Ăp nar dja bah 50 năm bah năp nơh, đah nuih n’hâm han dăng phŭt ndal sial ndăng đah cách mạng, tahen ƀon lan lam dak ƀư jêng geh nău dơi têh khay năm mhe 1975, rklaih luh lam lĕ rngôch Miền Nam, dơn ngoăy neh dak.

Tĭng ƀư nău nsrôih bah Bộ Chính trị, khay 3-1975, rơh Rdôl lơh lam lĕ rngôch n’hanh dâk lơh bah tahen n’hanh ƀon lan he khay năm mhe 1975 ntơm dâk lơh n’hanh geh nău dơi mbro. Pe trong lơh têh: Trong hăn lơh Tây Nguyên ntơm pơk ma rơh rdôl lơh ndal pit in Buôn Ma Thuột, rklaih luh Tây Nguyên; Trong hăn lơh Huế - Đà Nẵng n’hanh Trong hăn lơh Hồ Chí Minh rklaih luh Sài Gòn - Gia Định.

Ăp nar n’glĕ dŭt bah trong hăn lơh, bol ma tahen phŭng rlăng geh lơh chrai, yơn khân păng nha hôm joi trong gŭ nkrăp gay nking nchăng trong hăn lơh bah tahen he đŏng. Nar 26-4-1975, lôch âk nar hăn ndăn ngăch, nkre hăn nkre lơh phŭng rlăng, nkre kơi ntop mpôl tahen, 5 binh đoàn tơm bah Tahen rklaih luh tâm pă jêng 5 trong chruh ndrel du tơ̆ rdôl lăp lơh tâm nklang nkual ƀon têh Sài Gòn - Gia Định.

Tât 11 mông 30 mnĭt nar 30/4/1975, Tổng thống Dương Văn Minh n’hanh lĕ rngôch n’gâng kan Việt Nam Cộng hòa ân pha lah chuh chŭn mô geh ndơ nkol. Trong hăn lơh Hồ Chí Minh geh nău dơi lam lĕ rngôch.

Nău lơh dơi khay năm mhe 1975 ntơm njuat n’glêh an, ndơ̆ rnoi nuĭh he lăp tâm rơh “đăp mpăn, dơn ngoăy, xã hội chủ nghĩa”, nkre ntroh n’gôr dăng trong leo ƀư rơh rklaih luh rnoi nuĭh n’hanh rlăch ndăng an bah tâm lơh tâm su, rgâl mhe lam ntŭr neh. Đại tướng Phan Văn Giang, Ủy viên Bộ Chính trị, Groi Bí thư Quân ủy Trung ương, Bộ trưởng Bộ Quốc phòng lah rjăp: 

Di 11 mông 30 mnĭt nar 30/4/1975, trong hăn lơh Hồ Chí Minh geh nău dơi lam lĕ rngôch, dŭt jêh geh nău dơi rơh rlăch lơh mprơh Mỹ, kơl neh dak. Nê lah nău dơi di an ăp njăr trong rlăch ndăng âk krit jêr, ntul rlong đah ăp nău n’groh an, roh yot dŭt n’hâm têh kuâng bah tahen n’hanh ƀon lan he. Nău dơi têh khay năm mhe 1975 lah ndơ an saơ gung trong cách mạng lor nchrăp, blău mhe, trong rđău kan sŏng di bah Đảng; lah nău dơi bah suan dăng lam ƀon lan râng tâm lơh, mpơl nău geh ngăn bah trong rŏng dak nkre êt lhăt đah nău mĭn rôih dăng dơn ngoăy neh dak n’hanh nău wơl nđơr geh bah tâm lơh tâm su, bah suan dăng tâm rnglăp rnoi nuĭh, nkre đah suan dăng bah rơh mhe.

  Lôch rlău n’gul rôk năm, lam dak dôl ntik n’hao tay nău dơi n’hanh nău tă ơm gĭt nti bah Nău lơh dơi khay năm mhe 1975, lăp tât rơh hun hao mhe, rƀŏng tât têh ndrŏng, kruanh dăng, “ƀon lan geh ndrŏng, neh dak têh dak, ƀon lan ƀư tơm, geh nău tâm ban, rsang rnglay”./.