
Nar kan dŭt njrăng uănh khlay tâm ăp nar rlău aơ lah Lễ Nkah ndray 50 năm Nar Rklaih luh miền Nam, dơn ngoăy neh dak tâm nar 30/4 ta Nkual ƀon têh Hồ Chí Minh. Rơh lễ nkah ndray têh khlay n’hanh mprang uĕh, đah nău tât râng bah rmưn rbăn nuĭh ƀon lan n’hanh năch dak bah dih. Lễ nkah ndray 50 năm Nar rklaih luh neh dak geh 48 mpôl tahen, đah nklăp 13.000 nuĭh râng ntroh hăn, n’grĭng tahen. Tahen Trung Quốc, Lào n’hanh Campuchia ndrel râng n’grĭng hăn rnôk dja. Ta lễ nkah ndray, tahen hŏ pănh 21 tong đại bác ta nâm nhạc Quốc ca Việt Nam. Quân chủng Phòng không - Không quân rgum bar pe jât bôk ndeh păr kung, ndeh păr tâm lơh nchreng an uănh kalơ trôk.

Ta nkuăl ƀon têh Hồ Chí Minh hŏ ƀư âk jêt ntŭk pănh phao kao kơl an ƀon lan uănh tâm nar rgum đăp mpăn neh dak. Măng 30/4 păng phao kao geh rnoh âk ngăn, đah 28 ntŭk pănh dêh ndrel 2 ntŭk pănh prêh tâm nkuăl ƀon têh. Ndrel nê lah ăp nau kan ƀư mpoh ang mpeh klơ trôk tâm ăp măng 26/4 ndrel 30/4 đah rlau 10 rbăn ndơ mpar mô geh kâp nŭih ƀĭt, nau ƀư mpoh ang ŭnh geh nkô̆ mpeh nkuăl ƀon ƀon têh Hồ Chí Minh tâm 50 năm rlau aơ.

Nkre ta Nkual ƀon têh Hồ Chí Minh ƀư âk rơh njroh mprơ săk ntơr uĕh. Nê lah pơk ƀoh rup gưl neh dak “N’gloh mbro nău mprơ rnê nău dơi plơ̆ sĭt”. Măng njroh mprơ săk ntơr êng tă bah Bộ Văn hóa, Thể thao n’hanh Pâl nđaih ƀư tơm, kan nsum đah Nkual ƀon têh Hồ Chí Minh ƀư ta dinh Thống Nhất nar 29/4. Nchreng an uănh nhạc kèn nkre đah ăp kỹ thuật ta seh tă bah Bộ Công an ƀư tơm, ƀư ta njăr trong Lê Lợi n’hanh trong hăn jâng Nguyễn Huệ.

Tâm Hà Nội, Bôk nau kan njroh mprơ tơm “Tâm ton Bắc-Nam” geh ƀư tâm Sân vận động neh dak Mỹ Đình, đah nau râng bah rlau 800 nŭih nghệ sĩ, diễn viên ndrel ăp tahen ơm, nŭih tă râng tâm lơh kăl e. Bôk nau kan lah nau tâm rgop đah nau ơm, phóng sự tĭng nkô̆, nau ƀư tâm nkoch mbơh geh nsum ma nau njroh mprơ ueh mhe rnôk aơ. Ngăn lah, bôk nau kan geh leo 2 bôk ndeh sar T64, ntil ndeh dŏng tâm rnôk tâm lơh mprơh Mỹ. Nau tâm ton Bắc Nam geh sân khấu têh, ueh, geh 2 ding tâm ban ƀư, ntoh nau 2 mpeh Bắc Nam, tâm nklang geh ntung Hiền Lươmg. Ndrel nê lah lah ndak 3D mapping rơh bôk năp geh ƀư tâm bôk nau kan njroh mprơ.

Bah năp nê, ta Hội trường Thống Nhất (Ntŭl têl ơm yău gưl neh dak mha êng Dinh Độc Lập) ƀư bôk nău kan njroh mprơ “Đất nước trọn niềm vui”. Bôk nău kan geh 3 chương: “Nđơr geh dơn ngoăy”, “Nđơr geh nsan hao” n’hanh “Nđơr geh têh dăng”; dơi rdâk njêng geh nău ntơ nău mprơ kăl e, lĕ ma ăp ntil nău mprơ, múa, nhạc, sân khấu, rup ngăn, nău ndrong… hŏ mpơl tay ăp rơh dăng janh kăl e bah rnoi nuĭh, neh dak n’hanh lah rjăp nău têh khlay bah Nău lơh dơi khay năm mhe năm 1975.

Ta Hà Nội, Radio Việt Nam, ƀư bôk nau kan chính luận nghệ thuật ueh khlay “Nau mprơ rhơn m’ak”. Bôk nau kan geh 3 gưl: “Hà Nội tăng nau geh dơi rklaih”; “Hăn tât Sài Gòn”, “Neh dak jêh geh đăp mpăn”. Ăp gưl ƀư lah du nau geh ueh êng, nkah ăp nau tơm ueh dăng, ntơm bah nau nkah ơm kăl e ân tât nau geh ngăn bah du dak Việt Nam rgâl mhe, tâm rnglăp ndrel hun hao. Wa Ngô Thiệu Phong, Tổng Biên tập Báo điện tử Radio Việt Nam nkoch nau:

‘Tâm bôk nau kan “Nau mprơ rhơn m’ak”, hên ŭch ƀư ndâk rehe tay nau khuh răm tâm lơ 30/4/1975 ta Radio Việt Nam. Ngăn lah tâm ntŭk rhôp nau bah ntŭk hên kan, ăp nŭih tă răk sŏng nau nkoch mbơh nau mhe bah nau geh dơi rklaih tâm lơ 30/4/1975. Ăp nŭih geh ăp nau nkoch mbơh bôk năp, ăp nŭih rhơn rnôk geh nkoch nau nau bah nơm ân ƀon lan geh djăt tăng, ân kônh wa lam dak ndrel lam ntur neh, du mbơh du nau kan têh bah neh dak lah “Việt nam hŏ geh nau đăp mpăn dĭng lĕ”.
Viết bình luận