
Ăp năm rlău aơ, ăp công ty cao su mpeh Binh đoàn 15 gŭ kan ta 2 n’gor Gia Lai n’hanh Kon Tum way an sơch lor nău kan, ntĭm nti nău kan an nuĭh rnoi mpôl đê̆. Nău krêp dêh đah nuĭh ƀon lan ta ntŭk mô dơn kơl đăp mpăn nsĭt geh nău dơi yach ngăch nău kan, tăch rgâl bah tĭng đơn vị, ma hŏ rgop hun hao ăp ntil tâm nău rêh bah nuĭh kan lah ƀon lan rnoi mpôl đê̆ ta n’gor.
Nô Rơ Châm Dun, 30 năm deh, (nuĭh Jrai, gŭ ta ƀon Ngol Rông, xã Ia Krêl nkuâl Đức Cơ) dơi Công ty 74, Binh đoàn 15 sơch lăp ƀư công nhân kor rtăk cao su ntơm bah bôk năm aơ. Nô an gĭt, đah rnoh prăk khay 7 rkeh prăk 1 khay, nô hŏ geh nău rêh đăp mpăn lơn.
“Lor rnôk lăp ƀư công nhân ri rnăk gâp dŭt jêr jŏt, aƀaơ geh jay gŭ, geh nău kan ri gâp ŭch rŏng dơi đăp mpăn, bah kơi tay oh kon dơi nti ren, gâp lah uĕh công ty hŏ kơl gâp”

Gay tĭng ƀư jăp nău kan hun hao wăng sa nkre đah rdâk nâp njrăng n’gang neh dak-rnă njrăng năm 2025 n’hanh ăp năm bah kơi tay, Binh đoàn 15 geh nău ŭch sơch lăp 1.489 nuĭh kan ta n’gor Gia Lai. Ta nkuâl n’har bri Đức Cơ, geh Công ty 74, Công ty 75, mpeh Binh đoàn 15. Tâm ăp năm aơ hŏ ntĭm nti bơi 2.000 tơ̆ nuĭh kor rtăk cao su lah ƀon lan rnoi mpôl đê̆ ƀon tơm ta ntŭk. Đại tá Trịnh Hà Tâm-Giám đốc Công ty 75 nkoch mpeh nău nta joi nău kan an nuĭh ƀon lan ta ntŭk:
“Công ty 75 hŏ sơch ăp nuĭh kan, 100% lah nuĭh kan ƀon tơm ta ntŭk. Rnôk ntĭm nti ntop kơl ri he ntop kơl lĕ mpeh ndơ dŏng kan kơt kơl an bah pêh gay khân păng nti n’hanh ntĭm khân păng trong ƀư yor rêng ƀư ân geh kỹ thuật dŭt âk n’hanh ndê na nê̆, yor kơt nê̆ rmôt ntop kơl ntĭm n’hanh cán bộ way nhŭp ti nchŏng kan grêt dăch 3 ndrel đah nuĭh kan”
Đại tá Khuất Bá Cao, Bí thư Đảng ủy, Groi Tư lệnh Binh đoàn 15 lah rjăp, đơn vị way an sơch lor nuĭh ƀon lan rnoi mpôl đê̆ ƀon tơm ta ntŭk lăp ƀư công nhân; aơ lah ngoăy tâm ăp trong nchrăp khlay bah Đảng ủy, Bộ Tư lệnh Binh đoàn 15. Bah nê, rgop hun hao wăng sa, n’hao nău rêh an nuĭh ƀon lan, mât nâp rnă njrăng chính trị, rĭng grep lam rêh jêng kon nuĭh nkual n’har bri. Đại tá Khuất Bá Cao lah rjăp:
“Bơi 8000 nuĭh ƀon lan rnoi mpôl đê̆ bah Binh đoàn dơi mpôl hên mât uănh. Mpôl hên hŏ rđău đă ăp ntŭk kan bah binh đoàn mât uănh khlay, n’hao săk blău kan tâm ban kơt an lor sơch lăp nuĭh ƀon lan rnoi mpôl đê̆ ƀư công nhân ta ăp ntŭk kan gay đăp mpăn nău rêh, nău nsĭt geh wăng sa an kônh wa ma âk tơm ndơ, trong nkra gay kơl an kônh wa mpeh nkô̆ nău drăp ndơ n’hanh ndơ dŏng kan, rsong hăn, kỹ thuật, kon ntil, tơm prăk. Rôih nkoch trêng rgŏ jă kônh wa kan, nuĭh kan geh kĩ thuật, hăr blău ti kan”

Tâm 40 năm aơ, ta nkual bah lơ Tây Nguyên, Binh đoàn 15 tĭng ƀư ndrel đah nău dơn kan wăng sa n’hanh njrăng n’gang neh dak. Aƀaơ đơn vị mât dŏng rlău 44.295 ha cao su n’hanh bơi 400 ha ba, tuh mbo, ndrel 6 nhih máy nkret njêng rtăk cao su đah rnoh dăng 55.000 tấn/năm. Binh đoàn hŏ rgop rlău 2.800 rmen prăk tâm ngân sách ngih dak, nta joi nău kan đăp mpăn an rlău 16.000 nuĭh kan, tâm nê rlău 60% lah nuĭh ƀon lan rnoi mpôl đê̆. Trong ntĭt leo “Nkrêp đah rnăk wâl” đah nuĭh Yuăn n’hanh nuĭh ƀon lan rnoi mpôl đê̆ đah rlău 4.200 rnăk, rgop êt lhăt nău tâm rnglăp, n’hao geh nău rêh nuĭh ƀon lan. Bu ranh ƀon Rơ Châm Chich, ta ƀon Beng, xã n’har bri Ia Chía, nkuâl Ia Grai, Gia Lai an gĭt, nơm geh trong nchrăp bah Binh đoàn 15 sơch lăp ƀư công nhân jêng nău rêh bah kônh wa dơi n’hao kloh.
"Binh đoàn 15 hun hao lĕ ma du nkual bri cao su, cà phê ta n’har bri Ia Grai, Chư Prông, Đức Cơ, nău rêh bah kônh wa rgâl geh n’hao kloh. Ta xã gâp, công nhân bah công ty 74 (Binh đoàn 15) geh 7 rmôt tuch tăm. Êng ƀon gâp geh 200 nuĭh Jarai ƀư công nhân. Lơn lah công ty dŭt uănh khlay tât ăp rnăk krêp dêh, ntĭm nti tăm n’hanh mât chăm mir tơm, tăm ba lŏ. Rnoh geh nău rêh bah kônh wa rgâl lam lĕ rngôch".
Binh đoàn 15 hŏ tĭng ƀư jăp pah kan rgŏ jă, rgop tĭng ƀư jăp nău dơn kan wăng sa njrăng n’gang neh dak, đăp mpăn rnă njrăng ta nkual n’har bri n’gor Gia Lai, Kon Tum. Binh đoàn hŏ nta joi nău kan đăp mpăn an 9.000 nuĭh ƀon lan rnoi mpôl đê̆ geh nău kan; leo ƀư rlău 4.200 rnăk công nhân nuĭh Yuăn đah nuĭh ƀon lan rnoi mpôl đê̆ krêp dêh, tâm kơl nsum hun hao wăng sa.

Nău mât chăm nău rêh an công nhân, lơn lah công nhân nuĭh ƀon lan rnoi mpôl đê̆, mô dơn n’glĕ ta trong nta joi nău kan n’hanh n’hao geh wăng sa, ma hôm lah njăr trong jong krêp dêh đah doanh nghiệp, n’gâng kan ta ntŭk n’hanh ƀon lan đŏng. Ăp nău kan ngăn ngăn bah Binh đoàn 15 tâm âk năm aơ lah ndơ an saơ nuih n’hâm dơn kan, yor ma nsum mpôl- yor ma nău hun hao jŏ jong bah nkual n’har bri Tây Nguyên.
Viết bình luận