Ntoh ngơi ntơm ƀư rƀŭn nchră, Kruanh Quốc hội Trần Thanh Mẫn an gĭt, Rơh rƀŭn tal 9, Quốc hội khóa 15 ntơm ƀư ta 5/5 (jêh rơh rlu lễ 30/4 n’hanh 1/5), dơi pă jêng 2 rơh gay uănh mĭn tay, ntrŭnh rnoh nău kan dŭt têh, âk nkô̆ nău geh nău khlay, nău ndăn nkre dơi Trung ương kơp dơn ngoăy nău ntrŭnh ta Rƀŭn nchră rơh tal 11. Nchrăp rơh rƀŭn mbra uănh mĭn tay, ntrŭnh 45 nkô̆ nău mpeh ndâk njêng pháp luật geh tât nău dăp ntŭk kan hành chính ăp gưl, đêt dơh tŏng ăp n’gâng kan; 14 rmôt nkô̆ nău mpeh wăng sa-rêh jêng, tơm prăk ngih dak, groi nđôi n’hanh ăp nău khlay êng.

Ta Rƀŭn nchră, Thủ tướng Chính phủ Phạm Minh Chính mĭn lah: Chính phủ mbra nsrôih dŭt n’hâm, djăt n’hanh rhăt jăp djăt ăp nău rgop gay Rơh rƀŭn geh săk rnglăy uĕh ngăn. Ăp nkô̆ nău mbơh an Quốc hội lĕ dơi uănh na nê̆, tĭng nuih n’hâm an geh tâm ngih dak, rnoi nuĭh bôk năp. Thủ tướng nkoch nău nsing nơm, đah nău rđău bah Đảng, nău kơp dơn bah Chính phủ, nău tâm ban nuih n’hâm bah Quốc hội, nău kơl bah nuĭh ƀon lan, Rơh rƀŭn tal 9 mbra lôch uĕh; rêng hvi tay mpeh nău khlay bah rơh cách mạng đêt dơh tŏng ăp n’gâng kan hành chính.