jih (ta xă Ea Tul, nkuăl Cư M’gar, n’gor Dak Lak) tơm rse brai chăng, boăt nthoi lĕ rlău đah aƀaơ, mât nuih n’hâm rnoi nuĭh. Mpŏng, nteh rpăy tanh mbra n’gôr ngai đah ăp ƀon lan tâm ăp măng ngo-gay nău uĕh way ơm Êđê rêh uĕh tay, rêng hvi n’hanh dơi nthoi tay tă bah tĭng rơh kon sau bah kơi.