Năm 2021, ta thôn 3, xă Ea Bung geh tâm pit rbông dak. Du đêt rnăk nking êng trong rƀông lĕ ơm dŏng nsum bơi 30 năm, ƀư an âk rnăk bah dâng geh mô tŏng dak tŏ jêng roh yan. Nău tâm rkeh jŏ jong, ăp rnăk lĕ tâm rlong hăn xă gay mkra tâm pit, yơn mô săk rnglăy n’hanh tâm rkeh đah ăp rnăk lơ geh hô. Tât nar 3/7 mhe rlău, jêh 2 nar n’gâng kan ƀon lan xă mư dơi ndâk njêng, ăp rnăk lŏ ƀư tay samƀŭt n’hanh tâm pit hăn xă gay phong. Jêh rnôk djăt nău rgop bah 2 ding, kruanh xă Ea Bung n’hanh ăp cán bộ mât uănh lĕ jŭr tât ta ntŭk, ƀư kan na nê̆ đah ăp rnăk n’hanh ndơ̆ an trong mkra rsaih nkra. Knŭng jêh 2 mông, ăp nău wăk kol dơi dôh rklaih, 4 rnăk tâm rkeh tâm pă trong rbông dak n’hanh ndrel nkra tay gay trong rbông dak mât uĕh săk rnglăy. Geh lŏ ta dŭt trong rbông, wa Lê Thị Liên, nuĭh ƀon lan thôn 3 nkoch:

Kruanh xă dŭt n’hâm đŏng, lah uĕh kruanh xă khân pơng kơl an gâp, dăp mkra an gâp gay an gâp soaih aih, aƀaơ nâm ơm hôm, pơk dak nâm ơm hôm.

Tâm keh jŏ jong tâm 4 năm dơi mkra mô tât 2 mông, nĕ lah knơm trong ƀư mhe-êp ƀon lan, nchrăp lor gĭt nu nău, na nê̆ jŭr bah dâng gay tâm ngơi, djăt n’hanh dôh rklaih. Tĭng wa Đỗ Duy Toại-Kruanh UBND xă Ea Bung, jêh rnôk n’gâng kan ƀon lan xă dơi ndâk njêng tĭng trong 2 gưl, lĕ rngôch trong chính trị xă lĕ ndăn ndâk njêng trong nchrăp “100 nar bôk năp pơk dŏng”. Tâm nĕ, lơn lah trong way ƀư: hăn sĭt bah dâng, êp ƀon lan, dăch ƀon lan, sŏk ƀon lan ƀư ta nklang.

 Rlău ma nău ƀư tĭng nău kan ta ntŭk kan ri hăn bah dâng gay djăt ăp nău rgop lah bah nuĭh ƀon lan, ăp nău ji nuih ma jŏ aơ mô hŏ dơi mkra ri kơl lor mkra dâl. Jêh 22 nar pah kan ri xă lĕ pah kan đah 3 thôn. Nĕ lah nău êp ƀon lan, dăch ƀon lan gay mkra nău kan pơng dăn, pơng na nê̆ jŭr tât nuĭh ƀon lan ri nău aơ dŭt n’hâm khlay. Mô kơt kăl e gŭ ta jrô pah kan kâp ƀon lan tât he đă jêh nĕ lah tay ri he mư gĭt.

Bah meng nuih n’ham mhe n’hanh trong ƀư mhe, Ea Bung djôt dơn mô đêt jêr jŏt. Ngih pah kan xă mhe ơm dơi ƀư an mô tât 30 cán bộ, aƀaơ lĕ mbak bơi 70 nuĭh pah kan, tâm rnôk ndoh ndơ rhŏ pah kan mô hŏ dơi ntuh kơl rĭng. Wa Nguyễn Văn Phú-Groi Kruanh UBND xă, mât uănh hành chính công, nkoch:

Bôk năp lah trong ndoh ndơ, măy mŏk, trong ndơ̆ nu nău n’hanh du đêt trong kan way kan aƀaơ mô tŏng ăp. Ntop tay, cán bộ tâm rnôk dăp mô dơi ntĭm nti, ntĭm trong... Trong rse điện ơm mô tâm di jêng tât nu nău rlât CP n’hanh ŭnh sa, khuch na nê̆ tât nău kan, roh mông nar an nuĭh ƀon lan n’hanh cán bộ rnôk ƀư.

Ăp nău jêr aơ lĕ dơi xă lah na nê̆ tâm nar pah kan đah Kruanh UBND n’gor Dak Lak tâm lơ 23/7. Nău geh măt ngăch bah kruanh n’gor mô knŭng mpơl nuih n’hâm djăt, êp ƀon lan, ma lơ mĭn lah nău nchrăp lor, jru êp bah n’gâng kan 2 gưl: xă êp ƀon lan, n’gor êp xă. Nău aơ dôl jêng geh nău mhe bah n’gâng kan ƀon lan, lĕ rngôch ndrel trong rƀŏng sĭt nuĭh ƀon lan. Wa Tạ Anh Tuấn, Groi Bí thư N’gor ủy, Kruanh UBND n’gor Dak Lak lah:

Mpôl hên dôl đă N’gâng kan KHCN kơp uănh lĕ rngôch mpeh ndoh ndơ n’hanh bôk nău kan rgâl mrô bah n’gor gay geh trong ntuh kơl mô lah nkra tay. Mpeh ndơ điện ri dăn đă Căn phòng UBND n’gor pah kan đah nău kan điện lực gay tâm di nău ŭch điện. Moh ntŭk geh nuĭh ƀon lan rêh, geh nău kan ri an geh điện ngih dak n’hanh an geh lam hvi điện thoại di đŏng gay dêr nkual rđŭng.

Jêh rlău 3 pơh pơk dŏng ntrong ƀư n’gâng kan 2 gưl bah n’gâng kan ƀon lan-mô knŭng lah n’gâng kan dăp tay, ma lah rgâl trong ƀư, trong gĭt tât, tâm nău ƀư rhŏ kan. Ăp nu nău dơi dôh rklaih, ăp nău lah dơi djăt ngăch... yor lah an gĭt na nê̆ an di ngăn bah ntrong ƀư n’gâng kan ƀon lan 2 gưl-rnôk rmôt n’gâng kan đêt dơh tŏng ăp, êp ƀon lan n’hanh yor ƀon lan lơn.