Ăp n’gor Dak Nông, Lâm Đồng lĕ geh nău mbơh jêh nău sŏk nău rgop nuĭh ƀon lan mpeh trong kan nglăp nsum n’gor. Tĭng Nău ntrŭnh mrô 759 lơ 14/4 bah Thủ tướng Chính phủ, n’gor Lâm Đồng mbra nglăp nsum đah n’gor Dak Nông n’hanh Bình Thuận, sŏk săk n’gor Lâm Đồng; nklang n’gor nchrăp gŭ ta Đà Lạt. N’gor Lâm Đồng mhe jêh nglăp nsum geh rnoh neh bri 24.233 km2-lah n’gor geh rnoh neh têh ngăn lam dak, rnoh nuĭh 3.324.400 nuĭh. Lơ 22/4, N’gâng kan Nội vụ n’gor Lâm Đồng lĕ geh nău mbơh jêh sŏk nău rgop ƀon lan ntoh măt rnăk wâl mpeh dăp ntŭk kan hành chính gưl n’gor n’hanh dăp gưl xă. Tĭng nĕ, n’gâng kan ƀon lan lĕ ƀư sŏk nău rgop bah rlău 320.000 nuĭh ƀon lan ta ntŭk.

Săk rnglăy, geh rlău 97,8% nuĭh ƀon lan ntoh măt rnăk wâl ŭch nău nglăp nsum 3 n’gor Lâm Đồng, Bình Thuận, Dak Nông. Rnoh nuĭh ƀon lan tâm ban ŭch nău dăp ntŭk kan hành chính gưl xă lah rlău 97%.

Tĭng nau mbơh bah n’gor Dak Nông, geh rlau 97,2% cử tri tâm n’gor tâm ban ma nau tâm rnglăp nsum đah n’gor Bình Thuận ndrel Lâm Đồng. Bah năp nê, ăp nkuăl bah Dak Nông hĭ ƀư pă phiếu sŏk nau rgop sŏng tâm bơi tât 150 rbăn rnăk, njêng nau ueh nơih ngăn ân cử tri ntoh nau mĭn ŭch bah nơm. Dĭng lĕ cử tri tâm ban ma nau ntrŭnh ŭch tâm rnglăp n’gor Dak Nông-Bình Thuận-Lâm Đồng. Rnoh cử tri tâm ban nau rnglăp gưl xã lah rlau 97%. Nchrăp n’gor Dak Nông mra dăp rgum n’huch ntơm71 rmôt kan hành chính gưl xã, jur hôm 28 xã./.