Wa Ka Phu Beng lah nuĭh Cơ Tu ta xã Cà Dy, nkuăl Nam Giang, n’gor Quảng Nam. Aƀaơ lĕ jêng rnăk vâl geh nău geh âk yơn wa hôm nha ê hŏ geh chuêl ăp nar kăl e dŭt jêr jŏt, ur sai pah kan ŏ r’ah yơn nău rêh  mô tŏng ba năp pah pĭt ba kơi.

Djăt tĭng nău cán bộ xã rgŏ jă n’hanh ntĭm trong pah kan jan sa, wa nănh manh  50 rkeh prăk bâh Ngân hàng chính sách xã hội gay ma nkra mhe neh tăm, rgâl tơm tăm sa play, tăm bri, lôch nĕ pơk hvi neh mât rong. Aƀaơ wa Ka Phu Beng geh săch lah ƀon lan kan lŏ mir dŭt blău ta nkuăl.

 “Rnăk vâl gâp rong geh 6 mblâm ndrôk me deh kon, khay mhe nơh geh tăch 2 mblâm, 7 rkeh prăk ăp mblâm. Nău geh tât 80 rkeh prăk/ du năm. Rnăk vâl tăm tơm sa play tăch geh âk đŏng. Ăp n’gâng kan têh ta nkuăl Nam Giang ntĭm mât chăm mpeh kĩ thuật mât rong, tuch tăm. Ntĭm mbơh an ăp rnăk ƀon lan ta ntŭk. Ăp nău geh bâh tăm bri, mât rong, rnăk vâl lĕ sâm geh, bah ach o. Bâh nĕ, rnăk vâl geh ƀư jay, mât rong an 3 hê kon hăn nti Đại học da dê”.

Nkuăl Nam Giang geh klâp ma 80% rnoh nuĭh lah ƀon lan rnoi đê̆. Ta ntŭk geh 200 nău kan ƀon lan ƀư pah kan jan sa tâm rgop đah tuch tăm, mât bri, hun hao wăng sa rgum nsum tĭng rmôt tâm rgop kan ndrel, rgâl mhe tơm tăm, ntil rong. Âk rnăk ƀon lan geh nău geh đăp mpăn bâh bar pe jât rkeh tât bar pe rhiăng rkeh prăk/năm. Wa Châu Văn Ngọ, groi kruanh UBND nkuăl Nam Giang an gĭt, bâh ăp rnoh kơl an bâh ngih dak n’hanh n’gor, rlău ma nău ntuh kơl ndơ dŏng ntung trong, nkuăl Nam Giang kơl an ƀon lan rdâk njêng âk nău pah kan jan sa na nê̆ tâm di đah nău ngăn ta ntŭk , kơl an khân păng n’hao nău geh. Aƀaơ rnoh rnăk ach o ta nkuăl Nam Giang lĕ huch hôm 25%. Râng geh ăp năm, rnăk ach o hŭch rlău 8%.

 “Bâh nău kơl an mpeh ntuh kơl bâh Ngih dak tâm ban kơt rgum lĕ ăp rnoh nău kan, nkuăl Nam Giang lĕ mbơh tơih ƀư tĭng  ăp bôk nău, nău nhrăp kan ta ntŭk.  Rlău ma nău ntuh kơl ndơ dŏng ntung trong tơm khlăy gay ma kơl an nău pah kan jan sa n’hanh nău rêh jêng, hôm nha geh kơl pah kan jan sa, kơl nău rêh jêng an  ƀon lan, ngăn lah ăp rnăk ach o, rnăk dăch ach o, rnăk mhe hun hao bah ach o gay ma kơl an ƀon lan geh rnoh kan bah ach o an nâp nâl. Tâm nĕ, geh ăp nău kan hun hao pah kan sa jan tĭng trong tâm rgop đah nau khlăy ndrel đah doanh nghiệp gay ma rvăt lĕ rngôch ntil ndơ geh ƀư. Yor kơt nĕ lĕ ntop kơl an nău kan n’huch ach o nâp nâl, rdâk njêng nkual ƀon lan mhe”.

Ăp bôk nău kan nkô̆ mpŏng ngih dak, khlăy ngăn lah bôk nău kan nkô̆ mpŏng ngih dak mât đăp mpăn n’huch ach o nâp nâl lĕ kơl an rbăn rnăk ƀon lan nkual ƀon lan rnoi đê̆, nkual njônh ngai, nkual gôl yôk n’gor Quảng Nam geh kơl nău pah kan jan sa, pă tơm ntil, ntĭm nti mpeh kĩ thuật mât rong tuch tăm, kơl an khân păng pơk hvi nău pah kan jan sa. Wa Hồ Quang Bửu, Groi kruanh UBND n’gor Quảng Nam an gĭt.

 “Ăp bôk nău kan nkô̆ mpŏng kan bâh trung ương tâm ban kơt ăp rnoh tơm prăk ngih dak bâh n’gor lĕ geh kơl an ƀon lan nkual rnoi đê̆ n’gor Quảng Nam lĕ n’hao geh săk rnglăy, ƀư rgâl nău rêh hun hao wăng sa rêh jêng ta gôl yôk. Aƀaơ, mpôl hên dôl ntĭm đă pơk hvi nău kan aơ mhâm ƀư âk rnăk ƀon lan tâm ban kơt ntŭk rêh jêng, ngăn lah ta nkual gôl yôk tâm di ŭch đah hun hao ta ăp nău kan aơ. Bâh nĕ, ntop kơl âk an nău n’hao nău geh, n’huch ach o an nâp nâl”.