Lơ 26/4/1975, lôch âk rơh ngăch ndăn, nkre hăn râng tahen nkre rdul lpwh ntŭk rlăng rklaih đăp mpăn nkual neh, nkre ntop mpôl kan, 5 binh đoàn tơm bâh Tahen rklaih đăp mpăn pă jêng 5 ntŭk ndrel rdul lơh du tơ̆ ta nklang nkuăl ƀon têh Sài Gòn- Gia Định. Tahen ơm Đoàn Đình Điểu kahgĭt tay: Sư đoàn bộ binh 968, Quân khu 4, uănh năl nău kan lơh rai ntŭk njrăng n’gang bâh mpôl rlăng ta Đồng Dù (Củ Chi), njêng nău nsan ueh gay ma tahen he hăn rdul lơh mpŏng let Sài Gòn. Lơ 29/4, bol ma geh bom, ndrak bâh mpôl rlăng, đah nău nsrôih nklơi săk nơm an neh dak đăp mpăn, che n’hanh ăp tahen êng lĕ pơk trong lor.

"Lĕ ma Sư đoàn 968 mpôl hên geh đă pơk 4 trong rdul lơh, mpeh nhâp nar , mpeh nhâp nar ba dâng, mpeh luh nar b dâng, mpeh ba lơ. Mpôl hên lĕ lăp lĕ rngôch, đại đội hên lăp dăch ta ntu, kuĭh ntu, yor ta nkual nĕ mô geh tơm si, ba kơi lah bri cao su, hôm ba năp lah dâng lŏ. mpôl hên lăp pe tơ̆ mo dơi geh pơk trong rdu lơh.

Nkah gĭt tay rnôk têh khlay bah rơh tâm lơh rnôk ndeh sar 390 lŭp chô lôt mpông pêr Dinh Độc Lập, tahen ơm Ngô Sỹ Nguyên, pháo thủ ndeh sar 390 an gĭt:"Trong hăn Hồ Chí Minh ndăn ngăch ndăn, hăn tât săk rnglăy dŭt têh. Ta chông mpeh bah lơ, quân đoàn 2 bah he geh 2 bôk ndeh sar tât ơm ngăn lah 843 n’hanh 390, lah 2 bôk ndeh bah đại đội trưởng Bùi Quang Thận n’hanh chính trị viên Vũ Đăng Toàn. Ndeh sar 390 bah mpôl hên ndăn năch tom mpông pêr lăp Dinh Độc Lập, ntoh măt an soan dăng bah tahen ƀon lan Việt Nam lŭp rlơt du nău tŭn jot, ntoh măt an ŭch đăp mpăn bah rnoi nuĭh Việt Nam. 21 năm âk nău njê roh rui mư geh mông aơ.

Ta nar kahgĭt “Dâng lơ ndrel du ntôr”, che Hồ Việt Hà, ta quận Long Biên, Hà Nội kahgĭt tay. “Gâp tât ta aơ tâm nău rhơn bâh lơ 30/4, kahgĭt 50 năm nău dơi rklaih đăp mpăn Sài Gòn. Săk gâp nơm têh kuăng rlet rlău bâh rơh tâm lơh đah Mỹ, lôch nĕ lah rơh mât đăp mpăn n’har bri mpeh ba lơ, mpeh ba dâng. Rnôk aơ kahgĭt tay dŭt rngot ngăn. Gâp ŭch uănh tay nău khlăy gay ma dơi geh rblang du nău ôp: Mơh lơh dĭng Đảng n’hanh wa Hồ leo kan neh dak he rlet rlău âk nău tâm lơh đah Pháp, Mỹ n’hanh nuĭh ƀon lan bâh Bắc tât Nam lĕ mpŏng tât du rơh rklaih đăp mpăn neh dak mhâm ƀư”.

 Đah rmôt rgum tŏng ăp tahen binh chung, 5 njônh tahen rdôl lơh lăp Sài Gòn ƀư tĭng trong lơh ngăch, lôch ngăch tĭng trong way ƀư “Ndăn ngăch, hat janh:, gay lăp ăp ntŭk tahen khlay lĕ săch, đăp mpăn lơh dăng. Tahen rklaih đăp mpăn lĕ ƀư an rlăng bôl dŭt âk tahen n’hanh phao blêu têh mô dơi “chuh chun”, mô dơi roh n’hanh mô hôm săch êng rlău nău chuh chun mô geh nău nkol.

 Mpeh rnôk rdôl lơh bah ăp Quân đoàn tâm trong leo Hồ Chí Minh kăl e, Đại tướng Phạm Văn Trà, Tă ƀư Kruanh n’gâng kan Mât njrăng bri dak, an gĭt, Trung ương lĕ dŭt ngăch, dŭt n’hâm ntĭm rđău 5 trong rdôl lơh. N’hanh bah mêng soan dăng tahen, chính trị, trong kan rgŏ jă, kâp geh âk ntŭk uĕh, ƀư an rlăng chrai.

"He rklaih đăp mpăn miền Nam lĕ rngôch, nsing tâm soan dăng lam ƀon lan, nsĭng soan dăng bah 3 trong rdôl lơh ma tahen lah khlay. Aơ lah nău ntĭm rđău, ƀĭt joet bah Đảng he, bah Bọ chính trị dŭt ngăch. Ntĭm rđău na nao tay bah năp nĕ rnôk Quân đoàn 4 mô dơi lăp Dinh Độc Lập yor dôl jêr jŏt ta Xuân Lộc ri ntĭm rđău Quân đoàn 2 rgăn dak me Đông Nai rdôl lăp dâl. Jêh rnôk Dương Văn Minh mbơh chuh chun, nuĭh ƀon lan lĕ miền Nam dâk êng ndrel rmôt tahen ta ntŭk rklaih đăp mpăn ăp ntŭk. Nău rđău bah Đảng ta 3 trong rdôl lơh tahen-chính trị-dân vận, địch vân, lĕ rngôch kơt ne ma he lĕ rklaih đăp mpăn miền Nam, kơp dơn ngoăy neh dak".