Êp du đê̆ nau đă, nau mbơh mpeh trong Quốc lộ 27 jur djơh, dak lip băm rnôk geh mih, mô geh ntŭk nkah mbơh, ƀư jêr khuch ân nŭih hăn ndrel ndeh klơ, ntrong điện tâm nkuăl jâk ir, điện mô dŏng mô tŏng nau ƀư kan tuch tăm ndrel nau rêh, ndŏk ân lă lêng ƀư hôl djơh, tăch ndrŭng brai ntil mô nâp, mô geh brai ƀư khuch tât nau văng sa...Cử tri xã Bình Thạnh, nkuăl Đức Trọng ngăn ngên uănh tât nau kan rnglăp nsum n’gor, nglăp nsum xã, ƀư rtŭt gleh ntrong kan Ngih dak, jăng lơi ntŭk kan nklang n’gul.

            Cử tri Đinh Công Hoán, Thôn Thanh Bình 3, xã Bình Thạnh, nkuăl Đức Trọng, n’gor Lâm Đồng ân lah, nau ân tâm rnglăp xã, n’gor, ƀư rtŭt gleh ntrong kan geh ƀon lan tâm ban nuih n’hâm, kâp rnơm. Yơn lah, tâm rnôk rgum, ntŭk kan ntrong kan ân geh săch ăp cán bộ geh nau blau ngăn ndrel nau dơi, nau rêh ueh:

            ‘Nau ntrŭnh tâm rnglăp ân rtŭt gleh ntŭk kan Ngih dak, n’huch nau jêr, prăk dŏng ƀư kan ri gâp tâm ban nuih n’hâm ngăn. Yơn lah, gay ntrong kan mhe lăp kan ân ngăn, săk tam ri nau kan uănh năl kloh nau blau kan bah cán bộ ân geh tŏng dơi nau đă ndrle pă kan ân tâm di nau dơi gay geh dơi ƀư nau kan gay rđau kan ân ueh aih. Du nau kan đŏng lah nau ntĭm mbơh nau mĭn, nau kan, nau blau gĭt bah nŭih ân geh uănh rjăp, gay tâm ban nau kan tĭng nau đă chính trị ndŏ luh”.

            Cử tri xã Bình Thạnh, nkuăl Đức Trọng, n’gor Lâm Đồng ŭch Quốc hội, Ngih dak ân ơm ƀư jêh nau ntrơn rgâl, ndâk Hiến pháp, pháp luật...gay tŏng dơi nau đă hun hao mhe bah neh dak, tâm dăch ma nau geh dơi bah nkual. Cử tri ntoh nau tâm ban nuih n’hâm đah Trung ương mpeh nau rtŭt gleh ntrong kan, ndâk ntrog kan 2 gưl, ƀư tâm rnglăp n’gor, jăng lơi nkuăl...Yơn lah, kônh wa ƀon lan kŏ rvê tât nau rnglăp n’gor hvi ir, jêr đŏng mpeh nau rnă njrăng đăp mpăn:

            Ntoh măt rmôt kan Quốc hội n’gor Lâm Đồng, wa Phan Đình Trạc rnê prêh nau rgop đă sŏng, geh nau tâm di bah cử tri. Nkre lah, kơp dơn ăp nau đă bah cử tri nkah đă n’gâng kan rklaih ăp nkô̆ nau geh tât nau dơi. Đah nau tâm rnglăp n’gor, tâm rnglăp xã, wa Phan Đình trạc lah rjăp nau ntrŭnh aơ mô knŭng ƀư rtŭt gleh nau kan Ngih dak, pah kan săk tam ma hôm pơk trong, nau nsôih mhe gay ntrŭt dăng hun hao neh dak.

            Mpeh nau rvê bah cử tri mpeh nau dăng blau ban cán bộ gay tŏng dơi nau tâm rnglăp nsum, Kruanh ban Nội chính Phan Đình Trạc rnê ngăn nuih n’hâm kan aơ bah kônh wa cử tri ndrel aơ lah ngoai tâm ăp nkô̆ nau ma Bộ Chính trị, Rnâng kan rđau kan Trung ương uănh khlay ndrel rƀŏng trong. Tĭng nuih n’hâm “nkre nchuăt, nkre dăp ntrong” yơn ân geh đăp mpăn tâm di nau dơi, nau nâp, ngăn lah rklaih ăp nau nkol mpeh ntrong kan, pă gưl kan dăng tât n’gor, ƀư êng ndơn êng, janh mĭn janh janh kan, janh ndơn nau, bah nŭih dâk bôk, rklaih nau kan tâm ntrôl, der. Wa Phan Đình Trạc lah rjăp:

            ‘Dăp rgum kơt nê Trung ương pă nau dơi dăng ân n’gor ndrel n’gor gay n’gor ntrŭnh nau, n’gor ƀư ndrel n’gor nơm ndơn nau tă geh ƀư nê. Gưl n’gor ƀư ăp nau kan tơm nkre ƀư tĭng nau ntrŭnh, nau đă tă bah Trung ương, nkre lah gưl ntrŭnh mbơh ăp nau đă, nkre ƀư tĭng nau rđau kan, mât ăp dĭng lĕ nau kan gưl xã tâm n’gor. Gưl xã ƀư ăp nau ntrŭnh đă tă bah Trung ương ndrel ntơm bah n’gor rđau, ndrel geh n’hao nau pă gưl kan, nau dơi, rklaih ăp nau kan geh dơi tĭng nau dơi bah gưl xã. Gưl xã đă ân geh tâm dăch ma ƀon lan, rklaih ăp nau đă bah ƀon lan tâm du trong tâm di năn”.

            Rnôk aơ, di nkah 50 năm Nar rklaih miền Nam, đăp mpăn neh dak (30/4), Kruanh Ban Nội chính Trung ương Phan Đình Trạc ntoh măt bah rmôt kan Quốc hội n’gor Lâm Đồng hŏ pă 10 nklâm ndơ, du nklâm geh rnoh du rkeh ân ăp rnăk dơi kơl, rnăk geh n’hâm ma cách mạng, tahen sôt rmanh ơm tâm xã Bình Thạnh, nkuăl Đức Trọng. Nklâm ndơ gay năn bonh đă, nkah nau roh hoach prêh khlay bah ăp tahen janh dăng, tahen sôt rmanh, rnăk geh n’hâm ma cách mạng ân nau rêh dah rŏng, hơm tăm, đăp mpăn ueh lăng nar aơ./.