Trong link pơk uănh nău nchih bôk năp ta aơ:https://cms-vov4.vov.vn/mnong/nau-mhe-ntuk-reh-jeng-thoi-su-xa-hoi/du-rut-nau-nchih-trong-bu-gleh-tam-nuih-kan-maih-vang-rlong-ma-unh-krit-jer-rlong-can-bo-nau-nchih-bok-nap-ap-nuih-gu-cham-bah-koi-han-rhot-rlau-bok-nap-486637.vov4

Tâm nău nchih gâl 2 bah năp nơh bah du rut nău nchih ngăn geh “Trong rgâl glêh tam nuĭh kan- Ŭnh rlong maih, krit jêr rlong cán bộ”, mpôl hên hŏ nkoch tât kônh wa n’hanh băl mpôl rup gui ăp cán bộ nkêh an êng du ding ƀât nău kan êng nơm, n’glăp săk tâm njăr trong hăn kan mhe; ăp nău nkah mpeh rlong suan, rlong maih tâm kăl e n’gluh n’glăp njêng n’gor ta Tây Nguyên, jêng nău tă ơm gĭt kan, han săk gay ntik n’hao tâm rơh rgâl glêh tam nuĭh kan dôl tĭng ƀư dŭt ndăn ngăch.

Nău nchih nar aơ, tâm du gâl n’glĕ dŭt bah du rut nău nchih, mpôl hên nkoch tât nău ndrel hăn, tâm pă nsum bah lam trong kan chính trị n’hanh ăp rơh kơn ƀon  lan. Mô dơn nchrăp ntŭk pah kan, ăp ndơ rsong hăn, gŭ rêh n’hanh kơt nti, ma lĕ ma nău răm mƀak ân geh rnôk ntơm du njăr trong hăn mhe.

“Ndrel du nuih n’hâm hăn tât du njăr trong hun hao” lah nuih n’hâm dôl rêng lam bah Tây Nguyên tât Duyên hải Nam Trung Bộ, lah bôk moh bah nău nchih n’glĕ dŭt tâm du rut nău nchih.

Trong link pơk uănh nău nchih gâl 2 ta aơ: https://cms-vov4.vov.vn/mnong/nau-mhe-ntuk-reh-jeng-thoi-su-xa-hoi/unh-rlong-mah-rlau-ap-roh-pok-trong-lok-yok-486893.vov4

Ăp nar dja, mông nar ta Sở Văn hóa Thể thao n’hanh Pâl nđaih Lâm Đồng tâm nkual nhih pah kan rgum bah n’gor jêng ndăn ngăch lơn. Lah ntŭk ƀư nhih pah kan mhe lôch n’glăp nsum đah Dak Nông n’hanh Bình Thuận, Lâm Đồng dôl ndăn nchrăp ăp ntil ndơ gay wơt bơi 2.000 cán bộ bah bar n’gor băl. Wa Trần Thanh Hoài, Groi Giám đốc Sở Văn hóa Thể thao n’hanh Pâl nđaih n’gor Lâm Đồng an gĭt, nhih  pah kan dôl nchrăp ăp ntil ndơ gay wơt tay 150 băl- ndrel kan:

“Ăp cán bộ, công chức hao ta aơ ăp oh yuh ndrel kan ta nhih pah kan ơm ta ntŭk mbra ntop kơl joi nhih nti an tâm di, ntŭk gŭ tâm di dăch ntŭk pah kan. Yor, geh ăp cán bộ công chức geh lĕ ma ur sai ndrel sĭt n’gor Lâm Đồng mhe ri ăp mon hăn tĭng nkre đŏng. Bol ăp nău kan dja mô geh ngăn tâm siƀŭt yơn aơ lah nău tâm rnglăp dơn ngoăy, rvê an oh nô ăp n’gor băl lah rvê an he nơm đŏng”.

Tĭng Đề án n’glăp 3 n’gor Lâm Đồng, Bình Thuận n’hanh Dak Nông, nhih pah kan n’gor Lâm Đồng mhe geh rlău 5.900 cán bộ, công chức. Nchrăp 80% rnoh nuĭh dơi tâm pă nău kan ta nkual ƀon têh Đà Lạt. Tâm nê geh bơi 2.000 cán bộ, công chức tât bah 2 n’gor Bình Thuận n’hanh Dak Nông. Wa Nguyễn Ngọc Phúc, Groi kruanh UBND n’gor Lâm Đồng an gĭt: Lôch rlău 3 khay nchrăp, ăp trong nkra jay công vụ, nhih pah kan, ndeh rklư njŭn wơt dôl dơi n’gor Lâm Đồng an ƀư ăp kôp đŏng.

“Mpôl hên dôl uănh năl nklăp 10 ntŭk gay tâm pă ntŭk gŭ an cán bộ ăp n’gor tât pah kan. Ntŭk gŭ, jay công vụ ri dôl uănh năl tâm pă tŏng geh an ăp oh nô ntŭk gŭ ntŭk sa, đăp mpăn. N’gor dăn đă đah Chính phủ geh du trong đă tĭng, trong ntop kơl prăk dŏng na nê̆ đah rnoh cán bộ dja gay cán bộ ntŭk êng tât đăp mpăn pah kan”.

Ndrel đah Lâm Đồng, pah kan nchrăp dŭt ndăn ngăch n’hanh ăp dăp ta n’gor Dak Lak. N’gor hŏ geh trong nchrăp nkrum lam, ntơm bah nău tâm pă ntŭk gŭ, nhih nti an ăp oh kon cán bộ; ndeh rsong hăn n’hanh dăp rgum nău kan an 1000 cán bộ bah n’gor Phú Yên. Wa Cao Thị Hòa An, Bí thư Tỉnh ủy Phú Yên hŏ dŭt rngot rhơn đah ăp trong nchrăp ăp dăp ma Dak Lak dôl an ƀư:

“Rnôk ntơm bah Phú Yên hao ta aơ ri saơ he tâm ban lah nuĭh du rnăk wâl. Mpôl hên bah Phú Yên hao ta aơ geh âk nuih n’hâm nchrăp lor, geh âk nău mĭn rvê ngăn yơn ndjôt nkre du nău tâm rŏng, du nău rŏng dŭt têh n’hanh mpŏng mpeh du n’gor têh gay he geh du ntŭk nsan hao tâm let năp tay di đah nău mpŏng bah cán bộ, đảng viên, nuĭh ƀon lan n’hanh đah nău nsing nơm bah Trung ương”.

N’glăp n’gor, xã, glêh tam nuĭh kan….aƀaơ mô hôm lah nău rôih rlău dơi jêr jŏt bah ăp cán bộ, lah nău dơn kan n’hanh nău nchrăp ăp dăp bah n’gâng kan ăp n’gor ma geh nău rđău đă mbluh soih bah Trung ương ndrel nău ntrŭt ntrôl bah ăp rơh kơn ƀon lan. Ăp nău rgop bah cử tri ta ăp rơh mâp, mpơl nău n’grŏ tĭng lĕ n’hanh ŭch rŏng Trung ương ndrel ăp n’gor tĭng  ƀư geh nău tam, nkre lah rjăp nău khlay bah pah kan cán bộ:

“Dăp rgum tay nuĭh kan bah Trung ương tât n’gor dŭt di nuih n’hâm ƀon lan. Cán bộ tâm dâng tâm ban kơt ƀon lan dŭt nsing nơm Đảng, Ngih dak. Mpŏng lah tâm let năp tay Đảng, Ngih dak ƀư an lĕ ngăn”.

N’glăp tĭng trong luh nar – Nhâp nar kơl Tây Nguyên geh dak lêng, Nam Trung bộ geh yôk bri, tâm rlai săk geh, nkrêp jĭr văn hóa n’hanh kon nuĭh. Ăp n’gor Lâm Đồng, Dak Lak, Bình Định, Quảng Ngãi hŏ mpơl nău nsrôih âk tâm nău nchrăp ăp ntil ndơ gay đăp mpăn nuĭh kan mhe kan mbro, geh nău tam rnôk dơn hang rbăn cán bộ bah Kon Tum, Gia lai, Phú Yên, Dak Nông n’hanh Bình Thuận. Ăp jêr jŏt ân rlău dơi rơh rgâl glêh tam dja, dôl lah ŭnh rlong maih, krit jêr rlong cán bộ! Rlău dơi ăp jêr jŏt bôk năp, ăp n’gor mbra dơh soih ndrel chuat lăp tâm rơh hun hao mhe.