Ôi 30/5, Hội Liên hiệp bu ur n’gor Dak Lak ƀư Tâm nchră n’glôch jêh ăp đề án ntop kơl bu ur ntơm njêng nău kan n’hanh râng nkra ăp nkô̆ nău lam rêh jêng kon nuĭh. Rlău 9 năm an ƀư Đề án 939 “Ntop kơl bu ur ntơm njêng nău kan”, ăp gưl Hội bu ur lam n’gor hŏ kan nsum ƀư 168 jrô kơi năp nti mpeh nău ngăch blău tăch rgâl, mât bôk kan, njêng trong nchrăp n’hanh tât đah tơm prăk manh an hang rbăn hội viên.

Âk rơh tâm nchră, dơi ƀư gay nta trong an oh yuh bu ur tâm mâp, tâm pă nău tă ơm gĭt kan. Hội hŏ njêng 5 câu lạc bộ doanh nghiệp bu ur, ntop kơl njêng 4 doanh nghiệp n’hanh bơi 90 hợp tác xã, rmôt tâm boh tă bah bu ur ƀư tơm; ntop kơl rlău 4.700 bu ur manh tơm prăk n’hanh n’glăp ndơ geh ƀư ta ntŭk tăch rgâl điện tử. Tâm nchră n’gluh trong rƀŏng ntop kơl bu ur ntơm njêng nău kan nkre đah bôk nău kan “Ăp xã du ntil ndơ geh ƀư”, nkre dăn đă trong kơl n’hanh trong nkra ăp tŏng đề án rơh bah kơi tay.