Tĭng ƀư Đề án njŭn leo nuĭh hăn kan dak bah dih tĭng nău tâm ton lvang năm 2024 – 2026, n’gor Dak Lak n’gluh rnoh tât leo 7.500 nuĭh kan dak bah dih. Êng tâm năm 2025, n’gor nsrôih njŭn leo 2.500 nuĭh hăn pah kan dak bah dih, hao âk rlău bar tơ̆ n’gul rđĭl đah năm bah năp nơh. Gay tât rnoh ndơ̆ luh, Dak Lak hŏ rđău đă Ntŭk rgum mbơh joi nău kan ƀư nsum đah ăp doanh nghiệp geh nău dơi kan njŭn leo nuĭh hăn pah kan dak bah dih, leo ƀư nkoch trêng, mbơh nti ta ăp thôn, ƀon n’hanh tổ dân phố ta n’gor.

Nkre, n’gor an ƀư ký ton kan nsum đah Bộ Chỉ huy Quân sự n’gor gay ƀư mbơh nti an ăp druh ndăm bơi sĭt hăn tahen. Wa Nguyễn Quang Thuân, Groi Giám đốc Sở Nội vụ n’gor Dak Lak an gĭt, n’gor hŏ an ƀư geh nău dơi tam ăp trong ntop kơl nuĭh kan nti nău kan n’hanh hăn pah kan ta dak bah dih; lơn lah đah ƀon lan rnoi mpôl đê̆ dơi ntop kơl ntơm bah 12 tât 16 rkeh prăk an ăp nuĭh kan gay nti nău kan, nti nău ngơi n’hanh ƀư siƀŭt visa:

“Aơ lah tơm ndơ dŭt têh gay ntop kơl nta joi nău kan an ăp oh, lơn lah ƀon lan rnoi mpôl đê̆. Nkô̆ nău dja mpôl hên hŏ rđău đă an ăp Ntŭk rgum ntĭm nti nău kan, ntĭm nti mbro ta n’gor gay geh nău kan nsum ăp kôp. Aƀaơ Sở dôl pah kan tay đah ăp nhih  pah kan way rnâng kan gay geh trong kơl tâm di an nău ntĭm nti nău kan an druh ndăm rnoi mpôl đê̆ tâm ban kơt nta joi nău kan an ăp nuĭh dja đŏng.”