Bah năp nar hăn nkual ƀon têh Hồ Chí Minh râng Đại hội Druh ndăm gĭt blău ƀư tĭng nău Wa lam dak rơh tal 13, năm 2025, Kpuih Hmin hôm ndăn dâk ơm, hăn mir Cao su gay nkoch ntĭm tay kỹ thuật kor ntăk du trong na nê̆ an rmôt nuĭh way kan mhe. Nuih n’hâm têh bah nuĭh Bí thư chi đoàn lĕ rêng hvi đah ăp nuĭh. Phung pah kan mom Siu Pôp an gĭt:

Kpuih Hmin lah phung pah kan blău, ntĭm an mpôl hên tâm rnôk kor ntăk dŭty săk rnglăy. Mpôl hên nti tĭng n’hanh dŏng di n’hanh dŭt dơh. Ntĭt nsa Kpuih Hmin ntĭm kỹ thuật kor ntăk tơm cao su gay geh âk ntăk ri an uănhh trong koch mô jru, mô thơl; trong koch jêt yơn ntăk hoch âk, uĕh nâp. Rlău ma nĕ, Hmin mĭn ƀư mhe, rgâl trong ntung jong gay an phung pah kan dŏng puh dak si n’hanh mhing keo bu tuh bu sa an tơm cao su ta ăp ntŭk jêr jŏt ma bah ntơm mô hŏ dơi ƀư. Hmin lah nuĭh hăn lor đoàn viên druh ndăm nkra njêng blău n’hanh dŭt n’hâm ntĭm an ăp nuĭh tâm nău kan.

Ngăch prăl, mĭn ƀư mhe tâm pah kan kơt nău kan druh ndăm, ăp nău rgop bah Kpuih Hmin ăp năm bah năp dơi ăp nău kan, ăp gưl djôt dơn. Ntoh lư lah ndơ nkhôm “Druh ndăm gĭt blău ƀư tĭng nău wa” gưl n’gor lvang 2023-2025; Tahen tâm rlong gưl bah dâng âk năm mro. Nô dơi Trung ương Đoàn an Bằng khen năm 2022, geh Ndơ nkhôm “Mpang ty mah” rgum tâm rlong kor ntăk nău kan cao su năm 2024... Lơn lah, năm aơ, Kpuih Hmin lap lah đại biểu râng Đại hội Druh ndăm gĭt blău ƀư tĭng nău Wa lam dak rơh tal 8. Kpuih Hmin nkoch:

Bah rnôk lăp ƀư phung pah kan, lăp Đoàn TNCS Hồ Chí Minh n’hanh ƀư Bí thư đoàn bah Nông trường. Gâp lĕ rgum đoàn viên râng âk nău kan uĕh, ntrŭt nsôr nuih n’hâm gơih nđơr pah kan nkra njêng. Nsrôih tiăr nti ntrong leo Wa Hồ, gâp lĕ nsrôih ƀư tĭng ntĭm bah Công ty tâm nkra kor ntăk cao su, râng tâm rlong har ty pah kan blău lĕ dơi geh ndơ nkhôm têh n’hanh geh Bằng khen, săk gâp dŭt rhơn n’hanh ntô̆ n’hao. Lah đoàn viên druh ndăm gâp nsrôih tay pah kan nkra njêng uĕh lơn, ndrel đoàn viên druh ndăm tâm rmôt tâm rnglăp, mô rlu nti nsrôih pah kan jan san mĭn ƀư mhe gay geh âk ndơ lơn.

Wa Trần Quang Huấn-Cán bộ Rmôt nkra njêng cao su Hòa Bình, Công ty TNHH MTV Cao su Cư Prông an gĭt, Kpuih Hmin mô knŭng phung pah kan geh âk nău blău tâm pah kan ma hôm dŭt n’hâm râng ƀư ăp nău kan ntrong leo. Đah nău ƀư lah Bí thư chi đoàn, nô lĕ geh âk nău ƀư ntoh lư n’hanh ngăn ngên kơl đoàn viên druh ndăm n’hao har ty, n’hao nkra njêng mir tơm; knơm nĕ geh prăk đăp mpăn. Bah meng dơn jao kor ntăk mir cao su bah Công ty, Kpuih Hmin hôm ntop tuch tăm hun hao wăng sa rnăk wâl. Nô lĕ nkrem gay rwăt neh n’hanh tăm geh bơi 1 ha cà phê. Wa Trần Quang Huấn an gĭt:

Đồng chí Kpuih Hmin lah Bí thư chi đoàn dŭt gơih. Lah nuĭh rnoi mpôl đêt, nău rêh rnăk wâl jêr jŏt, yơn đah nău mĭn gơih, nđơr, đồng chí mĭn joi nti, n’hao hăr ty kan. Tâm pah kan nkra njêng ri đồng chí hăn bôk năp n’hanh lĕ geh dŭt âk ndơ nkhôm bah gưl nông trường, công ty n’hanh gưl tập đoàn.

Đah nău nsrôih mô rlu, Kpuih Hmin lah leo ang tâm nkual rnoi mpôl đêt ta Ia Vêr, nkuăl Chư Prông (n’gor Gia Lai). Mpŏng ŭch, bah nău nkoch Kpuih Hmin, mbra geh tay âk druh ndăm, lơn lah druh ndăm nuĭh rnoi mpôl đêt, hao tâm nti, pah kan n’hanh rgop tâm nău hun hao bah ƀon tơm, neh dak.

Nô Đỗ Đức Thanh-Groi Bí thư rnâng kan N’gor Đoàn Gia Lai an gĭt, tâm âk năm bah năp ta lam n’gor lĕ geh rlău 400 nuĭh druh ndăm ntoh lư gĭt blău tâm ăp ntil trong kan. Tâm nĕ, geh âk druh ndăm ta thôn ƀon, nuĭh rnoi mpôl đêt dŭt dơi rnê rhơn, ntrŭt nsôr.

Mpôl hên lĕ săch geh âk băl druh ndăm ntoh lư, geh trong mĭn ƀư sa, rlet rlău jêr jŏt gay ntop kơl joi nău rêh an ăp băl. Bah meng nĕ mpôl hên lĕ ntĭm rđău an ăp gưl Đoàn ƀa ƀơ mât ăp nău kan gay mât uĕh văn hóa rnoi nuĭh. Nĕ lah tâm nđŭr văn hóa chĭng gông, ăp ntŭk pâl an druh ndăm rnoi mpôl đêt, druh ndăm kon chroh. Tă bah ăp nău ƀư nĕ, mpôl hên lĕ njuăl geh âk nkô̆ nău mpeh nti n’hanh ƀư tĭng nău mĭn, nău rêh, pah kan Hồ Chí Minh.