Ôi 23/5, ta Nkuăl ƀon têh Buôn Ma Thuột, UBND n’gor Dak Lak ƀư nau Nkah 50 năm nar vay ơm tahen Biên phòng n’gor (23/5/1975-23/5/2025) ndrel ndơn Huân chương mât neh dak hạng Pe. Ntoh nau tâm nar rƀŭn, Trung tướng Nguyễn Anh Tuấn, Chính uỷ Tahen Biên phòng Việt Nam rnê ăp nau rgop têh khlay bah rmôt kan tâm lôch 50 năm ma aơ, nkre đă lŏ mât ân tâm dăch nau kan dôl geh ngăn gay ntrŭnh ƀư ăp nau kan, nau ƀư bah Biên phòng.

Đại tá Đào Viết Hùng, Kruanh rđau kan bah Tahen Biên phòng n’gor Dak Lak lah rjăp, nau nsôih ndâk rmôt kan chính quy, ngăch gĭt blau, ăp nhoat tĭng ăp nau mhe, tâm ban nuih n’hâm pah kan ma Đảng, Ngih dak, Tahen ndrel ƀon lan. Ndơn nau kan bah Kruanh dak, Trung tướng Nguyễn Anh Tuấn pă Huân chương mât neh dak hạng Pe pă ân Tahen Biên phòng n’gor Dak Lak, kơp dơn ăp nau rgop têh ndrel mât ân nâp nâl bah rmôt kan tâm nau mât neh dak./.