Ôi ntri (2/6), rlău 6.800 kon se nti n’gor Kon Tum lăp tâm Rơh sơch lăp kon se nti jrô 10 ơm đah môn thi bôk năp lah Ngữ văn, ƀư bài jŏ tâm 120 mnĭt. Rơh thi lăp nti jrô 10 năm nti 2025-2026 n’gor Kon Tum geh rlău 6.800 kon se nti râng thi, tâm rnôk nê rnoh âk dơi sơch lăp lah bơi 7.700 kon se nti. Gay rơh thi ƀư đăp mpăn, răp jăp, di quy chế Sở Giáo dục n’hanh Đào tạo n’gor Kon Tum ƀư 24 Hội đồng uănh thi ta 10 nkuâl, nkual ƀon têh; rgum rlău 1.050 cán bộ, nuĭh pah kan uănh thi.

Sở Giáo dục n’hanh Đào tạo n’gor Kon Tum an gĭt, nău sơch lăp nuĭh nti tâm jrô nti bôk gưl năm aơ dơi n’gor ƀư ơm rlău 1 khay gay đăp mpăn tĭng trong nchrăp dăp rgum tay nhih pah kan ăp gưl. Rơh thi sơch lăp nti tâm jrô 10 bah n’gor Kon Tum năm aơ geh âk ntŭk mhe. Kon se ƀư 3 bài thi lah Ngữ văn, Toán học n’hanh môn thi tâl pe dơi sơch bah ăp môn nti geh uănh năl ma rnoh điểm tâm bôk nău kan ntĭm nti phổ thông gưl THCS, đăp mpăn mô sơch ndrel du môn thi tâl pe rlău 3 năm mbro.