Tâm mir sầu riêng dôl ma luh kao bah ntŭk ƀư tâm boh tuch tăm kloh Krông Pắc, wa Trần Đình Thập, du hê tâm ntŭk ƀư kan nsum aơ dôl ma djăt wa Mai Đình Thọ, Groi Bí thư nkuăl uỷ Krông Pắc, kruanh ntŭk kan nkoch tât nau tŏ ndrel rđau ƀĭt bah ngai, Năm aơ hŏ 70 năm, păng mbơh lah ntơm nơh mô lăng gơih, yơn jêh geh sa play sầu riêng tâm ntŭk tâm boh kan tuch tăm aơ ri wa Thập nchih săm ƀŭt dăn lăp pah kan nsum gay kơt tĭng ndrel geh kơl an:

            ‘Ƀư mât chăm tơm aơ ri lăp kan nsum ta aơ, ngăn lah bu ntĭm mbơh ân nơm. Lah mô blau ri ôp. Moh ntil dak si poh ri ta aơ bu geh da dê. Lah nơm rvăt ê geh prăk ri bu ân he chan, ân manh lor. Nŭih bu geh oi ri ƀư ntŭk nsing ân nŭih ach o, gay nsôih rlet rlau săk nơm”.

            Nau nkoch tă bah nŭih mô gơih êng nŭih gơih bah wa Trần Đình Thập leo hên tât mâp wa Nguyễn Công Điềm, rnoi Tày, tâm thôn Thanh Xuân, xã Ea Kênh ndrel lah Groi Kruanh rmôt kan tuch tăm kloh Krông Pắc. Nau nkoch đah wa Điềm lŏ geh âk nau ngăn, nê lah, tâm ăp năm 1980, kônh wa rnoi Tày, Nùng tâm Cao Bằng hăn tâm Ea Kêng ƀư nau kan tâm rnôk jêr jŏt drel mơng su hât rƀên. Ta aơ geh rlau 50 nŭih hăn ât rgum nsum. Yơn rnơm nau tâm kơl ma ăp nŭih geh dơi ât da dê. Ăp nŭih kŏ gơih pah kan jan sa ndrel geh nau rêh ueh. Wa Điềm râng nau ndâk ntŭk tâm boh nau kan tuch tăm kloh kŏ rnơm lah, tâm rnglăp du ntŭk nsum mra leo geh âk nau dơi lơn:

            ‘Kônh wa tâm nê ri tâm rnglăp ngăn. Rnăk aơ saơ rnăk êng geh play rŭng mô lah êr n’ha ri tâm nkoch mbơh nau blau, gay ma mhâm ƀư năm aơ ân gehrlau ma năm bah năp, yan aơ rlau ma yan ba năp. Ndâk ntŭk tâm boh kan nsum ri oh nô ndrel tâm rgop prăk. Nkô̆ lah gay kơp dơn kloh tu tơm ntŭk tăm, gay ntrong hăn ân geh nau dơi nâp”.

            Nau nkoch tâm rnglăp, tâm kơl, mpŏng tât nau kan tuch tăm kloh, hun hao nâp nâl hŏ kơl an ntŭk tâm boh nau kan nau kan tuch tăm kloh bah Krông Pắc geh rgum âk lơn nŭih ŭch tât kan nsum. 150 nŭih kan nsum rmôt aơ, geh n’ăp ma rnoi yoăn, Rđe ndrel Tày Nùng, geh n’ăp ma nŭih tĭng chroh ndrel mô tĭng.

            Bol ma mô ru ma nau kan, mục sư Ama Yotha tâm ƀon Jung, xã Ea Yông hôm ndơn nau ƀư Kruanh rmôt ƀư nau kan tuch tăm nsum. Thượng toạ Thích Đạo Ứng, tơm ntŭk ƀư nau kan Thiền viện Trúc Lâm Từ Giác, xã Ea Yông kŏ leo sầu riêng kloh lăp tăm tâm ntŭk rƀŭn kan ndrel jêng nŭih kan nsum ueh bah ntŭk kan. Tâm mir sầu riêng tăm nsum ma tơm play mlu, play đur, âk tơm dôl ma luh kao. Thượng toạ Thích Đạo Ứng mbơh, nau kan tuch tăm kloh ân play kloh. Phật tử tât kơl an ntŭk aơ gay ma mât chăm tơm tăm, mra geh âk nau ueh đŏng:

            ‘Ngăn lah nơm ƀư kơt tĭng ăp nau ueh ngăn. Ma nau tuch tăm kloh lah ueh ân n’hâm soan bah nŭih sa. Geh neh ta aơ ri gâp ƀư kơt tĭng nau kan aơ nkre, ri ma râng tâm ntŭk tâm boh kan tuch tăm nsum, ƀư tĭng nau kan tuch tăm ma ntŭk kan ntĭm mbơh gay der hôl djơh ăp ntŭk êp nê”.

            50 năm jêh neh dak đăp mpăn, Tây Nguyên hŏ geh nau văng sa ueh rlau, neh dak rnă njrăng nâp nâl, trong điện, trong hăn, ngih săm ƀŭt, ngih dak si nar lơn nâp ueh. Yơn nau ŭch ngăn nê lah Bắc-Nam rgum nsum tâm nkuăl neh aơ. Mô êng ăp rnăk ƀon lan ndrel thôn, ƀon, tổ dân phố ma ăp nŭih ndrel nau mĭn kan hŏ tâm rgop nsum ƀư nau kan.

            Kơt yuh H’Len Niê, tâm nkuăl ƀon têh Buôn Ma Thuột, hŏ geh ăp oh tă bah nkuăl ƀon têh Hồ Chí Minh, Đà Nẵng joi tât gay ƀư kan nsum, n’hao nau ơm ueh, ndơ sa bah rnoi Rđe. Kơt yuh H’Loan tâm xã Ea Hiu, nkual Krông Pắc, hŏ geh nau dơi tâm ntrong kan rong sĭm rlêng tâm Dak Lak ndrel Gia Lai, ndâk geh săk ntơm, tăch geh yến sào.

            Ndrel Y Pốt Niê, bu ndăm ndâk Công ty Cổ phần Êđê Café, tâm nkuăl Krông Ana, n’gor Dak Lak joi saơ ăp nŭih oh nô tâm nau kan tăch rgâl nsum ta Hà Nội, geh kơl ndâk nau kan, geh nkra ngih máy. Săk nô Y Pốt nơm jêng nŭih ntĭm leo nau ndâk kan ân băl mom:

            “Pốt ŭch ntĭm leo nau ŭch gay ăp kon se jê̆ ndrel ăp nŭih kan mhe tât jêh aơ ƀư cà phê ân nơm lah ân saơ nau khlay bah nau kan tuch tăm, rnoh khlay bah ƀon lan, gay ăp băl mom hăn ndrel ma rnoi mpôl đê̆ geh nau rgâl tâm nau mĭn nau kan, ƀư ueh lơn, hun hao tuch tăm tâm ƀon lan nar lơn ma nâp nâl lơn”.

            Năm aơ nkah 50 năm nar đăp mpăn, nsum mpôl 54 rnoi mpôl oh nô tâm ăp nkuăl neh hŏ tâm rgum. Đah Tây Nguyên ntơm bah ăp nkuăl neh dôl gŭ dôl ndrel tâm kuăn ty tâm rnglăp, tâm nau tăng nteh bah chĭng gong, rklaih lĕ nau tâm ƀah mô gĭt mpeh nau ngơi ndrel năm deh. Nau ueh bah nau tâm rnglăp dôl ƀư jru tay nau khlay bah đăp mpăn, pơk trong ueh gay ƀon lan hun hao sâm geh./.