Ôi 4/6, ta Kiên Giang, Tổng Bí thư Tô Lâm ƀư tơm rơh pah kan đah Ban Thường vụ Tỉnh ủy Kiên Giang n’hanh Rnâng kan Tỉnh ủy An Giang, uănh năl nô nău tĭng ƀư ăp nghị quyết, n’glôch jêh bah Trung ương. Tổng Bí thư rnê âk nău dơi hun hao bah bar n’gor, yơn nchŏng kloh nău tâm nkrêp đah Kiên Giang n’hanh An Giang mô hŏ ntik n’hao nău geh, bol gŭ tâm kâng nsum tâm nkual rgum têh khlay Tây Nam Bộ.

 Tổng Bí thư dăn đă n’glăp bar n’gor gay jêng du mpôl hun hao mhe geh rnoh wăng sa têh, âk mpưm ntil tơm ndơ geh n’hanh nău dơi tâm ntêng lêng nkual geh nău tam lơn. Nău n’glăp nsum dja nta trong dơh dăp rgum tay ndơ dŏng, jêng rêng rnoh khlay tâm nkrêp kan nsum ntơm bah tuch tăm tât tăch n’gluh, wăch rgum ntuh kơl têh jong n’hanh n’hao nău dơi tâm rlong nkual. Tổng Bí thư đă bar n’gor rgum ƀư lôch jêh ăp rnoh tât kan năm 2020–2025, nchrăp na nê̆ an Đại hội Đảng bộ ăp gưl, rƀŏng tât Đại hội lam dak tâl XIV bah Đảng.