Ta nkual ƀon têh Gia Nghĩa, N’gâng kan Công an tâm rgop đah UBND n’gor Dak Nông ndrel ăp ntŭk kan ntop ƀư rgŏ jă âk hăn ndâk ƀư, jŭt ngih rông mpông sat; nkre wơt dơn prăk n’hanh jao an jay ƀư lor an nuĭh ƀon lan. Yuh H’Yơi (Rnoi nuĭh Bunong) ta ƀon Ting Wel Đơm, xă Đắk Nia, nkual ƀon têh Gia Nghĩa răm rhơn rnôk wơt dơn jay ƀư lor têh uĕh an gĭt:

Băng: Lĕ rnăl wâl răm ngăn yor dơi lăp wâl mhe gŭ. Lĕ wâl 6 nuĭh răm ngăn, mô hôm rwê mih sial lăp tâm yan mih, duh m’hul tâm yan wai. Ta năp đaơ mô geh jay gŭ manh jay u, che, aƀaơ geh jay mhe ri mô hôm gŭ manh tay. Lah uĕh Đảng n’hanh ngih dak, nău kan Công an.

Mpông jay mhe leo lor dơi jao an rnăk wâl yuh H’Yơi hvi nklăp 50 m2, mon lĭr mpir gạch, chor ntưm tôr, jâng neh ntă gạch men. Dĭng lĕ prăk ndâk ƀư lah 120 rkeh prăk, tâm nĕ 60 rkeh prăk bah tơm prăk rgŏ jă ntop kơl bah N’gâng kan Công an, 20 rkeh prăk bah tơm prăk ƀon lan, hôm ƀa ƀă yor ăp nuĭh lŏng bôk tôr ntop kơl n’hanh rnăk wâl manh lor.

Trung tướng Phạm Thế Tùng-Groi kruanh N’gâng kan Công an, N’gâng kan rgŏ jă tay ăp nuĭh lŏng bôk tôr ndrel ty jut jăng rlău 4.400 mlâm jay truh sat ta lam dak, đah rnoh prăk nklăp 280 rmen prăk. Êng đah n’gor Dak Lak, N’gâng kan lĕ rgŏ jă n’hanh jao an 30 rmen prăk gay ntop kơl ndâk ƀư 500 mlâm jay an rnăk ach o, êp ach o n’hanh rnăk dơi kơl geh jêr jŏt đah jay gŭ. Trung ương tướng Phạm Thế Tùng nkoch nău nsing nơm, ăp jay nâp nâl aơ mbra kơl nuĭh ƀon lan đăp mpăn nău rêh.

Gâp lah uĕh ngăn nău tâm rgop rjăp bah ăp n’gâng kan nău kan n’hanh ăp nuĭh ntop kơl lĕ hăn ndrel đah N’gâng kan Công an ƀư tĭng bôk nău kan âk nău khlay n’hanh âk nău kơl nuĭh aơ. Gâp nsing nơm, đah ntŭk gŭ mhe nâp nâl, kloh uĕh, đăp mpăn nău rêh, ăp rnăk wâl mbra đăp mpăn pah kan nkra njêng, hao tâm nău rêh; nsrôih râng đăp mpăn rnă njrăng ta ntŭk, ndâk njêng tâm ntrong leo hun hao wăng sa-rêh jêng ta ntŭk.

Tĭng trong nchrăp, n’gor Dak Nông mbra jut jăng dĭng lĕ 1.755 rnăk jay truh sat, ntop kơl rnăk ach o, êp ach o, rnăk dơi kơl n’hanh ƀon lan rnoi mpôl đêt ta lam n’gor. Kơp tât rnôk aƀaơ, n’gor lĕ jêh nklăp 75% rnoh nău kan n’hanh nchrăp mbra jêh nău jut jay truh sat bah năp nar 30/8 năm aơ.

Rƀŏng tĭng ntrong leo jut ngih rông mpông sat yor chính phủ rgŏ jă, năm bah năp N’gâng kan Công an lĕ rgŏ jă ndâk ƀư rlău 28.600 mlâm jay n’hanh âk ntŭk ngih sam ƀŭt, đah dĭng lĕ prăk rlău 1.400 rmen prăk. Êng bah bôk năm 2025 tât aƀaơ, rmôt Công an lĕ rgop 362 rmen prăk bah prăk khay gay ndâk ƀư hăng rbăn mlâm jay tâm kơl an ăp rnăk ta Cao Bằng n’hanh Gia Lai.

Kơp tât n’gul khay 5, lam n’gor Gia Lai lĕ ntơm ndâk ƀư n’hanh nkra nklăp 7 rbăn n’gul mlâm jay truh sat, geh rlău 90% trong nchrăp. Tĭng kơp uănh, tât aƀaơ, tâm n’gor Gia Lai lĕ geh 7 ntŭk kan gưl nkuăl jêh rnoh ƀư trong nchrăp geh: Nkual ƀon têh Pleiku, nkual têh An Khê, nkual têh Ayun Pa, ăp nkuăl Đăk Pơ, Đức Cơ, Krông Pa n’hanh Phú Thiện. Âk ntŭk bôl mô hŏ jêh yơn geh rnoh jay truh sat dơi jut jăng âk kơt nkuăl Mang Yang jêh 707 mlâm jay (geh rlău 85%), Krông Pa 404 mlâm jay (73,3%), Chư Pưh 437 mlâm jay (46,5%),...

Wa Nguyễn Quyết Thắng, Kruanh UBND xă Ia Peng, nkuăl Phú Thiện, n’gor Gia Lai an gĭt, đah nău geh êng ta nkual rnoi mpôl đêt, nuĭh ƀon lan geh nău ŭch ƀư jay nhih way ơm, n’gâng kan ƀon lan nta an kônh wa geh jay nhih tâm di đah nău way ơm.

Tâm rnôk mbơh ƀư ri mpôl hên jă ăp rnăk ƀon lan tât gay tâm ban ŭch rnôk ndâk ƀư, nkra jay ri geh nuĭh ƀon lan nkra n’hanh ƀư mhe ƀư jay nhih way ơm. Tĭng nkô̆ nău nĕ ri mpôl hên nchrŏng an nuĭh ƀon lan ƀư jay nhih di đah rnoh neh, đăp mpăn “3 nâp dăng” n’hanh kloh uĕh.

Âk rnăk ƀon lan lĕ manh tay prăk gay pơk hvi rnoh neh jay n’hanh ndâk ƀư tay jâng gung, mpêr n’gar, jay ăch chrach. Knơm nĕ, tât aơ tay, bôk nău kan jut ngih rông mpông sat ta Gia Lai lĕ kơl rlău 4.500 rnăk ach o đăp mpăn nău rêh, nkre an rgâl na nê̆ mpeh muh măt thôn ƀon, n’hao nău nsing nơm bah nuĭh ƀon lan đah ăp nău ntrŭnh, nău kơl đăp mpăn rêh jêng bah Đảng n’hanh Ngih dak.

Bôk nău kan jut ngih rông mpôl sat mô knŭng nsĭt tay rnăk wâl kloh uĕh, nâp nâl an hăng rbăn rnăk ƀon lan ach o, ma hôm lah an saơ nău rêh an nuih n’hâm “yor nuĭh ƀon lan rhŏ kan” bah rmôt Công an ƀon lan, nău ndrel ty lĕ đah nău kan bah ăp gưl, ăp nău kan n’hanh lĕ kon nuĭh. Ăp chor jay mhe mô knŭng kơl nuĭh ƀon lan đăp mpăn nău rêh, đăp mpăn hun hao wăng sa, ma hôm rgop ƀư rgâl muh măt thôn ƀon, n’hao nău nsing nơm bah Nuĭh ƀon lan tâm nău kơl đăp mpăn rêh jêng bah Đảng, Ngih dak.