Ăp nar aơ, phung pah kan ta ntŭk ndâk ƀư trong 2 nkuăl Mang Yang-Ia Pa, pah kan ndŭn ndăn yơn lvang trong jong 33km, khlay nglăp ndâk ƀư rlău 195 rmen prăk, hôm e geh mbrơi ngăch. Ntơm ndâk ƀư bah khay 11/2023 n’hanh nchrăp jêh tâm khay 1/2026, yơn âk ntŭk mô hŏ sŏk neh lâng, ƀư nuĭh ndranh mô dơi ƀư. Wa Krung Dam Đoàn, Groi Kruanh UBND nkuăl Mang Yang an gĭt, âk ntŭk an sŏk neh lâng yơn mô hŏ geh rnoh khlay neh na nê̆:

Trong kan sŏk neh lâng geh tât 33 rnăk, rlău nkual 3 xă: Kon Thụp, Đăk Djrăng n’hanh Lơ Pang (nkuăl Mang Yang). Aƀaơ hin hôm du đêt ntŭk an geh rnoh khlay neh na nê̆ ri UBND nkuăl lĕ tâm rgop đah ntŭk kan kruanh ntuh kơl gay ntrôl ngăch ăp samƀŭt, ơm geh rnoh khlay na nê̆ mbơh đah ƀon lan, đăp mpăn tĭng nău ntrŭnh bah pháp luật.

 Mpeh đah kruanh ntuh kơl, wa Nguyễn Hữu Sơn, ƀĭt joet Jrô kan mât uănh nău nchrăp ƀư mrô 1 (Ban Mât uănh ăp nău nchrăp ƀư ntuh kơl ndâk ƀư n’gor Gia Lai) an gĭt, tât aƀaơ, rnoh ndơ ndâk ƀư ta ndranh mhe geh bơi 61% trong nchrăp. Ntŭk kan mbra nsrôih dôh rklaih ăp wăk kol đah nsrôih jêh mbơh an bah năp lơ 30/8.

Trong kan tâm rgop lah Ban mbra ƀa ƀơ đă nuĭh jŭr pah kan đah Hội đồng trok neh n’hanh UBND nkuăl Mang Yang gay tâm rnôk ƀư geh wăk kol ri mkra an ngăch. Ban dŭt n’hâm n’hanh ntĭm rđău ăp nuĭh ndranh rgum ndoh ndơ măy mŏk, nuĭh kan, lŭ loih gay ngăch jêh an di nar.

Nău nchrăp ƀư Nkual ƀon lan gŭ trong Nguyễn Văn Linh (nkual ƀon têh Pleiku) dôl geh mbrơi ngăch đŏng yor mô hŏ sŏk neh lâng. Nău nchrăp ƀư geh dĭng lĕ ntuh kơl 260 rmen prăk, dŏng tơm prăk trung ương n’hanh nchrăp jêh bah năm 2022 tât năm 2025. Yơn lah, ngăch na nê̆ tât aƀaơ knŭng geh bơi 60%. Tâm dĭng lĕ rnoh neh bơi 40ha an sŏk dŏng, knŭng nklăp 24ha dơi ŭch trong ƀư trok neh...

Bah ăp n’hêl na nê̆ aơ, UBND n’gor Gia Lai lĕ an samƀŭt ntĭm rđău ntŭk kan geh tât uănh nđôi, dôh rklaih jêr jŏt n’hanh ntrôl ngăch ăp ndơ ƀư. Wa Nguyễn Hữu Quế, Groi Kruanh UBND n’gor Gia Lai ndrel ăp ban, nău kan ƀon lan lĕ ngăch uănh nđôi ngăn ta neh n’hanh ngăch geh ăp nău ntĭm rđău gay dôh rklaih ta ăp ndơ ƀư; ntrôl ngăch ndâk ƀư ta ăp nkual lĕ geh neh lâng, đăp mpăn ngăch n’hanh nchrăp ndơ rgâl  tay ăp nău nchrăp ƀư an lvang mhe.

Dơn uănh mpeh trong kan nkoch trêng trok sŏk neh lâng lah bah ăp gưl n’gâng kan ƀon lan. Jŭr tâm mâp tĭng nuĭh rblang, geh âk nău an nking n’gang, rnôk ƀư saơ wăk kol ri an mbơh tât UBND n’gor dăn nău rgop n’hanh mpơl nău mĭn êng bah nơm, lah ƀư kơt nĕ nsĭt nău geh an ngih dak, nsĭt geh an nuĭh ƀon lan ri dăn đă UBND n’gor uănh mĭn ntrŭnh an. An mpơl nuĭh n’hâm lĕ đah nău kan, ntơm nar kơt lĕ năl nsrôih m’hâm an soih trong hăn gay mbơh ƀư ăp gưl bah năp tay.

Nău UBND n’gor Gia Lai ndăn mbơh ƀư ăp trong mkra gay đăp mpăn nău mât uănh săk rnglăy ăp bôk nău kan, nău nchrăp ƀư ntuh kơl nsum lah dŭt jăch ndăn tâm rnôk dăp, mât uănh tay rmôt n’gâng kan ƀĭt joet n’gâng kan ƀon lan. Nuĭh dơi UBND n’gor Gia Lai đă rgum kơp uănh lah ăp nău nchrăp ƀư ntuh kơl nsum mpeh tâm trong nchrăp đêt năm 2021-2025, trong nchrăp năm 2025 kơt ăp nău nchrăp ƀư bah năp tay. Nkre, UBND n’gor đă ăp ntŭk geh tât rgum mkra ăp nău nchrăp ƀư mô hŏ trok prăk, ăp nău nchrăp ƀư geh rnoh rmeh an manh lor mô hŏ sŏk n’hanh ăp nău nchrăp ƀư lĕ uănh trok prăk yơn mô hŏ pă tŏng prăk trok.

Gay ntrôl ngăch n’hanh đăp mpăn geh na nao tâm mât uănh, UBND n’gor Gia Lai lĕ ntĭm rđău ăp n’gâng kan, nău kan n’hanh UBND ăp nkuăl, nkual têh, nkual ƀon têh an tâm pă na nê̆ lĕ nău kan, mkra ăp wăk kol yor nău dăp tay n’gâng kan, ăp ntŭk kan an kơp uănh tay, dăn đă nău rgâl tâm di gay đăp mpăn săk rnglăy, ntêm nkrem prăk dŏng dêr mpŭng lir tơm prăk.