Ntơm bah rnôk geh nău lư mpeh n’glăp n’gor Dak Lak đah Phú Yên, nchrăp ƀư bah năp nar 1/7, n’hanh ntŭk rgum nhih pah kan n’gor mhe mbra ƀư ta nkual ƀon têh Buôn Ma Thuột, âk nar rlău aơ, ntŭk tăch rgâl neh ntu ta nkual dja năl hao khlay ngăch. Rnoh neh hao khlay, tăch rgâl neh ntu hao âk ndal, ndrel đah nău ŭch geh ƀư siƀŭt neh ntu bah nuĭh ƀon lan hao âk, hŏ jêng tât geh nău lhăt bêng ir ta du đêt ntŭk dơn n’hanh nkra ƀư siƀŭt neh ntu.  

Ăp nar dja, ta Nkual đô thị Ân Phú, phường Tân Lợi, nkual ƀon têh Buôn Ma Thuột, bar pe jât nuĭh rgum tât tăch rgâl - neh ntu, ƀư neh ntu hao khlay ndal tĭng nar. Bar khay bah năp nơh, du blah neh hvi 100 m² ta aơ dơi nkơnh tăch nklăp 2 rmen prăk, ri aƀaơ hŏ hao tât 2,5 rmen prăk. Mô dơn neh ta ăp nkual đô thị hao ngăch, ma neh ta âk phường, xã n’hanh nkual meng nkual ƀon têh Buôn Ma Thuột năl geh ta rnoh hao nklăp 20%. Wa Phạm Thị Thanh, ta phường Đạt Hiếu, thị xã Buôn Hồ, n’gor Dak Lak, an gĭt: kon ƀăn păng dôl pah kan tâm ăp nhih pah kan ngih dak ta n’gor Phú Yên. Lah bar n’gor n’glăp nsum, nklăp kon ƀăn păng ân ntrơn sĭt Buôn Ma Thuột pah kan n’hanh gŭ rêh. Yor kơt nê̆ rnăk wa Thanh ndăn joi rvăt neh nchrăp rdâk mon jay.

“Tăng rphut rphut lah n’glăp n’gor đah aƀaơ 2 khay gâp hao Nkual đô thị Ân Phú ôp du blah neh 100 m² ri khân păng lah 2 rmen prăk, gâp wĭ wĕ mô rvăt. Yơn aƀaơ hŏ gĭt ngăn Dak Lak n’glăp nsum đah Phú Yên ri gâp hao ôp tay, khân păng lah 2,6 rmen prăk. Rnoh khlay ir, yơn nău mĭn cán bộ ta Phú Yên ŭch đăp mpăn geh ntŭk gŭ rêh ri ân rvăt gay ƀư jay an kon. Nklăp gâp nsrôih rvăt dơm, klach neh hao khlay tay.”

Wa Phan Thái Bình,  Giám đốc du công ty neh ntu ta Buôn Ma Thuột an gĭt, đah 100 nuĭh tăch rgâl, rĭng ăp nar công ty tăch rgâl geh nklăp 20 siƀŭt tâm ton tăch rvăt neh jay. Rđĭl đah rơh rngơt rngăt tâm kêng dŭt năm 2022, ri aơ lah rnoh tăch rgâl neh ntu dŭt uĕh.

“Uănh nsum, ntŭk tăch rgâl neh ntu ta Dak Lak dôl geh âk trong rƀŏng săk ntơr rđĭl đah ntơm nơh. Nău ŭch geh ngăn hao, du gâl tă bah ntlơi gưl nkuâl, cán bộ dơi rgum sĭt xã, du đêt êng rgâl hao Buôn Ma Thuột pah kan. Bah meng nê, âk nuĭh rlu ranh ŭch sĭt Buôn Ma Thuột gŭ rêh đŏng. Rlău ma nê, lôch tăng nău lư n’glăp n’gor, ntơm nơh hŏ geh năch bah Dak Nông hao rvăt, aƀaơ geh tay năch bah Phú Yên. Khân păng lah ăp nuĭh geh nău ŭch rvăt gŭ ngăn.”

Nchih rgum bah Văn phòng Đăng ký neh ntu- Sở Nông nghiệp n’hanh Môi trường n’gor Dak Lak an saơ, tâm quý I năm 2025, ăp ntŭk kan mpeh đơn vị hŏ dơn n’hanh nkra bơi 75.000 hồ sơ geh tât siƀŭt neh ntu, hao rlău 17% rđĭl đah ndrel khay dja năm e nơh.

Wa Hoàng Xuân Phương, Groi Giám đốc mât uănh Văn phòng Đăng ký neh ntu năl geh ngăn, rnoh âk siƀŭt đăng ký hao âk ndal, hŏ ƀư âk rnôk ta ăp ntŭk kan du mpông ta nkual ƀon têh Buôn Ma Thuột n’hanh nkuâl Cư M’gar tŭp tâm nău lhăt bêng ir:

“Văn phòng Đăng ký neh ntu hŏ rđău đă ăp ntŭk kan n’hao âk tay ntŭk wơt dơn siƀŭt n’hanh ntoch jong mông dơn gay ntop kơl nuĭh ƀon  lan, der bah khân păng kâp jŏ ir. Rlău ma nê, ntơm bah nar 1/4, mpôl hên an ƀư tâm rloh pơk sŏng dăng tâm nău nkra siƀŭt đah nhih pah  kan sŏk soăy n’hanh văn phòng công chứng, kơl tĭng ƀư ăp rêng kan online. Bôk năp, trong ntĭt leo dja nsĭt tay nău geh tam ngăn ngăn, rnoh âk nkra siƀŭt geh lôch jêh âk.”

Ntŭk tăch rgâl neh ntu hao ngăch ta nkual ƀon têh Buôn Ma Thuột ăp nar rlău aơ lah an saơ nău ŭch geh khlay bah ntŭk tăch rgâl bah năp nău lư n’glăp n’gor, rnôk ntŭk dja dơi sơch ƀư ntŭk rgum nhih pah kan bah n’gor Dak Lak mhe. Ndrel đah rnoh cán bộ, công chức hao sĭt nklang nkual ƀon têh Buôn Ma Thuột pah kan âk, đah ntŭk gŭ kan mhe mbra wăch rgum dơi nar lơn ma âk mpưm rnăk wâl, mpôl kan n’hanh doanh nghiệp./.