
Dơi ndâk njêng bah nău nglăp nsum ăp phường Tân An, Tân Thiện, Bình Tân n’hanh xă Tân Bình bah nkual têh La Gi (n’gor Bình Thuận ơm), phường La Gi lah nkual têh nklang nkual mper dak lêng bah n’gor Lâm Đồng, rnoh nuĭh ƀon lan rlău 60.000 nuĭh. Ƀon lan âk, nuĭh tât mkra samƀŭt hành chính âk, yơn ăp nău ƀư ta Nklang nkual rhŏ an hành chính nsum phường La Gi đư răp jăp, na nao, ƀư nuĭh ƀon lan ŭch. Wa Tôn Thất Nhật, ta phường La Gi ŭch an gĭt:
Nuĭh ƀon lan ŭch moh nău ngăch, dơh da dê. Gay tâm di an nuĭh ƀon lan ŭch ri gâp saơ phường lĕ ƀư dŭt uĕh. Bah kơi aơ, phường ƀư mkra tay samƀŭt dơi ngăch, dơh đêt kơt aơ lah nău dŭt rhơn, dŭt uĕh.

Kơt nkual nklang đŏng, trong kan mkra samƀŭt hành chính ta ăp xă ta nkual jru ngai, nkual rnoi mpôl đêt bah n’gor Lâm Đồng ƀư dơh, boăt nthoi soih na nao đah trong kan cổng dịch vụ ngih dak. Wa Bùi Quốc Huân, Kruanh UBND xă Lạc Dương, n’gor Lâm Đồng, xă geh rlău 86% rnoh nuĭh ƀon lan lah nuĭh rnoi mpôl đêt an gĭt, tât rnôk aơ, xă lĕ kơp uănh, tâm pă, lôch jêh n’hanh mbơh tơih 378 samƀŭt hành chính ta trong kan dịch vụ công. Lĕ rngôch ăp samƀŭt aơ dơi ntŭk du mpông bah xă mkra ngăch rnôk nuĭh ƀon lan geh nău ŭch.
Pơh bôk năp mpôl hên wơt dơn geh 51 samƀŭt rhăch nău, tâm nĕ geh 17 samƀŭt rhăch nău wơt dơn tă bah trong trực tuyến, rgum âk ntil nău neh ntu, samƀŭt rnăk wâl n’hanh chứng thực. Tâm rnôk mkra, nuĭh ƀon lan tât đă pă an ăp nău rhŏ an ri mpôl hên lĕ dơi tŏng ăp. Oh nô lĕ dơi gĭt tât, gĭt nău kan mkra nău kan bah nơm. Trong măy mŏk, trong ndơ̆ tŏng ăp, dŭt uĕh.

Ndrel đah 16 ngih pah kan, ntŭk kan, n’gâng kan gưl n’gor, lĕ rngôch 124 xă, phường, đặc khu bah n’gor Lâm Đồng lĕ dơi tâm ban trong mkra samƀŭt hành chính, dŏng phần mềm mât uănh samƀŭt mhe, tâm di uĕh nău ŭch wơt dơn n’hanh mkra samƀŭt rhăch nău an nuĭh ƀon lan. Tĭng N’gâng kan Nội vụ n’gor Lâm Đồng, kơp bah nar 1/7, du nar geh rlău 1.000 samƀŭt rhăch nău ndơ̆ tât ta ntŭk n’hanh trực tuyến ta ăp ngih pah kan, ntŭk kan gay kâp mkra. Lâm Đồng dơi uănh lah ngoăy tâm tốp 5 ntŭk leo lor lam dak tâm nău wơt dơn, mkra uĕh mpeh samƀŭt hành chính tâm ăp nar bôk năp nău ƀư n’gâng kan ƀon lan 2 gưl.
Viết bình luận