Pơh bah năp nơh, ta n’gor Gia Lai hŏ ƀư nar Coffee Festival 2025 đah rnoh têh n’hanh săk kah dơi n’hao têh, wăch rgum âk mpưm ăp doanh nghiệp, nuĭh mât chăm n’hanh nuĭh rnâng kan cà phê. Nar ƀư jêng ntŭk rgum tât uĕh an nuĭh ƀon lan n’hanh năch pâl nđaih, rgop nkơnh n’hơ cà phê Robusta săk kah bah Việt Nam lah nsum n’hanh Gia Lai lah êng.

Nău kan dơi ƀư ta nkual trong Anh hùng Núp n’hanh Quảng trường Đại Đoàn Kết, nkual ƀon têh Pleiku – du ntŭk dơh gay rêng lam mpeh rnoh khlay cà phê bah Gia Lai. 40 doanh nghiệp n’hanh rnăk ƀon lan kan lŏ mir tâm trong kan cà phê hŏ geh ndrơng ndơ ntĭt êng ta nar ƀư đah nău ŭch rŏng nsum ti rgop ntik n’hao ăp rnoh khlay êng bah cà phê Gia Lai. Wa Nguyễn Thị Nga, Groi Giám đốc Hợp tác xã Nông nghiệp Dịch vụ Nam Yang, nkoch:  

“Ma nar ƀư rơh dja. Mpôl hên ŭch rŏng nkơnh n’hơ cà phê Đăk Yang lah êng n’hanh cà phê Gia Lai lah nsum hăn tât băl mpôl tâm dak n’hanh dak bah dih, ndơ̆ cà phê Gia Lai hao du prêh mhe. Cà phê kah khlay.”

Đah nău ŭch n’hao têh khlay cà phê ta n’gor, Gia Lai Coffee Festival rgum tâm ăp nău rlong cà phê kơt: Rlong chiăm kah cà phê khlay, sơch cà phê rnglăy nkret njêng; nchreng an ŭanh kỹ thuật wâr n’hanh et luh dak; tâm rlong mpli n’hanh tâm nđŭr – buăt nthoi ndơ tăch…wa Nguyễn Thị Thanh Tâm, Kruanh Ban tổ chức, nkoch:  

“Gia Lai Coffee Festival lah du nar kan khlay nsum mpôl n’hanh lĕ rngôch ăp nău kan ta nar ƀư dja mbra dơi ƀư tĭng trong concept lah bah mir tăm tât ly cà phê. Ŭch rŏng lah nkual tăm cà phê săk kah âk, Gia Lai dơi nar lơn ma gĭt tât âk lơn, nkre lah rnoh rêng  lam n’hanh buăt nthoi bah ăp rnăk tuch tăm nar lơn ma âk dăng lơn n’hanh rêng kan cà phê ta n’gor păng hun hao du trong jŏ jong.”

Lôch bôk năp ƀư geh nău dơi tâm năm 2023, năm aơ Gia Lai Coffee Festival  geh nău kan âk mpưm ntil lơn; lah ntŭk nuĭh dŏng joi gĭt mpeh găr cà phê n’hanh nău nkoch wăr ndơ geh ƀư tơm bah n’gor…Tĭng nô Nguyễn Văn Hòa, Kruanh nuĭh ntơh măt jrô kan Lab mpeh Viện săk kah cà phê lam ntŭr neh ta Việt Nam, nar ƀư dja dôl mô rlu ăp tŏng, rêng nău nđơr an mpôl mât chăm cà phê Gia Lai rƀŏng tât nău âk mpưm n’hanh săk kah:

“Aƀaơ, gâp dôl mât uănh mpeh rlong chiăm kah n’hanh uănh năl săk kah cà phê rlău 48 ntil bah n’gor Gia Lai gay sơch luh ăp ntil gay an tâm năm tât mbra rnă nchrăp lor an rơh tâm rlong cà phê lah khlay Gia Lai. Mhâm ƀư gay rêng dơi nău nđơr, nsrôih đah suan mom, gân djăng n’hanh lĕ nuih n’hâm gay hun hao n’gâng kan cà phê ta Gia Lai”