Nar 26/5, ta Hà Nội, Kruanh dak Lương Cường n’hanh Tổng thống Pháp Emmanuel Macron ndrel leo mpôl ntơh măt gưl têh bar dak ƀư tâm nchră.  

Tâm mông nar tâm rnglăp n’hanh nsing nơm, bar kruanh rđău kan hŏ tâm mbơh nsum mpeh nô nău wăng sa, rêh jêng kon nuĭh bah  ăp dak; rnê âk mpeh ăp njuat hun hao bah tâm  boh bar ding tâm bah ri aơ nơh, nkre tâm ôp n’hanh dơn ngoăy mpeh  ăp bôk nău kan tâm boh đah bar dak tâm let năp tay. Kruanh dak Lương Cường n’hanh Tổng thống Pháp tâm ban ŭch ntrŭt ntrôl ntuh kơl tăch rgâl; an ƀư n’hanh mât dŏng geh nău tam Hiệp định dah rŏng tăch rgâl Việt Nam - EU.

Pháp mbra ntrŭt ntrôl ơm ƀư wat jêh uănh an dŏng Hiệp định mât nkrum ntuh kơl EU - Việt Nam, ntrŭt ntrôl Ủy ban châu Âu ơm ntlơi jăng “thẻ vàng” IUU đah ndơ tăch tui ka Việt Nam n’hanh nta trong dơh gay Việt Nam n’hao âk tăch n’gluh tui ka tâm dak Pháp n’hanh EU. Bar kruanh rđău kan tâm ban ŭch n’hao dăng tay n’hanh ntrŭt ntrôl tâm boh tâm ăp trong kan way ơm kơt ntĭm nti, dak si n’hanh tư pháp tâm ban kơt trong kan văn hoá – pâl nđaih, tuch tăm n’hanh rdâng lơh đah rgâl n’hâm sial trôk nar đŏng. Lôch tâm nchră, Kruanh dak Lương Cường n’hanh Tổng thống Pháp uănh saơ lễ tâm rgâl ăp siƀŭt tâm boh ta âk ntil trong kan njrăng n’gang neh dak, rnă njrăng, khoa học công nghệ, ŭnh nar hạt nhân, tư pháp, ntung trong nchuăn rdeng, trong trôk vũ trụ, tuch tăm mât rong n’hanh ntŭk gŭ rêh, dak si…/.