Nar 20 khay 5 năm 2025, Kruanh dak ơm Trần Đức Lương khĭt roh ta Hà Nội, jong rêh 88 năm. Nău khĭt bah wa lah nău rot yot têh đah Đảng, Ngih dak n’hanh ƀon lan Việt Nam, ntlơi an tay ân nău rngot klâng tâm nuih n’hâm ƀon lan lam dak. Wa Trần Đức Lương lah du hê kruanh rđău kan ntĭt leo lor, moh ta ntŭk gŭ kan, ntơm bah kỹ sư địa chất krit jêr, đăp dêh tât tât nuĭh mât bôk Ngih dak, wa an tay ăp nău nkah jru da dê, rgop dŭt têh kuâng an n’gâng kan rdâk njêng n’hanh hun hao neh dak, mât njrăng neh dak.

Kruanh dak ơm Trần Đức Lương deh nar 5 khay 5 năm 1937 ta xã Phổ Khánh, nkuâl Đức Phổ, n’gor Quảng Ngãi. Wa râng cách mạng khay 02 năm 1955. Ntơm bah khay 02/1955 tât khay 9/1955 wa rgum hăn Bắc, nti sơ cấp ngành địa chất. Lôch nê, păng pah kan ta Mpôl Địa chất 20 đah ăp ntŭk kan bah nuĭh kan kỹ thuật, kruanh đội địa chất tât groi kruanh mpôl kỹ thuật. Lôch nti chuyên tu ta Đại học Mỏ - Địa chất, bar rach năm bôk năp bah n’gâng kan, păng hŏ hăn lam ăp ntŭk bri dak yôk nor, hăn uănh năl n’hanh gŭ mĭn neh ntu, rgop khlay tâm nău rdâk njêng ntŭk rgum prăp nău lư ndơ mpêt khlay neh dak rhŏ dŏng hun hao wăng  sa- rêh jêng kon nuĭh. Păng dơi jao âk nău dơn kan khlay: Groi Cục Bản đồ địa chất, Tổng cục trưởng Tổng cục Địa chất; Groi chủ nhiệm lôch nê Chủ nhiệm Ủy ban Khoa học n’hanh Kỹ thuật bah Quốc hội.

Ăp ndrăng băl kan bah wa Trần Đức Lương tâm n’gâng kan địa chất nha mât kơt ơm ăp nău nkah mpeh kon nuĭh bah wa, băl ndrel kan, nuĭh kruanh rđău kan ntĭt leo lor, rah rơch. Rngot n’huach mpeh nău roh bah Kruanh dak Trần Đức Lương, TS địa chất Nguyễn Thành Vạn, Groi Cục trưởng ơm Cục bản đồ Địa chất n’hanh Khoáng sản Việt Nam (Bộ Nông nghiệp n’hanh Môi trường) nkoch:

“Đah gâp, Kruanh dak Trần Đức Lương ma ntơm nơh mpôl hên nha hôm tâm ôp dŭt dêh bên lah nô Trần Đức Lương. Nô nê lah du hê nuĭh bôk ƀong n’hanh lah du hê nuĭh ntĭm nti. Nô nê nti dŭt răp jăp n’hanh geh du rnôk tât đah ăp nkô̆ nău bah neh ntu n’hanh đah du măt uănh dŭt khoa học. Nô nê pah kan na nê̆ đah nuĭh rnâng kan Liên Xô, nô nê kơt nti êng ma ngơi nău Nga dŭt hăr blău, nô nê nkoch rblang lĕ rngôch ăp ntil ma nău Nga đah mpôl rnâng kan neh ntu, ăp nuĭh rnâng kan Liên Xô dŭt ndrât ndal đŏng. Ăp nkô̆ nău tâm trôm neh ntu tât bah kơi nơh mpôl hên mơ ƀư tơm, nô nê geh ăp nău uănh  năl n’hanh nău rgop, nkah, rƀŏng trong dŭt khlay. Nô nê têk ndrêng n’hanh ntĭm nti gâp dŭt âk n’hanh gâp nti dơi nuih n’hâm bah nô Trần Đức Lương.”

Ntơm bah năm 1987 tât khay 8/1992, wa Trần Đức Lương dơi tâm pă ƀư Groi kruanh Hội đồng Bộ trưởng (aƀaơ lah Groi Thủ tướng Chính phủ), nkre lah nuĭh ntơh măt rnâng kan Việt Nam ta Hội đồng Tâm kơl wăng sa. N’hanh ntơm bah khay 9/1992, păng ƀư Groi thủ tướng tât năm 1997. 10 năm ƀư Groi Thủ tướng, lah rơh neh dak tĭng ƀư lĕ n’hâm suan trong nchrăp rgâl mhe bah Đảng, rgâl bah jâng wăng sa trong nchrăp rgum jêng wăng sa ntŭk tăch rgâl rƀŏng tât xã hội chủ nghĩa đah âk mbâl ăp jêr jŏt. Tâm nău jêr jŏt nê, Groi Thủ tướng Trần Đức Lương nơm hŏ ndrel đah nsum mpôl chính phủ mbăk anh dăp rduăl nău kan tâm rơh bôk năp rgâl mhe gay ndơ̆ neh dak tĭng kơn klaih rlău jêr jŏt, rgop ƀư jêng ăp nău dơi bah rnôk rgâl mhe.

Nđach saơ nău rêh n’hanh n’gâng kan bah Kruanh dak ơm Trần Đức Lương n’groh an neh dak, tâm nê geh rnôk păng ƀư Groi Thủ tướng, PGS.TS Bùi Thị An, Đại biểu Quốc hội khoá 13, Viện trưởng Viện Tài nguyên, Môi trường n’hanh Phát triển cộng đồng, Groi Kruanh Liên hiệp ăp Hội Khoa học n’hanh Kỹ thuật Hà Nội mpơl nău:

“Rnôk wa Trần Đức Lương ƀư Groi Thủ tướng, neh dak dôl dŭt jêr jŏt. Yơn wa hŏ dŭt nsrôih, ndôr ndrel đah Chính phủ, wa hŏ nsrôih ndôr êng, ma ăp nău dơi êng bah neh dak he n’hanh lôch nê ăp oh nô geh ôp uănh sơch joi ăp nău tă ơm gĭt kan dak bah dih gay n’hao neh dak rlău dơi rơh krit jêr nê mbrơi mbrơi nsan hao mpeh wăng sa, mpeh chính trị đăp mpăn, ntŭk gŭ kan bah neh dak hao têh. Tâm nê geh nău rgop bah wa Trần Đức Lương đah nău ƀư lah Groi Thủ tướng, mât uănh mpeh công nghiệp dŭt jêr jŏt, ma hŏ lăn rlău dơi.”

Tâm năm kan ƀư Kruanh dak (1997-2006), wa Trần Đức Lương hŏ geh ăp nău rgop dŭt têh kuâng tâm pah kan tâm dak n’hanh đah dak bah dih, rgop mât đăp mpăn chính trị, ntrŭt ntrôl hun hao wăng sa n’hanh n’hao têh ntŭk gŭ kan khlay ta dak bah dih bah Việt Nam. Wa Trần Đức Lương êng uănh khlay tât nău rdâk njêng Ngih dak pháp quyền xã hội chủ nghĩa, ntrôl dăng rgâl dơh glêh siƀŭt kan, n’hao dăng nău khlay kan bah pháp luật tâm nău rêh jêng. Tâm rnôk dja, ăp nău rgâl mpeh trong đă tĭng, leo mât bôk kan n’hanh siƀŭt tĭng kơn  dơi an ƀư, njêng jâng nsing an rnôk têh uĕh mhe n’hanh lăp rgum. Nhà báo Hà Đăng, Kruanh ban Tư tưởng - Văn hóa Trung ương ơm nkoch mpeh ăp nău nkah bah Kruanh dak Trần Đức Lương:

“Wa Trần Đức Lương ƀư Kruanh dak an tay âk nău têl nkah ngăn. Yơn nê lah rnôk trong leo ƀư njêng bah he dôl nđơr hao, yơn dôl mâp dŭt âk jêr jŏt đŏng ri wa Trần Đức Lương hŏ uănh khlay dŭt âk tât nău hun hao wăng sa, hun hao wăng sa rêh jêng kon nuĭh bah he. Hun hao gung trong bah he. Wa Trần Đức Lương lah du hê kruanh dak geh nău rŏng jru đah kônh wa, oh nô n’hanh đah lam mpôl cán bộ tâm ban kơt nê đŏng. Ăp ntil nău ma wa ƀư hŏ têl nkah tĭng mông nar wa nkra nău kan Kruanh dak.”

Mô dơn lah du hê kruanh mât bôk kan têh, Kruanh dak Trần Đức Lương hôm lah du hê nuĭh đảng viên sŏng di, du bông nău rêh nsrôih an nău uĕh di cộng sản. Ntơm bah năm 1959, wa hŏ dâk tâm mbor kan bah Đảng, rlău 65 năm tiăr nti, n’groh an mô gŭ rlu. Tâm ăp ntŭk gŭ pah kan, wa way mpơl nuih n’hâm dâk chŏl lor, ntĭt leo lor, dăch dêh đah ƀon  lan. Đah ăp nău rgop têh an neh dak, wa Trần Đức Lương hŏ dơi Đảng n’hanh Ngih dak ntăm an âk nklâm ndơ têh khlay kơt Huân chương Sao vàng, Huy hiệu 65 năm Đảng n’hanh âk huân chương, huy chương, ndơ nkhôm rnê, săk ntơ lư khlay êng ƀa ƀă bah Việt Nam n’hanh dak bah dih.

Kruanh dak ơm Trần Đức Lương khĭt. Đảng, Ngih dak n’hanh ƀon lan Việt Nam roh du hê kruanh rđău kan geh trong uănh jong, lĕ nuih n’hâm ma nău kan n’hanh way ndơ̆ nău geh bah neh dak n’hanh ƀon lan lor bôk năp. Nău rêh n’hanh nău kan bah wa lah trong ntĭt leo lor chrat ang an ăp rơh kơn cán bộ, đảng viên kơt tĭng./.