Nau kan rgum FDI tâm rach năm mhe-ndrih ndrel nâp nâl
Thứ ba, 07:00, 06/05/2025 VOVTaynguyen VOVTaynguyen
VOV4.M'nông: Tĭng n’gâng kan tơm prăk, ntơm bôk năm tât rnôk aơ, Việt Nam geh rlau 42.700 nau kan FDI hôm geh nau tam, đah rnoh prăk đăng ký geh rlau 510 rmen đôla. Ntŭk ntuh kơl ta Việt Nam hŏ geh rgâl bah nau kan rgâl trong kan hành chính, ƀư jêh pháp luật, n’hao ntŭk ntu gung trong ndrel n’hao nŭih kan. Rnơm nê, Việt Nam hŏ jêng ntŭk tât ueh bah ăp rmôt kan văng sa têh.

Tơm prăk ƀư kan bah ăp rmôt kan Samsung, Intel, Foxxcon, Amkor...hôm lăp tâm Việt Nam. Êng năm 2024, FDI rgop geh 16,5% tơm prăk ntuh kơl lam nau rêh, bơi tât 72% rnoh prăk tăch luh, rlau 20 rmen đôla tâm tơm prăk ngih dak. Êp nê, nau kơp ân saơ, ntŭk FDI hŏ rgop nau rklaih pă rlau 5 rkeh nau kan, n’hao nâp nŭih kan tơm kan ndrel leo nsĭt nau geh âk ân nŭih pah kan. Kruanh n’gâng kan tơm prăk Đỗ Thành Trung, lah rjăp:

            ‘Mpeh chính phủ, hên nsôih rgâl ân jru hvi tâm âk ntrong, ntơm bah nau geh soay, nau kan hải quan ân tât nau ntrŭnh ntuh kơl. Nkô̆ lah n’hao nau dăng, rhuăt gleh mông rklaih, n’huch prăk dĭng ndrel rgop nau pơk trong nơih ân nau geh dơi ân ntŭk kan ntuh kơl tuch tăm, tăch rgala tâm Việt Nam”.

            Tĭng ăp nŭih nchră mbơh nau kan, tâm rnôk lam ntur neh dôl âk nau tât, ƀư ntrơn âk nau pă lam ntur neh. Tơm prăk FDI tâm lam ntur neh kŏ rgâl tĭng trong huch nau nsing tâm neh dak ma rgâl đah nau n’hao ntuh kơl tâm ăp nau kan prêh, nau blau njêng mhe kŏ geh nsum ma nau dơi huch nau hôl khih duh. Êp nê, nau đăp mpăn ntrong pă ndrel đăp mpăn chính trị nar lơn geh uănh lah nau dơi tâm nau ntuh kơl.

            Đah Việt Nam, nau dăng ntul rlong mô êng tă bah nau kan tâm ntŭk bơi tât 100 rkeh nŭih ndrel rnoh dŏng hao ngăch, ma hôm rnơm trong 17 nau ton tăch rgâl dah rŏng, tâm nê geh âk FTA nau mhe kơt CPTPP, EVFTA ndrel RCEP...lah ngoai tâm ăp nau kan văng sa geh nau pơk âk ngăn lam ntur neh, đah rnoh ƀư nau kan tăch rgâl geh rlau GDP hao tât 200% ndrel ma ntŭk ntu mô rlu geh n’hao, ntŭk kan tăch rgâl nâp, chính trị đăp mpăn ndrel nau rgum ƀư kan ueh, Việt Nam lŏ pơk trong jêng ntŭk tât ân tơm prăk FDI.

            Wa Chaturon Thippiansak, Groi Tổng Giám đốc Công ty TNHH SCG Việt Nam, lah du ntŭk kan leo trong hun hao ndrih ndrel nâp, đă:

            ‘Ăp ntŭk kan ân geh nau kan tĭng n’gor nơm ƀư nâp ndrel n’hao nau dăng rdâng dơi đah ăp nau tât bah văng sa lam ntur neh, prăk dŏng ndơ ndrel nau pă ndrih, mô lah nau dơi SCG nâp. Ta SCG, hên uănh nau ntrơn rgâl aơ lah nau ueh gay leo trong bah ăp nau dơi ƀư nâp, nau kan tăch rgâl geh nau dơi ueh drel tâm boh rjăp, rgop nau ntrŭt dăng nau hun hao ndrih bah Việt Nam”.

            Việt Nam dôl tât tâm rnôk mhe đah nau ŭch hun hao geh dơi bar n’gâng hun hao khlay tâm năm 2030 ndrel 2045. Nau tơm lah ân rlet nau tŭp rŭch, der tât tâm nau nau geh dơi mô prêh. Tâm nê nau hun hao văng sa rlau 8% năm 2025 ndrel nsôih bar rnoh mrô tâm rơh ntop tay. Yơn lah, nkô̆ nau aơ ân geh tâm nau tât lam ntur neh dôl rgâl ngăch, jêr rdâng, ngăn lah rgâl nau soay tă bah Hoa Kỳ, neh dak geh nau tât khuch bah trong kan tăch rgâl ndrel ntuh kơl lam ntur neh. Wa Trần Thị Hồng Minh, Kruanh Viện mĭn njêng nau kan ndrel nau ntuh kơl mbơh:

            ‘Nkô̆ nau bah ăp nau kan aơ gay rƀŏng tât tâm rơh tât, hên mra njêng du nau kan FDI tâm rôk năm mhe gay ƀư ueh nau săk tam ndrel nau rêng lam bah ăp ntŭk kan FDI tâm nau kan văng sa Việt Nam, du nau kan ma tâm âk năm rlau aơ nơm hŏ kâp rnơm. Ndrel aơ lah ăp nau geh mbơh khlay gay ân ăp ntŭk kan bah Đảng, Nguh dak ƀư nau nchrăp kan geh tât hun hao văng sa bah Việt Nam tâm rơh tât ndrel ngăn lah nkô̆ gay nơm geh dơi hun hao 2 rnoh mrô tâm lvang ănm 2026-2030’.

            Ŭch lah, đah ăp nau kan n’hêl ntơm bah ăp ntŭk kan, nau hăn ndrel bah nsum mpôl ntŭk kan tăch rgâl, Việt Nam mra njêng dơi du ntŭk ƀư nau kan ntuh kơl ntul rlong, ueh, săk tam, mô knŭng tâm ntŭk kan tâm dak ma n’ăp ma lam ntŭk ƀư kan tăch rgâl FDI, dôl ndrel mra săch Việt Nam lah ntŭk tât./.

VOVTaynguyen

Viết bình luận

TIN CÙNG CHUYÊN MỤC