Mir sầu riêng tăm srah cà phê bah rnăk yuh H’Sen, rnoi Mạ, ta ƀon Bu Sốp, xă Dak Nia, nkual ƀon têh Gia Nghĩa dang nkao bôk nău mbra ton geh âk. Yuh H’Sen an gĭt, 90 tơm sầu riêng tâm mir n’hanh 900 tơm cà phê tăm tay, knŭng mhe tăm bah năm 2021 bah tơm prăk manh Ngân hàng Chính sách xã hội. Năm e H’Sen lĕ lêh cà phê, năm aơ mpŏng mbra geh play bôk năp, jêng wăng sa rnăk wâl dơi rgâl ngăch n’hanh trok rnon ngân hàng dŭt n’gơch:

Knơm tơm prăk manh bah ngân hàng chính sách 90 rkeh prăk, rnăk wâl mbra geh prăk bah cà phê, sầu riêng ta dŭt năm aơ. Lah mô geh tơm prăk aơ manh kơl an aơ, rnăk wâl mô dơi tăm tay mir cà phê, kơt tăm tay sầu riêng ƀư hao nău geh. Năm ap play dak bôk ri du gâl sŏk mbra trok ngân hàng, hôm ƀa ƀaư mbra ntuh kơl tay.

Janh manh prăk n’hanh tuch tăm lôch uĕh lah nău nkoch bah rnăk wâl wa K’Biêng, ta ƀon Phai Kol Prudăng, xă Đăk Nia, nkual ƀon têh Gia Nghĩa. Wa K’Biêng an gĭt, rnăk wâl geh 2 ha neh, yơn yor mô tŏng prăk jêng bah năp đaơ wa knŭng tăm mbô, bum n’hanh điều jêng nău geh dŭt đêt. Trong hăn tât đah K’Biêng tâm năm 2015, rnôk wa dơi manh 90 rkeh prăk bah Ngân hàng chính sách xã hội. Knơm tơm prăk aơ, rnăk wâl ntơm ntuh kơl tăm cà phê, jêh nĕ hun hao tay tiêu. Aƀaơ rnăk wâl geh 1.000 tơm cà phê, 200 n’gâng tiêu, nsĭt geh rhiăng rkeh prăk du năm.

“Năm aơ pĕ cà phê geh nklăp 2,5-3 tấn rlăy n’hanh n’ăp tiểu tay. Tăch geh rlău 300 rkeh prăk. Lĕ rngôch knơm tơm prăk manh ntuh kơl nkra njêng bah ngân hàng chính sách âk năm bah năp. Mhe aơ gâp hôm manh tay 12 rkeh prăk gay koar ntu, rwăt ƀôn dak, knơm nĕ geh tu dak kloh đăp mpăn dŏng sa, săk soan ngăch prăl lĕ du wâl uĕh lơn.

Đăk Nia lah ngoăy tâm 3 xă nkual mper bah nkual ƀon têh Gia Nghĩa, geh bơi 60% rnoh nuĭh rnoi mpôl đêt. Gay kơl kônh wa geh prăk ntuh kơl an nkra njêng, Ngân hàng Chính sách xã hội lĕ an manh kơl an rlău 75 rmen prăk. Wa Ngô Ngọc Khanh-Kruanh UBND xă Đăk Nia an gĭt, knơm manh prăk chính sách, âk rnăk mô knŭng rklaih ach o ma hôm hao ƀư ndrŏng. Wa Ngô Ngọc Khanh, uănh lah:

Kônh wa ƀon lan ta xă Đăk Nia tâm rnăk ach o, êp ach o n’hanh ƀon lan rnoi mpôl đêt geh nău rêh jêr jŏt, dơi gĭt tât tơm prăk manh bah Ngân hàng Chính sách mpeh ntuh kơl hun hao nkra njêng kơt, rwăt phân poh, kon ntil, tơm tăm mpeh hun hao mât rong, tuch tăm geh săk rnglăy lĕ n’hao nău geh. Nău âk rnăk geh prăk rlău 62 rkeh du năm lĕ ndơ̆ rnoh an geh bah xă tŏng n’hanh rlău rnoh an, rgop hun hao wăng sa rêh jêng ta ntŭk”.

Kơp tât lĕ 3 khay năm 2025, lam n’gor Dak Nông geh bơi 71.000 rnăk manh prăk ta Ngân hàng Chính sách xã hội, đah dĭng lĕ nkah rnon bơi 4.800 rmen prăk. Tâm nĕ, rlău 24.000 rnăk ƀon lan rnoi mpôl đêt, manh rlău 1.655 rmen prăk. Wa Vũ Anh Đức Groi Giám đốc Ngân hàng Chính sách xã hội n’gor Dak Nông an gĭt, tơm prăk an manh kơl an lĕ rgop khlay tâm n’hŭch ach o nâp nâl, ndâk njêng thôn ƀon mhe n’hanh hun hao wăng sa-rêh jêng nkual rnoi mpôl đêt. Ndrel đah nău koh n’hŭch sam ƀŭt hành chính, ngân hàng n’hao ndơ̆ cán bộ an manh sĭt bah dâng, tâm rgop đah rmôt manh prăk ta ăp ntŭk gay ntĭm, groi nđôi, kơl kônh wa dŏng prăk manh săk rnglăy.

Đah nuĭh ach o manh prăk ta Ngân hàng chínbh sách xã hội, mpôl hên ƀư trong way tĭng: Ƀư sam ƀŭt rhăch nău ta jay, sŏk prăk ta xă. Ta ăp ntŭk geh rmôt ntrŭt nsôr pah kan pah kan nsum mpôl jŭr tât thôn, ƀon, xă gay ntop kơl an manh prăk chính sách xã hội. Ngân hàng nchrăp lor nkoch trêng tât ăp rnăk manh prăk geh ntrong ƀư săk săk rnglău gay tâm pă, pơk hvi tâm ntŭk gŭ rêh, kơl ăp nuĭh nti, ƀư tĭng. Rlău ma an manh, ngân hàng mĭn tât săk rnglăy dŏng prăk, joi nău rêh nâp nâl an nuĭh ach o, n’hanh lơn lah ƀon lan rnoi mpôl đêt ta ntŭk.

An manh kơl an lĕ n’hanh dôl nsĭt tât tơm prăk ngăn ngên, mpoh ang nău nsing nơm, jêng dơi hao prêh an âk rnăk ach o, êp ach o n’hanh lơn lah ăp rnăk ƀon lan rnoi mpôl đêt ta n’gor Dak Nông. Bah âk mir mô jêng mô khlay, âk rnăk lĕ rgâl lôch uĕh, rklaih ach o, đăp mpăn nău rêh.