Nthoi tay rơh rƀŭn tal 9, ôi lơ 23/5, Quốc hội tâm nchră ta rmôt mpeh âk nkô̆ nău khlay, tâm nĕ geh uănh lah ntop tay săk rnglăy ƀư tĭng trong nchrăp hun hao wăng sa rêh jêng, tơm prăk ngih dak năm 2024; nu nău ƀư tĭng trong nchrăp hun hao wăng sa-rêh jêng n’hanh tơm prăk ngih dak ăp khay bôk năm 2025. Kruanh Quốc hội hội Trần Thanh Mẫn an lah, tâm rnôk nu bnău lam ntŭr neh geh âk nău rgâl, tâm dak dăp đêt, dơh ngăch tŏng ăp n’gâng kan, dăp n’gâng kan 2 gưl mbra khuch tât ntĭm rđău, ƀĭt joet wăng sa-rêh jêng.

Tâm rnôk rƀŏng n’gluh an geh hao hao jêng năm 2025 lah 8% n’hanh tât 2030 lah 2 mrô. Kruanh Quốc hội mĭn lah: Quốc hội hăn ndrel đah Chính phủ, đah nău rđău bah Đảng, nkra rgâl tay trong ƀư pháp luật têh dăng gay tâm di nău đă dôh rklih jêr jŏt an jâng wăng sa. Mpeh wăng sa ƀư êng, Đảng lĕ geh Nghị quyết 68, Quốc hội mbơh an Nghị quyết 198 hôm, Chính phủ geh nghị quyết 193. Aƀaơ hin nău ƀư mbơh ƀư tĭng m’hâm an uĕh, gay 6 khay dŭt năm geh hao jêng 8%.