Rƀŏng tĭng Khay pah kan yor kon se năm 2025 đah bôk nău “Kơl lor nuĭh kan lôch uĕh ăp nău rƀŏng yor kon se”, ăp nău kan dơi kan ta n’gor Gia Lai nsrôih mbơh ƀư âk bôk nău kan ngăn ngên, đah dŭt n’hâm djôt tât an kon se, lơn lah kon se nkual jru ngai, kon se nkual rnoi mpôl đêt n’hanh ăp oh geh nău rêh dŭt jêr jŏt du ntŭk ntô rêh đăp mpăn, uĕh lăng n’hanh tâm ban.

Khay rlu nti năm 2025 ta Gia Lai, ăp nău kan dơi kan dŭt uănh khlay tât nău ntrŭt ntrôl đah drăp ndơ n’hanh nuih n’hâm đah ăp kon hŏk ach o, kon hŏk rnoi mpôl đêt gay ăp oh tĭng tay trong hăn nâp nâl ta trong hăn nti. N’gor Gia Lai aƀaơ geh bơi 5.000 kon se tâm nău rêh dŭt jêr jŏt n’hanh rlău 95.000 kon hŏk geh tâm nău rêh tâm ban. Đah nău ndrel ty, ndrel nuih n’hâm bah n’gâng kan ƀon lan, ăp rmôt kan, doanh nghiệp n’hanh nsum mpôl, ăp “kon se mom” bah n’gor dôl dơi geh an hun hao lĕ rngôch.