Pơh rlau aơ, rmôt kan ntoh măt Quốc hội n’gor Dak Lak geh rnôk mâp cử tri tâm ăp nkuăl Krông Pắc, Cư M’gar, Ea Súp ndrel Buôn Đôn. Bah năp rơh rƀŭn tal 9, Quốc hội gưl XV ndrel nau ndal bah ntrong kan dăp rgum ntrong hành chính, ngoai tâm nau kâp rnơm ngăn ma cử tri ntoh lah săch tâm di cán bộ tâm nau kan mhe.

         Tâm ăp ntŭk mâp, âk cử tri ntoh nau tâm ban nau đah nau dăp rgum ntrong kan hành chính, yơn kŏ đă nau pă cán bộ ân geh uănh khlay tât nau dơi, nau ueh ndrel nau gơih kan đah ƀon lan. Wa Nguyễn Duy Thành, cử tri thôn 14 xã Ea Kly, nkuăl Krông Pắc mbơh nau:"Rtŭt gleh ntrong kan tă bah Trung ương tât nkuăl ri hên ŭch ngăn ndrel tâm ban nau. Ri ma rơh aơ hên đă Quốc hội, đă ma Đảng nơm ân geh ƀư ân rjăp ngăn gay leo ăp nŭih geh nau blau, nau rƀŏng, geh nau mleh, geh nau blau ngăn gay ma kơl an ƀon lan. Ngăn lah rnôk aơ lah nơm ƀư mô nâp ri ân geh ăp nŭih mô tŏng nau dơi, mô tŏng nau mleh, nau blau, mô nâp ma nau kan ri lŏ sĭt rlu dơm dơm”.

         Geh tât nau kơl an tâm nau rêh, cử tri nkoch hôm âk rnăk ach o, geh nau rêh jêr jŏt gŭ tâm ngih truh sat, yơn ê geh nau kơl an bah Ngih dak. Cử tri Thân Ngọc Duyến, thôn Phước Hoà 1, xã Ea Quang, nkuăl Krông Pắc, nkoch: “Tâm xã hên geh du nŭih tahen ơm rnôk aơ păng geh nau ji, rven săk, 2 kon păng ri ndrăng đŏng ma mô geh ngih gŭ. Ri hên lah tahen ơm đŏng đă tât Uỷ ban ri Uỷ ban bu lah nkuăl ân Ea Quang knŭng 9 ngih, mô geh dơi ntop tay ôh. Rnôk rnôk aơ tahen ơm phung hên bonh đă dơi geh ndâk ân neh ngih hôm. Ndri ri gâp mbơh ma ăp ntoh măt Quốc hội lah rnăk vâl nê geh dơi bu kơl ndâk ngih đŏng lah mô”.

         Ăp nau đă bah cử tri hŏ geh rmôt kan ntoh măt Quốc hội ndrel rđau kan ăp n’gâng kan, ntŭk kan ndrel rđau kan UBND ăp nkuăl ơh. Đah ăp nau đă rlau nau dơi, rmôt kan ntoh măt Quốc hội n’gor Dak Lak ton mra njoăl tât n’gâng kan ba lơ uănh, rklaih gay đăp mpăn nau geh dơi ngăn bah ƀon lan.

         Tâm rnôk nê, ta n’gor Lâm Đồng, Groi Kruanh Quốc hội Nguyễn Đức Hải ndrel rmôt hăn kan hŏ tât pah kan ma n’gor ndrel Viện mĭn njêng Hạt nhân Đà Lạt mpeh nau ƀư nau ntrŭnh 57 bah Bộ Chính trị ndrel nau ntrŭnh 193 bah Quốc hội, gay geh nau rgâl tâm nau hun hao khoa học công nghệ ndrel ntrơn rgâl mrô.

         Groi Kruanh Quốc hội lah rjăp, nau rlong ƀư nau kan ân geh tâm dăch ma nau ngăn, tâm ban, săk tam, der nau ƀư nsum nsum ndrel mô nâp. Lâm Đồng kŏ đă ơm ndâk ntŭk kan rgâl mhe, âk ntil nau kan, tu tơm ân hun hao khoa học công nghệ bah nkual. Groi Kruanh Quốc hội Nguyễn Đức Hải mbơh: ‘Êp aơ, Rnâng kan rđau kan geh nau bơh n’hêl rđau jur ăp nkuăl, đah nuih n’hâm nsum lah rđau kan prêh ngăn tâm n’gor ân geh rđau. Bôk nau kan ân geh dŭt n’hâm n’hêl geh nkô̆ nau, geh nau pă kloh. Hên mhâm ƀư ân geh nau đă nau dơi ân nŭih kan khoa học, nau kan ƀư âk ntil ăp tu tơm ntuh kơl gay pah kan ndrel nau kan mpeh ntuh kơl mra geh kơl an lor. Ndri ma Lâm Đồng ân geh nau dơi gay rgâl mhe êng mpeh nau kan aơ đŏng? Ntă nau kan ri hên mra geh mĭn njêng, rgum gay ma mbơh”.

         Gay lŏ ntrŭnh ƀư ân săk tam ăp nau ntrŭnh aơ, Groi Kruanh Quốc hội Nguyễn Đức Hải đă n’gor Lâm Đồng ân geh mât tâm dăch nkô̆ nau rđau bah Trung ương, đăp mpăn nau kan, nau rgum, ăp ntil, tâm ban ndrel geh nau ngăn tâm di ma nau geh bah nkuăl. Der ƀư mô tâm di geh tât nau kan nsum nsum, mô geh nau dăng. Nkre lah, ân geh ntô̆ n’hao nau kan, ngăn lah nau kan bah nŭih daka bôk tâm nau rđau, đă ƀư ntrŭnh, mêt uănh ƀư nau kan, đăp mpăn mbơh, kloh rvah, săk tam ndrel geh nau dơi. Mô ân ndăn nau geh ntrŭnh kơl, roh hoach, mpŭng lir.

         Rnôk aơ, Groi Kruanh Quốc hội Nguyễn Đức Hải ndrel rmôt hăn kan hŏ tât khâl, pă 2 nklâm ndơ ân 2 rnăk geh nau kơl an ntoh lư tâm nkuăl Đức Trong, n’gor Lâm Đồng, ơm đă n’gâng kan ăp gưl, ăp ntŭk lŏ kơl an âk lơn tay tât nau rêh bah ăp rnăk vâl geh dơi kơl, nŭih geh n’hâm tâm n’gor./.