Rgum tăch ndơ OCOP nkual Đông Bắc n’gŭr răm đah rlău 250 ndrơng ndơ, mpla tăch ăp ndơ OCOP n’hanh ndơ lŏ mir, tui ka bah n’gor Quảng Ninh n’hanh âk n’gor, nkual ƀon têh tâm dak. Nsong uănh ăp ndrơng ndơ, yuh Mai Chi, an gĭt:

Ăp rơh rgum mpla nsơ ri gâp saơ uĕh, rup gui nar lơ mhe, ăp ntil ndơ nar lơ âk, âk ndrơng ndơ uĕh kah đăp mpăn lơn.

 Ndrel nău mĭn đah yuh Mai Chi, nô Lê Thế Trung, an gĭt: aƀaơ tâm ăp trong siêu thị geh bôk nău kan, ndrơng ndơ, rpăi tăch ndơ OCOP, bah ndơ biăp, bum, play kloh uĕh, ndơ sông sa tât ndơ dŏng geh tu tơm, ntŭk nkra njêng na nê̆ dơi koih mã QR..., jêng nuĭh dŏng dŭt đăp mpăn săch:

Bah năp đaơ, bah ndơ dŏng tât ăp ndơ công nghệ, ngih gâp way rwăt ndơ nglăp rwăt. Aƀaơ ta ntŭk geh ndơ OCOP ndơ nkra njêng tâm dak yor rnoh khlay tâm di, uĕh kah nar lơ dơi rgâl mhe n’hanh tu tơm nkra njêng jêng gâp săch rwăt. Ngăn lah ăp ndơ khlay dŭt đăp mpăn rwăt gay rhŏ nău ŭch nău rêh rnăk wâl.

Bah rnôk rgŏ jă nuĭh ƀon lan Việt Nam kơl dŏng ndơ Việt Nam, tât aƀaơ, ndơ OCOP lĕ bonh năch rwăt đah trong nsrôih rgâl uĕh nâp, rup gui. Ndơ OCOP lĕ geh măt ta lĕ rngôch ntŭk siêu thị têh jêt n’hanh âk ntŭk tăch dơh. Hun hao ndơ OCOP mô knŭng uĕh kah âk, ntô lĭr, ntĭm ntŭk tăch ma hôm kơl an ăp nuĭh ƀon lan, rnăk wâl tăch geh tay nău wât, lĕ đah nău kan ndrel ăp ntil ndơ pă an ntŭk tăch. Bah nĕ rgâl nău mĭn lŏ mir an mĭn rgâl ndoh ndơ, nglăp ndrel lam ntŭr neh.

Hợp tác xã Măng Đen Forest, nkuăl Kon Plông, n’gor Kon Tum lah du nău ntĭt ntoh lư mpeh nău n’hao prêh ndơ OCOP, ndâk njêng ndơ ntĭt mpơl ta ntŭk. Ăp năm, hợp tác xã nkra njêng rlău 100 tấn cà phê arabica. 5 ntil ndơ cà phê nkret njêng êng geh kơp dơn OCOP 3 tât 4 sao dôl tăch uĕh ta ntŭk tăch tâm dak. Nô Lê Nhật Tiến, Groi giám đốc Hợp tác xã, an gĭt:

Trong ƀư OCOP dŭt uĕh ta nău kơl hợp tác xã nchrŏng ndơ bah bôk năp an tât ntŭk tăch gay m’hâm ƀư uĕh nâp, uĕh kah ngăn. Rlău 25 ha Hợp tác xã dôl tăm mhe n’hanh mât chăm, ri mpôl hên dôl pơk hvi nkual tăm, bah năp lah ký ton đah tĭng rnăk ton luh an ƀon lan.

Wa Lê Thùy Kim Loan, Tổng giám đốc Công ty Cổ phần Pyloherb, ntŭk kan dŏng 15 ndơ OCOP bah n’gor Kon Tum ntil nău dak si, an gĭt:

OCOP lah sam ƀŭt kơp dơn bah ndơ geh nău ntĭt mpơl bah nkual neh dŭt âk. Gâp tĭng tâm smƀŭt kơp dơn ndơ OCOP ri gâp mbra saơ ndơ bah nơm geh ntĭt mpơl êng hôm. Êng tem OCOP dơi pă ta n’gor lĕ djôt ndơ ntĭt mpơl êng hôm.

Tĭng Tiến sĩ Nguyên Ngọc Tuyên, Viện trưởng Viện kinh tế n’hanh mât uănh Tây Nguyên, rnôk geh kơp dơn OCOP jêng lah lĕ ndâk njêng moh êng n’hanh nuĭh dŏng lĕ gĭt tât. Yor nĕ, ăp doanh nghiệp an mô rlu rgâl nău mĭn nkra njêng n’hanh tăch tâm rnôk công nghệ mhe:

Nău nglăp sao an ndơ OCOP knŭng lah sam ƀŭt dŏng mô di an ndơ moh êng, ma ndơ moh êng an lah nău nsing nơm bah năch rwăt. Rnôk geh sam ƀŭt dŏng ri hăn ndrel mpla nsơ uĕh kah gay mĭn lah moh êng ndơ bah nơm ri rnôk nĕ ndơ mư n’hao prêh. Rlău ma nĕ, dŏng uĕh nău geh n’gâng tơm công nghệ gay ƀư uĕh tâm lvang aƀaơ hin.

Săk rnglăy nsĭt bah bôk nău kan OCOP lĕ kơl rdâk nsơm nău geh, nău dơh ăp ndơ bah n’gor, rgop dăp tay nău kan lŏ mir hăn ndrel đah hun hao công nghiệp jêt n’hanh pâl nđaih thôn ƀon. Nău djăt tĭng bah nuĭh dŏng đah ndơ OCOP Việt Nam an saơ ăp ndơ Việt nar lơ geh ntŭk dâk ta ntŭk tăch tâm dak, rgop ntrôl wăng sa hun hao.