Khay druh ndăm năm aơ, druh ndăm n’gor Dak Lak hŏ njêng bơi 300 rmôt nuĭh râng êng, tĭng ƀư 268 ntŭk ƀư, ndơ kan bah druh ndăm; an ƀư rhiăng nău kan râng rdâk njêng êng ƀon  lan mhe n’hanh đô thị srăch uĕh, mât kloh uĕh ntŭk gŭ rêh, rdâng lơh đah rgâl duh nđik trôk nar. Druh ndăm Dak Lak hŏ ƀư 29 km n’gâng ŭnh “Mpoh ang trong n’har bri”, “Mpoh ang trong ƀon”, njêng 218 mpôl nti keh mbrô đah rlău 2.600 đoàn viên druh ndăm râng, leo ƀư nkoch trêng, kơi năp nti, ntĭm nti nuĭh ƀon lan dŏng ndơ pơk sŏng dăng… Ntŭk chrat ang tâm ăp nău kan bah druh ndăm Dak Lak lah trong leo ƀư “Jut jăng jay truh sat, nkưp nde”, rgum rlău 1,3 rmen prăk n’hanh bơi 1.400 nar luh kan gay mon mhe 32 mblâm jay ntop kơl druh ndăm n’hanh kon se geh nău rêh jêr jŏt.